1 Anke dayyuwwa manji fedheeka dedha asseexxi afemeexxe kaddoole hafuurinke manna kaddineek ha'no iitta hedheeka manjo mararteti hiisse! Ha'noonna kinni iita hexxeexxe hega uushsho'n ibbinabaashsha ifi heqqedhdhee! 2 Welin weli qarqaarati mitti mitti ha'noogi weliinxa ba'o ba'edhowwaal! Konne toorinni Kiristoosika seera muuxinaan. 3 Mitti manji welekenaa'ni woyyo'aaxxi yaane hexxebaang, «Welekenaa'ni anee woyyan» hiyyeexxi hedeexxe kaddoole isi umo ifinge gowwisaan. 4 Mitti mitti manji ifike umixxa huje qo'niseexxi hega uudowwaali. Ookkoneechchinni udumi'a ifike umixxa huje wele mannixxe hujenni weli herregateete kaddebaangi umo ifinge calla ifi saadaxxa yaane alfaan. 5 Mitti mittingi ifike umixxa ba'o ba'edhiyyote hasissaan.

6 Mageniika hiyyichcho barataak manji eloxxa yaane duuchcha ifike barsisanjinn welti qoodemowwaal.

7 Mee ifi gowwisse! Magenoke'ni gaciffachcho dandeessissabaan. Fedheeki manji facaaseenxe haa'maan. 8 Maala gammachchiisatee facaasak kinni ifike maalanaa'n reyo haa'maan; Hafuura gammachchiisatee facaasaak kinni Hafuurakenaa'n duuchchi woddixxe hedho ha'maan. 9 Godoba kulta gonphonnole yanna geltaa wodda maye bukki asse'nannon; tennexxee huje eloxxa jujaatee boosonnonnoqqe'e. 10 Yanna eloxxa alfinaannole manji duuchchi'a giddii'ninni ammaangtike mini hadi'a eloxxa yaane assinno!

11 Anga anxenni hitta hexxeexxe lumollamma borruwwa borreessenne qico uuddee! 12 Jila ofo'litinaashsha ha'noo hunnisa'neekiir gadho maalik elollake kadee leello'a hasa'neeke mannan; tenneenna iitta assinaa'neechchi Kiristoosixxe fannonaa'ni kaxxeexxa shorrichchi insa'ne'ni geyabaashsha hineeten. 13 Insa'nee ha'noxxe jila ofo'la'n ifi saadatee hineexxi, ha'no jila ofoldino'a hanse malee'e insa'ne jila ofoleek umo insa'negennini midde seera muunxeekeba'a. 14 Ani buttatee fansemenexxee buttatinna ani'a fensendeexxa Gootta no'oke Yessuusi Kiristoosixxe Fanno gadhi darre wele ifi saada anenaa'n bayyattowwaal. 15 Tennexxee Yessuusi Kiristoosi'n haaroxxe dada kadde malee jila ofo'la yookaan ofo'la gopha mittechchonna woyi fuldabaan. 16 Tenne akkeette hordoffaake duuchchi'anna Mageniinxe Isira'eelito'a nage'ikinna mararte kaddowwaal!

17 Biso anke'n hedheek jadhafenshatik gadaanesi Yessuusi'a erganjo kada anixxa leellishammaxxee konneechchinni edi'a fedheek manji anee rakkisoqqe'e!

18 Anke dayyuwwa Gootta no'oke Yessuusi Kiristoosik badhaadhi ha'noke irrinni welti hedhowwaali! Hamiin.