1 Koo Libaanoosi; birbirsa atika giira itto'aa

huluwwa atixxa bani!

2 Koo hi'neesiinke haqichcho birbirsiink haqichchi ibeemmaaxxee oodhi;

ulfeessemeemmaki haqichchuwwinna ba'eeni!

Koo Baasani qilxuwwa oodhdhe;

jabaki gongomi worqeme'een!

3 Allalisanotixxa raare laqqe;

ulfinni insa'neeki adhdhemeemmaxxee'e

Neeniinxa harqa caqasse;

jabak Yordaanoosike gongomiki baabi kutti hiyyeen.

4 Duuchchi Woddiki Gootti anki Mageni hiyya'nee qici: «Dulokee foyemeeka gedhebo bobbaasi. 5 Hidhdhemmaaki manni konnee gedhebo dulaani; insa'neenna xixxaaki hedhebaani: gurguremaaki manninna, ‹Duuchchi Woddika Gootta galati gewo'o: dureessake kadeenneni!› hiyyaani. Konne gedhebixxi allalisanonna midde gedhebokee marartabaani. 6 Ta'inni elqi'a ani buttate'ni hedha'neeke ardi'a mararabe'noni» hiyya'neeni Duuchchi Woddiki Gootti. «Manjo duuchcha olla'a isikixxe'ninna moyanjiinxe anga'ni sa'isse uwwannoni; insa'nenna butta rakkinsaani; aninna anga insa'nexxeenaa'ni insa'ne anjirabo'noni.»

7 Tennexxee dulemo'a fooyemeemmaka gedhdhebo, giddii'ninni miicemeemmaka gedhebo allalannoni; Lame siqqo aadhennexxi mitte «Danchitte» langaxxanna «Mittumma» hiyye summa fulchennexxi horekanna bobbaaseenneni. 8 Mitte agenji giddo sasiinxa allalisano fugussenneni.

Gedhebikinna anee gibe; aneenna gophise.

9 Aninna konnee gedhebo, «Ani ha'noke allalisanjo kadabe'no; reyaaki reyowwaali: ba'aakinna ba'owwaali: gateekirinna mitti mittiinka maala itowwaali» hiyyeenneni.

10 Ookkonneechchi uduma gosa gosake ardi duuchchinni welti aageennaxxa kako diigatee «Danchitte» hiyye summa fulcheennaxxa anxa siqqichcho aadheennexxi enqeenneeni; 11 Eettene barra'ni kako diigende; ane'e uuda'ni hedheemmakirinna wixixxi hiyyeemaki gedhebinna kunni Duuchchi Woddike Goottike hiyyichcho kadeexxa ege'ne.

12 Aninna insa'nee, «Eloxxe fakkaatte ha'no'ni leellita'noole runda anka ani'a uuwe; uwwa gophphina'noole waalle» hiyyenneni; tennexxee sase tomme birretika sibiljo ane'n uune.✝

13 Duuchchi Woddiki Goottinna anee hiyyee qici, «Ani'a uuno'a weli angeeka eloka hira odolcho ganammak manjichcho'n darbi» hiyye. Tennexxee aninna sase tomme birretika sibiljo aadhenneexxi odolcho ganaammake manjichcho'n darbenne.✝ 14 Ookkonneechchi uduma Isira'eelixxanna Yihudixxa dayyumma diigatee «Mittumma» hiyye summa fulcheennaxxa langaxxa siqqichcho enqeenneni.

15 Duuchchi Woddiki Goottinna anee hiyyee qici, «Higgeenna gowwa allalisanjika miya adhdhi. 16 Kunse ani buttate'ni allalisanjo ke'issannoni: isinna ba'eekee xexxe'atabaani: ba'eeka hasabaani: enqemeeka xaasabaani: fayyeeka itisabaani; yaane kinni isi ha'yeemmakike maala itaani; mannetinna gattebaangi ite biraani.

17 «Hore allalabaake woyi fulabaake,

allalisanji'a isi'a aanne'e!

Wolaantichchi ciqiletanna

middixxa isixxa ille otowwaali;

hirre isixxi hara xuuxxendowwaali;

middixxi isixxi ille ijje baxxowwaali.»