1 Kiristoosi no'oo leexxa fulcheechchi leexxumma he'nona'aten. Tennexxe jabaatineexxi uurre malee'e langaxxa garbummatike qanbarinni abidendinoqqe'e!

2 Ani Phawuloosi ha'no'n hiyyaannexxi, jila ofo'la no'oo anjirtaan hitineexxi jila ofoldinoole Kiristoosi ha'noo'a mitte la'onna afebaan hiyyaannen. 3 Higgeeni xexxe'achchiisaannen, «Jila ofo'la anjirtaan» hiyyeexxi jila ofo'laak manji duuchchi seera duuchcha wonshate hassisaan. 4 Ha'noo seeri ga'mii'ni qulloomatee hassinaak duuchchi Kiristoosinaa'n gargar higgneexxi badhaadhakenaa'n ibbine'een. 5 No'o kinni addantaannexxa qullumma Woyyichcha Hafuurini darre'n amanati he'nee halchati heqqe'nanno. 6 Kiristoosi Yessuusinni hedhat jaalalati hujjaaxxe amana malee jila ofo'lanna ofo'la gopha no'o'a mitte la'o uutabaan.

7 Ha'no elooshsha gongitinaamman; dhugaatee ajajendinabaashsha ayyetee ho'noo hoyye? 8 Iitta hedheek gorsi ha'no ye'eeke Magenonaa'ni dageekebaan. 9 Tinninna, «Heenoxxi lebele buko duuchcha bukeesitaan» hiyyendeemmashshaten. 10 Yaane kinni gargar hedheek yaadi ha'noo'ni hedhebaaxxa Goottake'n amanaannen; ha'no'o memmi assaak ayyinna hedheexxe kaddoole murte iso'n uwwendaan. 11 Anke dayyuwwaa, ta'i qico'ni ani, «Anjirematee jila ofo'la hasissaan» hiyya'n lallabeennele ta'i qico'ni mayee anee shorrinamma'a? Iitate kaddeele Kirstoosixxi fannisensha mannakee gugguffachote kada gattamman. 12 Yoona kunni ha'noo mekki assa'neek manni jila ofo'laa calla kaddebaake middisake ifi asseele eeyyannan. 13 Anke dayyuwwa ha'no leexxummatee ye'endine'een, yaane kinni mitti mittekee jaalalati ergatemme malee tinni ha'noxxi leexxumma gaabbe maalinxa muuxatee buutote kaddoqqe'e. 14 Seeri duuchchi, «Wele manjo umi ifikishsha eeyyi!» hiyyaake mitte hiyyichchinni muuxeme'een. 15 Yaane kinni weli'aan weli ninnifina'n ittinoole duuchching mittenba baxxinabaashsha ifi heqedhdhe.

16 Yoona Hafuurake'n akeekemme malee'e maaliinxa gaabbe haranga muuxinoqqe'e. 17 Maali Hafuuri hasabaaxxa, Hafuurikinna maali hasabaaxxa halchaan; tennexxee Hafuukinna maali weli'aanni weli gareerammaxxee'e hassineexxa assa dandeetinabaan. 18 Hafuurik akeekendinoole kinni seeri hunda hexxinebaan.

19 Maaliinxi hujuwwa ege'nedeexxeran: tinnirinna yabaabulle, batto'a, qii'misa, 20 Dharichcha magenuwwa magenoofata, moro, weli giba, dha'a assa, gaabbe, aare, ifi calla hiyya, fojino, dhariinxe barchchonni gargar hiissa, 21 diinumma, machcho'a, sirba, konneera labbaaxxeran; iitta hexxeexxa yaanuwwa hujaakiir mootumma Mageniixxa dhaalaba'a.

22 Woyyichchi hafuurixxi gumma kinni eeyyunte, gammashsho, nage'a, ossa, arjumma, elle, xurameessumma 23 siggumma, ifi hira, iitta hexxeexxa yaanuwwa hoyyaanig seeri hedhebaan. 24 Yessuusi Kiristoosike kadeeki manni maala fuggoxxe isixxe gaabbenninna yortenni isinxenninni fannise'een. 25 Hafuurik he'naannechchinni Hafuurik akeekemmo!

26 Fuggoxxenni weli ke'at weli hinaafati tolnga ifi saandonnoqqe'e!