1 Ookkonneechchi uduma aninni welti haaso'a'ni hedhemmaki iimiki eriganji hige dageexxi manji mitti diiphokenaa'ni dammaqe ke'ammashsha anee dammase. 2 Isinna anee hiyye qoree qici, «Uuddaattechchi maachcho?» anee hiyye.

Aninna hiyye hiissennee qici, «Umoke'ni zayitetixxi odolcho hexxeka worqe callinni giissemeeka xassiinka ofo'lmalcho uudenneni; konne xassiinke ofo'lmalchi hana torbaane baanba afe'eeki torbaani xassuuwwi hedhemmani. 3 Higgeenna mitti eettenne zayitetixxe odolchobaa'ni middi daree'ni, welikinna bita'i darree'ni lami ejersiinki haqichchi hedheeni» hiyyene.✝

4 Aninna anee haaseesaammaaka iimika erganjo hiyye qorenne qici, «Anke gootta, kunnichchiri maachcho?» hiyyenneni.

5 Isinna anee, «Maachcho kadeexxa egendebexxoo?» hiyye. Aninna iso'n, «Anke gootta; ege'nebe'no» hiyyenne.

6 Tennexxee ane'ni hiyyee qici, «Zerubaabeli'a ergemeeki Duuchchi Woddike Goottiki hiyyichchi, ‹Anke Hafuurinnite malee'e hunnatinna uududikitebaan› hiyya'neen Lumoki Duuchchi Woddiki Gootti.

7 «Tee lumoxxe kooba atita maachcho? Zerubaabeli edo dirre bakka kaddatton; isinna cancik manni, ‹hittatta ela'ne! Hiyya'ni muuxamiinka kinjo uggaan.› »

8 Ookkonneechchi uduma Duuchchi Woddike Goottiki hiyyichchi ane'ni hiyyee qici, 9 «Zerubaabelixxi anga konne galmixxa booso dhaabbeeshshanni muuxaaxinna isinxe angan; Ookkonneechchi uduma lumoki Duuchchi Woddiki Gootti anee ha'nooba'a erigeexxa egendinaani.

10 «Shiixxoxxi yaane assendaaxxa barra tufateeki ayyeteta? Manni Zerubaabelixxe anga'ni miketixxa tunbi uudaa wodda gammadaani.

«Tinni butta duuchcha'ni mammarendaaxxe Duuchchi Woddike Goottixxe illenni.»✝

11 Ookkonneechchi uduma aninna iimika erganjo, «Xassiinke ofo'lmalchike midda'ninna bita'a'ni hedheeki kunni lami ejeersiinki haqichchi maachcho?» hiyye qorenne.✝

12 Higeeni isoo, «Lame worqetike baanbi bira worqetixxi zayite isenaa'n dunenda'neexxi tinni lame ejersiinxi dame maachcho?» hiyyenne.

13 Isinna anee'e, «Maachcho kandeexxa egendebexxoo?» hiyye.

Aninna iso'n, «Anke gootta; ege'nebe'no» hiyyenne.

14 Isinna, ane'n «Kunni lami manni butta duuchchike Duuchchi Woddike Gootti'a ergatemo'a harireme'eekeni» hiyye.