1 Isira'eelixxe kulemeeki Duuchchi Woddike Goottiki hiyyichchi konneechchinni butti'a hedheeni; iimuwwa dhiseeki, buttatixxa boosonna dhaabeek, manjoke'ni hedhotika hafuura giddo uggeek, Duuchchi Woddiki Gootti hiyya'nee qici, 2 «Ani Iyyerusaalemii'i qarqara iseke'n hedheek ardi duuchchi isenaa'n ha'weexxi gatantaraaxxe buuda assanon; Yihuda Iyyerusaalemishshanni elqe kayyii'ni buqendaani. 3 Eettene buttatiki gosa gosaki ardi duuchchi Iyyerusaalemi'ni bukki hiyyaaxxe barra'ni, Iyyerusaalemii'i gosa gosaki ardi duuchchi'a le'mitabaaxxe rassa assanoni; isee le'miso'aa wo'lanaaki duuchchinna ifi'aanni miidhemaani. 4 Eettene barra mitti mittinga fadhado alayyik, gulufeemmaka mannanna maraatummati ganannon» hiyya'neeni Duuchchi Woddiki Gootti. «Yihudaka arda ille anxenni heqqannon; yaane kinni gosa gosake ardike fadhadixxa ille balleessannon. 5 Yihudaki akeekisanjuwwi ifike godobi giddo ‹Lumoki Duuchchi Woddiki Gootti Mageno insa'neeke kadeemmaxxee Iyyerusaalemik ardi jabakeni› hiyyaani.

6 «Eettenee barra Yihudaka akeekisanjuwwa giiratixxe boosumma hana tuullee'naa ha'yitammaxxe haqqeshsha, midhatixxe ladde giddonna ha'yammake xassa insa'nee assannoni; middii'ninna bita'ii'ni qarqara insa'neeke'ni hedheeka gosa gosaka arda indaan; yaane kinni Iyyerusaalemi bakka ifixxenaa'ni mishikki hitabaani.

7 «Daawwitiki ardikinna Iyyerusaalemi hedha'neeke manniki ulfinni, Yihudake ulfinninaa'ni sa'abaashsha Duuchchi Woddiki Gootti sirete'ni Yihudake ardika galduma anjiraani. 8 Eettene barra ani Duuchchi Woddik Gootti Iyyerusaalemi giddo hedha'neeke manni'a wontete kaddanon; insa'nee giddii'ni gophaaleessi Daawwitishsha kadaan; Daawwitiki ardinna Mageniisha kadaan; insa'nee edo me'ammake Duuchchi Woddike Goottike iimik erganjishshanna kadaan. 9 Eettene barra Iyyerusaalemii'i loleemmaka gosa gosaka arda duuchcha bironna'a ke'aannoni.

10 «Daawwitike arda'ninna Iyyerusaalemi hedha'neeke arda'ni badhaadhakanna soodachchotika hafuura insa'nee giddo uggannoni; anee onteemmakanna uundaan. Insa'nenna mittelchokee'e oo'nammashsha isi'a oo'naani; angafi belti'a hiiqqinse oo'nammashshanna isi'anna hiiqqinse oo'naani.✝ 11 Eettene barra Megidoonike diidaa'ni Hadaadi Riimooni'a oodhishsha kaddeemmashsha Iyyerusaalemi giddonna iittanni lumoxxi oodhishsha kaddaan. 12 Buttatinna ooxxaani; mitte mitte gosake minik labballi ifi ifi'aanni oodhaani: aruwwa insa'neexxinna ifi ifi'aanni ooxxaani: tenne bifanni Daawwitixxe gosake minik labballi aruwwa ifixxinni, Naataanixxe gosake minik labballi aruwwa ifixxinni, 13 Leewwixxe gosake minike hadiki labballi aruwwa ifixxinni, Shimi'ixxe gosak labballi aruwwa ifixxinni, 14 Gateek gosa gosake minik labballi duuchchinna aruwwa ifi ifixxinni oodhaani.✝