1 Higgeenni lumoke Duuchchi Woddike Goottiki hiyyichchi anibaa dage. 2 Lumoki Duuchchi Woddiki Gootti hiyya'nee qici, «Ani Tsiyooni'a yo'oshsha hinaafenneni; ise'aanna hinaaffeti gubatteenn» hiyye.

3 Duuchchi Woddiki Gootti hiyya'nee qici, «Ani Tsiyoonibaa higannon; Iyyerusaalemi giddo hedhannoni. Ookkonneechchi uduma Iyyerusaalemi Dhugaatike qachcha hiyyendaani; lumoke Duuchchi Woddike Goottixxi Koobanna Woyyitte kooba hiyyendaani» hiyye.

4 Lumoki Duuchchi Woddiki Gootti hiyya'nee qici, «Geedhetinna higgeenni Iyyerusaalemixxe baxxe giddo ofoldaan; mitte mittendi geedhe cimotenaa'n kexxeexxa siqqo siqqexxa. 5 Qachchiinke oruwwa'ni ookko geebbaaxxe labbaaxxenna meyyaxxe oosenni wo'mitaani» hiyye.

6 Lumoki Duuchchi Woddiki Gootti hiyya'nee qici, «Ookkonne wodda gatemmake Isra'eelike ardi'a tennee jajaan; ani kinni tennee jajannota?» hiyya'neeni Lumoki Duuchchi Woddiki Gootti.

7 Lumoki Duuchchi Woddiki Gootti hiyya'nee qici, «Ani, boroti darreke boga'ninna dhidhimini darreke boga'ni hedha'neeka arda anka anjirannoni. 8 Ani insa'nee Iyyerusaalemi he'no'aa wirri asse idagannon; insa'nenna anke arda kandaani; aninna qullummatinna addatenshati insa'neke Mageno kadannoni» hiyye.

9 Lumoki Duuchchi Woddiki Gootti hiyya'nee qici, «Lumoke Duuchchi Woddike Goottika Galmixxi booso dhaabendaa wodda ookko hexxemmaaxxi raagole haasootteemmaka hiyyichcho ta'a laqqina'neeki duuchchi Duuchchi Woddike Goottika Galma ijaartino'a hirre ha'nooxxa jabeesedhdhe. 10 Ookkonneechchi edgama manjokee rundi, horekeenna barra hujeek hiri, uwwemaammabaani; mitti mittingi manji olla'a ifinge'ni ke'aashsha assennexxee'e manji fule me'a woddanna aaga wodda nage'i hedhemmabaani. 11 Ta'a kinni edo asseennashsha konne gateeke arda'ni assabo'noni» hiyya'neeni lumoki Duuchchi Woddiki Gootti.

12 «Facaanseexxi sanne eloqico lattaani, woyinetiki hiddichchinna gumma gummisaani, buttinikinna midha uwwaani, iimuwwatenaa'ninna xeeni ganaani; konneechcho duuchcha gatemmake anke ardi'a geegoke asse uwwannoni. 13 Koo Yihudiinkenna Isira'eelike ardike mini hadoo; ha'noo gosa gosake ardi giddo badinemati mammaakendineemmakemman; ta'a kinni ani ha'noo anjirannoni; ha'nonna eebbisendinaani. Sodaatinoqqe; yaane kinni hirre ha'nooxxa jabeessedhdhe.»

14 Lumoki Duuchchi Woddiki Gootti hiyya'nee qici, «Ediki annuwwi ha'nooki anee mufachchiinsee wodda mararte mitte belo ba'ne insa'ne'ni idagonnaa mudhdheenani,» hiyya'neeni lumoki Duuchchi Woddiki Gootti. 15 «Ta'a kinni Iyyerusaalemi'anna Yihuda'a eloxxa yaane assonna'a mudhdhenneni; sodaattinoqqee. 16 Ha'no assa hasisaaxxi yaane konneechchinni butti'a hexxeeni: weli'aanni weli dhuggaa haaso'we; songote'ninna dhugaatixxa murte murre.✝ 17 Olla'a ha'nookee fuggoxxa yaane godobi ha'nooki giddo heddinoqqe'e; dhariki kakata eetinoqqe; ani tennee duuchcha diqatannon» hiyya'neeni Duuchchi Woddiki Gootti.

18 Higgeenni lumoke Duuchchi Woddike Goottiki hiyyichchi anibaa dage hiyyee qici, 19 Lumoki Duuchchi Woddiki Gootti hiyya'nee qici, «Sholgake agenjixxi agabo goddo hosa, ondike agenjixxi, torbakixxinna tommike agenjixxi agabo goddo hosa Yihudiinke ardi'a gammashshotike, fenxe hiyyatikenna ilileettetike ayyaanna kadaani; tennexxee dhugaatanna nage'a eeyye» hiyye.

20 Lumoki Duuchchi Woddiki Gootti hiyya'nee qici, «Heddi ardinna heddo qachchuwwik manni dagaaxxe yanna daggaan. 21 Mitte qachcha'ni hedhaammaki manni, ‹Duuchchi Woddika Gootta magenooffantonnaa; lumoka Duuchchi Woddika Gootta halsinonnaa amme; ranke me'ino; aninna umi aninginninni me'aanneni› hina'ni wele qachchibaa me'aani. 22 Heddi ardinna jajjabbi mootummuwwa Lumoka Duuchchi Woddika Gootta halsito'anna magenooffato'a Iyyerusaalemi'a daggaani» hiyye.

23 Lumoki Duuchchi Woddiki Gootti hiyya'nee qici, «Eettene barruwwa'ni gargari hexxeexxe gosak gargar hedheeke afo'inni haaso'aaki ardi tommi manni mitte Ayihudiinke manjichchixxe seemmaka handaara duudhe abixxeexxi ‹Mageni ha'nooni welti hedheexxa lanqeennaaxxee ha'nooni welti me'ino› » hiyyaani.