1 Duuchchi Woddiki Gootti midha wiilsatixxe yanna'ni xeena ha'no'a uwwaashsha soodatte;

xeenika duumaancha idagaak Duuchchi Woddike Goottani;

Isi mannakee geyaaka xeena,

mitte mittengee buttatika hiddichcho uwwaan.

2 Fakkuwwa manjo dedhissaani;

moraammak manni dhariinxe waleella uudaani;

Sobiinxa oojjonna haaso'aani;

woyi fuldabaaxxa jajjabeessa jajjabeessaan;

Tennexxee ardi gedhebiinsha doonsa kiyya hiyyaan;

allalisanjo gophatinna rakkateeni.

3 Mufe anxi allalisanote'ni bubbeeni;

akeekisanjuwwakanna xixannoni;

Lumoki Duuchchi Woddiki Gootti,

Hore ifike Yihudake ardi'a xexxe'ataani:

lolliinxe yanna'ninna hollisaake,

fadhachchishsha insa'nee assaani.

4 Yihudanaa'n dhaaddoti kinji,

duunkaaniinxi kaaso,

Loliinxi gabenna,

galchalluwwi duuchchi dagaani.

5 Mitteba loliinke sannachcha kandaani;

naapha orgi giddixxe dhoqqeshsha hirbeessinaani;

Duuchchi Woddiki Gootti insa'nenni welti hedhemmaxxee'e lolleexxi;

fadhadiki lolammaka manna salphinsaani.

6 «Ani Yihudaka arda jajjabeessannoni;

Yoossefika ardanna anjirannoni.

Insa'ne'a mararaannaxxee'e

Insa'neexxe bakkabaa insa'nee hiissannoni:

insa'nenna ani gibebe'noke,

manna kandaani;

Ani Duuchchi Woddike Gootta insa'neeke Mageno kadeennaxxee,

soodachcho insa'neexxa laqannoni.

7 Efireemito jajjabba manna kaddaani;

qalbe insa'neexxinna woyinetixxa booka ha'weeke manjishsha gammaddaani;

Oose insa'nexxinna tennee uuda'ni gammaddaani:

qalbe insa'nexxinna Duuchchi Woddike Gootta'ni gammaddaani.

8 Fiissa'nee insa'nee ye'annon;

mitteba bukki assannoni,

Dhugaaten, insa'nee anjirannoni;

edishshanni laakkoosi insa'neeki bira sa'aani.

9 Gosa gosake ardi giddo insa'nee xeeroonnolenna,

bayyike boga'ninni he'ne anee kassi hinaani;

Insa'nenna oose insa'nexxi lubbondinni he'ne

bogi ifikibaa hingaani.

10 Gibtseeke boganaa'ni insa'ne hiissannoni;

Asooriinaa'ninna insa'nee bukki assannoni;

Gele'adiba'anna Libaanoosiba'a insa'ne iyyedagannoni;

insa'ne'a geyaak boonchinna afemabaani.

11 Insa'nenna rakkotixxe abbaayya giddii'ni sa'naani:

abbaayyatiki danbala'inna sammi hiyyaani:

Abbaayike Galaaniinxi dhi'mo duuchchi baggaani.

Ifi dhaadammaxxi Asoorixxi kijibanna salphattaani;

Gibtseexxi mootummanna hunna gophphaani.

12 Ani Duuchchi Woddiki Gootti insa'ne jajjabeessannoni;

summa isikenninna mammaremmaani»

hiyya'neeni Duuchchi Woddiki Gootti.