1 Higgeenna iimi'a uudenneni: kunse shoole sarageellwwi lame koobaxxe oddonaa'ni fuldaa'naa uudenne; koobuwwatinna sageettotixxe koobuwwammani. 2 Siretika sarageella harkisaammaki diimmoke fadhadoman, langaka sarageella harkisaammaki fadhadi xilloke,✝ 3 Sakkaka sarageella harkisaammaki fadhadi golalooke kadaa wodda: shoolgaka sarageella harkisaammakinna taltallichcha fadhadommani: duuchchiingi jajjabbakemmani.✝ 4 Aninna aninni welti haaso'aammaka iimika erganjo, «Anke gootta kunnichchiri maachcho?» hiyyenne.

5 Iimiki erganjinna ane'ni hiyyee qici, «Tinni buttatike Duuchchike Woddike Gootti edo uurrite hexxemmaxxe bakkanaa'ni fulda'neexxe iimatixxe shoole diidalluwani.✝ 6 Xillollami fadhadi harkisaammak sarageelli middik bogibaa, golallami fadhdhadi harkisaammak sarageelli dhidhimiinke bogibaa, taltallichchi fadhadi harksaammak sarageelli bita'ike bogibaa me'aammani.»

7 Iikki jajjabbi fadhadi me'aa wodda butta duuchcha qolchatee qixxeeffateemman. Isinna konnee fadho, «Bogi duuchchibaa me'e» hiyye; fadhadikinna boga duuchchibaa me'e.

8 Ookkonneechchi uduma iimiki erganji canca'ni ane'ni, «Middike bogibaa me'a'neekir hafura anka middike boga'ni anee hafuura adhdhise'een» hiyye.

9 Duuchchi Woddike Goottiki hiyyichchi ane'ni hiyyee qici, 10 «Baabiloonike boganaa'ni booji'eme dageemmake Heldaayinaa'ni, Xoobbiyanaa'ninna Yidaa'iyanaa'ni worqetanna birreetika sibljo aadhi; eetteneenni barra Sofooniyaasika belto Iyyosiyaasiba mari. 11 Eettene worqenna birreetika sibljo aaxxetexxi kallachcha giissite Iyyooseedeqika belto Qeesetika akeekisaanjo Iyyaasuke umo'ni uggi. 12 Iso'ninna Lumoki Duuchchi Woddiki Gootti hiyya'neeni hite kuldato qici: ‹Kunse Summi Dame hiyyemeeki manji konneteni; isinna bakka ifixxe'ni barqaaqaani: Duuchchi Woddike Goottika galmanna ijaaraani.✝ 13 Duuchchi Woddike Goottika Galma ijaaraak isoteni. Isinna ulfeessemeeke kadaani. Mootete'ni ofo'leexxi moyaani; mootende'ni ofo'le qeesomaan; lamiinge baalloomixxe oddo'ni nage'i hedhaani.› 14 Kunni kallachchinna Heeleemi'a, Xoobbiya'a, Yidaa'iya'anna Sofooniyaasika belto Heeni'a Duuchchi Woddike Goottike Galmi giddo qaabete kadaani. 15 Iikki bayya hedheeki manni dageexxi Duuchchi Woddike Goottik Galmi ijaaremaa wodda gargaaraani; ha'nonna Lumoki Duuchchi Woddiki Gootti anee ha'noobaa ergeexxa egendinaani. Duuchchi Woddika Gootta ha'nooke Mageni'a xexxe'achchoti ajajendinoole tinni duuchcha kaddaani.»