1 Ani hiyyaanee qiciqa dhaalak belti mitti annote kaddeexxa yanna feedhee qiconna karratike annanna kadoole garbichchokenaa'n gargar higaachchi hedheba'a. 2 Anni isik mureexxi yanna geltaa qico'n belti isoo ba'edhaakenna itisaake manni hundan. 3 No'onna annote kande he'nenna wodda buttixxe afo'o tiqqatixxe barachcho'a hiremmennexxi garbooletemman. 4 Yaane kinni muremeeki bari shiqee wodda Mageni belto ifika no'o'a ergeen; isi meyyaxxenaa'n ilemeexxi seerake'e ajajemaake kadeen. 5 Tenneenna asseechchi seerini hunda hedhemmakaara wodo'anna no'onna Mageniixxe oose kandannoshsha assateeten. 6 Yoona Mageniixxe oose kaddineemmaxxee Mageno, «Anke annayyoo!» hiyya'ni ye'aaka ifike beltika Hafuura qalbe no'oxe'n ergeen. 7 Tennexxee konneechinni edi'a ati Mageniike belto malee'e garbakebaan. Mageniike belto kaddeetechchi Magenkee dhaalanjon.

8 Konneechchi edi darre ha'no Mageno ege'na gophatenaa'n kexxeexxa Magenoke kadebaachcho'ni dharichcha magenuwwa'n garboolete kaddineexxi hirendineemman. 9 Ta'a kinni Mageno egendinee'en, caala Mageni ha'noo ege'nedheen; yoona la'o fulabaake konne buttike hedumiba'a mayeeta illeema higgine garboolete kadatee hassina'ne? 10 Gargar hexxeexxe barruwa'anna agenjuwwi'a baronna wogguwwaara xexxe'atati ulfesitina'nee. 11 An ha'nooxxe oddo'ni huja'n elo'ennexxi elo duuchcha tolnga gattuuni hiyyee sodaatannon.

12 Anke dayyuwwaa ani ha'nooshsha kadennaxxee ha'noonna anishshanni kadde! Hiyye'e ha'noo kadhataannen. Ha'nooqqa anee mittechchonna balleessitineba'a. 13 Taakaxxa yanna eloxxa odo ha'no'a kulanna wodda ela gonphete'n hedhennaxxa egendinee'neen. 14 Ela gonphe anxi rakkotenna kaddoole anee jibbitinebaan, yookaan diqatinebaan. Wele waalini Mageniixxa erganna adhitinammashanni assitinee anee adhdhitineen. Iittanni Yessuusi Kiristoosii'i adhdhitinemmashshanni aneenna adhdhitineen. 15 Konneechchi edi darre affineemmaxxi gammashsho haba higgee? Ookkone wodda dandeesissa'neele ille ha'nooxxa midde fulchitineexxi ani'a uutinaaxxa dhugaa kula'ennen. 16 Ha'no'ata dhugaa kuleennexxee naapha ha'noke kadenneta?

17 Iikki dharichchake kadeemmaki manni ha'noo ifibaa adhdhatee jaba qicinni hasaan; kinni eloxeeteba'a; hasiti insa'neek ha'noo no'onaa'n gargar hiisseexxi ha'noo ifike assedho'aaten. 18 Eloxxe yaane'ate kaddoole feeteexxa yanna jabaata eloxxen. Kunnu ha'nooke jabeenni kinni ani ha'noonn welti hedhanno woddike calla kaddoqqe'e! 19 Anxe oose Kiristoosi ha'noxxe hedho'n leella qico'n higgeen ha'nooxxee ciniifataanne. 20 Ha'nooxxe memmi hiyye rakkatenaxxee ta'a ha'oxxe oddo'n afemenexxi gargar hedheeke laagadinni ha'no'n haaso'aannele hittatta eeyyannata!

21 Ha'no seerinii hunda hirendine hedhatee hassinaak amme ane'n kulle seeri hiyyaachcho laqqinebaa hiyyoteeta? 22 Abirihaami'a lame oose hexxemman, mitti isi'a garbitete kaddemmaxxe Aggaarinaa'ni ilemeeke kadaa wodda weli kinni garbitete kaddebaaxxe Saaranaa'ni ilemeedheekemman. 23 Garbichotik belti maali ga'mii'ni kadaa wodda Saaraki belti kinni Mageniiba'ni uwwendeexxe addachchiisatike hiyyichchinni ilemeeken. 24 Kunninna fakkeennaken. Tinni lame melaalle lame kakoxxe fakkeennan. Taakessoxxi kako oose garbummatee ilendeemmaxxe Aggaari labbaan. Ise siinaxxe kooba'ni uwwendeemmaxxe kakoke fakkeennan. 25 Aggaari kinni Arebiinke boga'ni afendaaxxe siinaxxe koobake fakkeennan; yookaan ta'ixxe Iyyerusaaleminni weli labbaan. Ise ifixxe oosenni garbummate'n hexxaaxxen 26 Iimixxi Iyyerusaalemi kinni leexxite; isenna ama no'oxxen.

27 Tinninna kaddo'a hiyyeende borresendeema qici,

«Ati oose ilde egendeeboxxoxxi

gammadi!

Ati ilatee ciniiffatettexxi egendeeboxxoxxi

ilili hiyyi!

Aro'o affeexxe manjichcho irra

aro'o affeebaaxxi manjichcho heddo oose affe'een hiyyende'een.»

28 Anke dayyuwwa, ha'no Yisaaqishsha addachchiisatike hiyyichchixxe oosen. 29 Ookkone wodda maaliki ilemeek belti Hafuurik ilemeeka belto shorremmashsha ta'anna iitanden. 30 Yaane kinni woyyichchi maxaafi maa hiyya'nee? Maxaafi, «Garbichcho ildemmake beltinni welti anniixxa karra dhaalabaashsha garbichchotanna belti isenginninni welti fulchi?» hiyye. 31 Tennexxee anke dayyuwwa no'o leexxitetixxe oose malee'e garbichchotixxe oosebaan.