1 Mageniinxe fedhiinni Yessuusi Kiristoosike ergammalo kadeeke Phawuloosinaa'n, Yessuusi Kiristoosi'ni hedheekeeri'a, xuurameeyyetee Efesoonike qachcha'n hexxeexxe qulliyye'aa.

2 Mageno anna no'okee, Gootta Yessuusi Kiristoosik badhaadhinna nage'i ha'no'aa kadowwaal!

3 Iimike booncho'ni no'o'aa duuchchiinxa hafuuriinxa eebba uwweexxi Kiristoosi darree'n no'oo eebbiseeka Gootta no'oka Yessuusi Kiristoosika Anninna Mageni galateefatemowwaal! 4 Isi edo woyyooletenna ci'ma beloke manna kande afemannoshsha butta dadendebaa edi darrre Kiristoosi darree'n no'oo fi'leen.

5 Mageni eloxxe isixxe fedhiinni Yessuusi Kiristoosi darree'ni oose isixxe kandannoshsha ediseenni isixxe jaalalanni no'oo fi'le. 6 Tenneennna asseechchi eeyyemmeeke belto ifiki darree'ni tolanga no'aa uwweemmeek ulfo kadeek isiki badhaadhi galateeffatemo'aaten! 7 No'onna Mageniinxe badhaadhixxe wo'maa ga'mii'ni kexxeexxa ookkone isike beltixxe mundenni wodemmennexxi cubbo no'oxxixxa gattowwaali alfinennen. 8 Badhaadha isikanna beekkumikinna ege'na duuchchanni no'aa bira sa'isse. 9 Mageni ifxxe ellenni Kiristoosi darree'ni ediseexxi hedemmashshanni ifixxe fedhiixxa buqo yaane egennannoshsha asse. 10 Iitti yanna geltaa wodda iimate'ninna buttate'ni hexxeexxi yaane duuchcha bukki assendeexxi Kiristoosike baalloomi hunda bukki hito'aaten.

11 Duuchchiinxa yaane ifixxe fedhiinni hujaak Mageni isi ediseenni no'aa muremma qicinni Kirstoosi darree'n isike arda kandonnaa no'oo fi'leen. 12 Tinninna kaddeek Kiristoosii'i adde assedhati siretike kandeenneki no'o Mageniinke ulfinni'aa galatiinke kandonnaaten.

13 Ha'noonna anjiratixxe wengeele kaddeeka dhugaatika hiyyichcho laqqinee wodda Kirstoosi'ni amandineexxi arda isike kaddine'een. Isi addachchiisemmashanni ha'noo isike kaddineexxa kokeesaake Woyyichchi Hafuurinni maxxansedine'een. 14 Kunni Hafuurinna no'oo isike ulfinni'aa galatake kandonnaa Mageni ifike kadeeka duuchcha wodaa qico'ni alfinnonnaa he'neenneke qadaadi'aa abidilshake kado'aaten.

15 Tennexxee Gootta Yessuusi'n affineexxa amana, woyyoole duuchchi'a afineexxa jaalala laqennexxee yannanaa'ni ke'isenneexxi, 16 Aninna soodachcho anixenni ha'noo qaabata'ni ha'nooxxee galata shiqishiyyo uurriseennabaan. 17 Ulfaateeke Anna kadeeka Gootta no'oke Yessuusi Kiristoosika Mageno ha'noo adda egendinaashsha, beekkumiinkanna ifisaaka Hafuura ha'no'aa uwwaashsha duuchchi wodda kadhataanneni. 18 Mayiinxe adde'aa ye'endineexxanna woyyoole dhaaldinaaki qadaadinna ulfinni hitteeke kadeexxa egendino'aa ha'nooke wodanxi ille banendaashsha soodataannen. 19 No'oo amannannokee duuchchiinxi iimi darre lumoxxe kaddeexxa isixxa hunna egendino'aa soodataannen. Tinni hunnanna isixxe lumoxxe hirrexxe hujeshsha, 20 Kiristoosii'i reyotenaa'ni ke'isatinna iimike booncho'ni Mageniinke midda'ni isoo ofo'lishee wodda leelliteexxeen. 21 Mageni Aabi Kirisitoosii iima midda ifike'ni ofo'lishsheechchi heene galchanaa'ninna baalloommanaa'ni, hunnate'ninna goottummati iimi darre, iittanni tenne butta calla kaddeebaangi daggaaxxe butta'ninna summi duuchchi iimi darre hedheeka ulfeesseemmeeka summa uuwwatiten. 22 Mageni duuchchiinxa yaane Kiristoosike baalloomi hunda kaddaashsha asse; Mageniinxi tuuta'ninna duuchchiinxe yaane'ni isoo umoke asse baallonse. 23 Mageniinxi tuutanna biso Kiristoosike kaddeexxi isinni wo'miteexxen; duuchchiinxa yaanenna duuchchii booncho'ni wonsheek isoten.