1 Yoona Goottakee ergatemeennexxee usuremeennek ani, adhdhitineexxe ye'ensha'a hassissaa qicinni hexxinaashsha ha'noo kadhataannen. 2 Hara shaqqakenna ba'lake kadde; jaalalati weli dandeettina'n ossunteti hedhdhe! 3 Nage'ik weli abidendineexxi woyyichcha hafuuranaa'ni afemaaka ookkonee mittooma heqqedhatee jabaatte! 4 Ye'endinee wodda mitte addebaa ye'endineemmashshanni mitte bisinna, mitti Hafuurinna hedheeni. 5 Mitti Gootti, mitte amananna mitti xinqati hedheen. 6 Iitanni duuchchiingi iima darre kadeek, duuchchiinge'ni hujaaki, duuchchiinge'ni hedhaaki, duuchchiingike Anna kadeeki mitte Mageno hedheeni.

7 Yaane kinni Kiristoosi uwwate muremma qicinni mitte mitte no'ongee badhaadhi no'aa uuwwemedheen.

8 Tinninna,

«Iimi'a me'ee wodda

booji'emeemmaka manna adhdheexxi me'e;

mannakeenna uwwaara uwwe» hiyyendemmashshaten.

9 Yoona, tinni, «Isi iimi'a me'een» hiyyemaaki hiyyichchi tenne butta'n buttini giddi'a dirreeni hiyyate mallee weli maachcho leellishsha? 10 Kunni butti'a direeki duuchchiinxa wonshatee ookkone iimuwwa duuchchi iimi'a me'eeken. 11 Mitte mitte Ergameeyye, mitti mitti Wabeeko, mitte mitte eloxxa odo kulaake, mitte mitte allalsannotenna mitte mitte barachchiisalluwwake kandaashsha uwweek isoten. 12 Tenneenna asseechchi, Kiristoosike biso kadeexxi Mageniinxa tuuta ijaarendo'a amaayne ergatenshatee qophpheesate kadda wodda 13 Tinni kadaak no'o duuchchiing Mageniinka belto ege'natinna ege'nat afendaaxxe mittummabaa dagatinna wo'ma manjo kadat, Kiristoosinni hexxeexxe hara wo'ma qici'a no'onna gennannoshshaten.

14 Yoona manjiinxe shokkonninna dedhisanni qophpheesendeexxe barachchoxxe diidalloke danbala'inni elqe kayya dhiibenda'n adhdhendemmaxxe annooleshsha kandabe'no. 15 Tennexxa bakka, dhugaa jaalalat haasoonna'n umoke kadeeke Kiristoosibaa duuchchiinxe yaanenni nophphinannon. 16 Gargartti hedheek bisiink qooluwwi mitteba abidemaak Kiristoosiniteni; manjunte duuchchinna abidendeek mikituwwake'niten; tennexxee mitti mittingi bisiinke qooluwwa isi'a uuwendemmaxxa huje hujaa wodda bisi duuchchi nophphitaani; jaalalatinna ijaarendaan.

17 Yoona konnechchinni edi'a yaadi insa'neek toliinke kadeeke Ayihudake kadebaake mannishsha hexxinoqqe'e! Hiyyyennexxi Goottiinke summinni ha'noo xexxe'achchiisaanneni. 18 Hedumi insa'neek dukannee'naa ginbenne hiyya insa'nexxenaa'n kexxeexxa Mageni uwwaaxxe hedhonaa'n gargar hinge'een. 19 Shook insa'nenaa'ni ba'ati fuggo duuchcha assatee umo ifika maaliinxe gaabbe'a sa'issine uune.

20 Ha'no kinni Kiristoosxxee barratinee qici iittatebaa. 21 Dhuhaaten, ha'no isixxee laqine'eenni; Yessuusi'ninna dhugaa hexxeexxa isinaa'n baratine'eeni. 22 Edi wodda hexxinemmaxxe hedho'n sobatixxe ifixxe gaabbenni kotofendeemmaxxa ha'nooxxa dullatte manjumma fugusse. 23 Iittanni ha'nooxxe sammoninna ha'nooxxe qalbenni haaro'mitino'a, 24 Dhuggaatixxe kaddeexxe qulummanninna woyyummanni Mageno fakkataashsha dadendeexxa eettenee haaroxxa manjumma oddo'we!

25 Tennexxee dhara haasotiinoqqe'e! No'o duuchchiingi mitte bisike qooluwwa kandenaxxee weli weli'a dhugaa haassoonno! 26 Mufatte; yaane kinni cubbo hujjinoqqe'e! Ha'nooxxe mufe'ninna arishsho e'ytoqqe'e! 27 Diyabloosi'aanna bakka uutinoqqe'e! 28 Moore'ammaki konneechchinni edi'a mooroqqe'e! Yaane kinni rakkateekiiri'a qoodaachcho afaashsha ifixxe anganni eloxxa hujowwaal! 29 Haranga elobaaxxi yaane ha'nooke afonaa'n fuldoqqe'e; yaane kinni laqqaakaara gammachchisaakanna ijaaratee la'o afeeka, mannakeenna hasisaake kadeeka hiyyichcho haaso'we! 30 Wodeemmatixxe barra'a isinni maxxansendineeka ookkonee Mageniinka Woyyichcha Hafuura yaadisinoqqe'e! 31 Qaraarre duuchcha, mufe, aare, cancanna yowwichcho heenne fuggoxxi yaane duuchchinninni welti ha'nonaa'n fugusse. 32 Mageni Kiristoosi darree'n ha'no'aa gattowwaali hiyyemmashshanni ha'noonna weli'anni weli gattowwaali hiyye! Ba'lakenna weli'anni weli owwitinaake kadde!