Zekkaryaasikaa Raaga 13

Cubbotenaa’ni Ca’a Hiyya

1 «Eettenne barra Daawwitika ardanna Iyyerusaalemi giddo hedha’neeka arda battoomakenaa’ninna cubbotenaa’ni ca’a assitaaxxi muume banendaani.

2 «Ani eettenee barra magenoofantaammaxxe fakkuwwaka summa buttatenaa’ni balleessannoni» hiyya’neeni Lumoki Duuchchi Woddiki Gootti. «Ani wabeekonna fuggichcha hafuura bogakenaa’ni fugussannon. 3 Huuni manjinna raaga haaso’oole i’leemaki anninna ama isixxi, ‹Duuchchi Woddike Goottike summinni dhara haasottettaxxee reyo ati’a haasissaan› isoo hinaan. Isi raaga haaso’oolenna isingi hadi isoo otee shiyaani.»

4 «Eettenee barra mitti mittiniigi wabeekichchi haaso’aaxxe raagiinxe waleellaxxee shookaani. Manna sobo’anna wabeekotixxa ordatixxa seemma odo’wabaani. 5 Isinna, ‹Ani fichcha huccaa’ni galannoke malee wabeekichchokebaani; ani oosummandenaa’ni galdumi anki fichcha huccaten› hiyyaani. 6 Mitti manji, ‹Tinni biso atike’ni hexxeexxi mada mayiinxe?› hiyye isoo qoroole, ‹anke jaaluwwike mine’ni hedheenna wodda mado’ennexxe madani› hiyyaani.»

Allalisanji ganeme, Gedhebikinna Xeereme

7 «Koo wolaantichcha,

ankee allalisanjo’ni

anke shiqike jaalo’ni ke’i!»

hiyya’neen Lumoki Duuchchi Woddiki Gootti.

«Allaalisanjo gani,

gedhebikinna xeeremaani;

aninna hirre anxa shixxarammake’n wirri assannoni.✝13:7 Mat. 26:31; Mar. 14:27.

8 Bogi giddo duuchcha’n hedheeke ardinaa’n» hiyya’neen Duuchchi Woddiki Gootti;

«Sase anganaa’ni lame anga ganemee reyaani;

sase anganaa’ni mitte anga kinni isi giddonni gataani.

9 Tenne sasenaa’ni mitte kuta giiratibaa iyyedagannoni;

birretike sbiljishsha insa’nee qorqorsisannon;

worqetishshanna insa’nee hega uudannoni;

Insa’nenna anka summa ye’enaani

aninna insa’ne’a hee hiyyannon;

Aninna, ‹insa’nee anke ardani,› hiyyannoni;

insa’nenna anee’e, ‹Duuchchi Woddiki Gootti Mageno no’okeni hinaani.› »