1 Milkiyaasi darree'n Isira'eelike ardibaa dageeke Duuchchi Woddike Goottik hiyyichchi konnechchi bitta hedheeken.

2 «Ani ha'noo eeyyeennen» hiyya'neen Duuchchi Woddik Gootti.

«Ha'noo kinni, ‹hitta no'oo eettette› hitineen.

«Eesaawu Ya'iqoobinge dayyomabaata?»

«Ya'iqoobii'i eeyyenne; 3 yaane kinni Eesaawu'u jibbenne;

isixxa koobuwwanna urmake asse'eennen;

Isika qadaadanna qiilla gammoojjeke jeedaluwwi'a uwwe'eennen.» ✝

4 Eedoominna, «No'ok qachchi diigeme'een, kaddo malee'e ookkonee diigemeeka hiisinee ijaarannon» hiyyaaxxe hexxeen.

Yaane kinni dada duuchcha ajajaak Duuchchi Woddik Gootti hiyya'nee qici: «Insa'ne ijaaraaxxe hexxeen; ani kinni diiganno; fuggoke boga, Duuchchi Woddik Gootti duuchchi woddi'a insa'ne'n mufateeke arda hiyyemmaan. 5 Ha'nonna tenne'e ha'noonxe illenninni uuddinaan, ‹Ha'noonna Isira'eelixxe gabala gadho Duuchchi Woddik Gootti Lumoken hitinaan!›✝

6 «Belt ifika anna garbichchikinna, ifika gootta ulfessaan. Ani annake kadennechchinni ulfaata anxita haba hexxeta? Goottake kadenechinni sodaatema anxi haba hexxeta?» hiyya'neen dada duuchcha ajajaak Duuchchi Woddik Gootti. «Tee qeese anka summa tuffachisina'neek ha'nooten.

«Ha'noonna kinni, ‹Atika summa tuffachchiinsennek hittate?› hitina'neen.

7 «Anke tolchimalcho'n battotteexxe ita shiqisinaan.

«Ha'noo kinni, ‹atee battoosineenek hittate?› hitinaan?

«Duuchchi Woddike Goottixxi qore tufatendeexxen hiyyatiten. 8 Ille ba'eeka hore tolchakee shiqishinaa wodda iitti balleessatebataa? Naafa yookaan dhukkullichcha hore tolchakee shiqisinaa wodda tinninna balleesatebaata? Ookkone ha'nooke galchalli'a shiqisatto wodda isi ate'n gammadaata? Yookaan atenaa'n adhdhaataa?» hiyya'neen Dada Duuchcha Ajajaak Duuchchi Woddik Gootti.✝

9 «Ta'a kinni no'o'a mararaashsha Duuchchi Woddika Gootta kadhatte; iitta hedheeka tolcha aaxxine shiqinaa woodda isi ha'no'n macci hiyyaata?» hiya'neen Dada Duuchcha Ajajaak Duuchchi Woddik Gootti.

10 «Anke tolchimalcho'n woyi fuldabaaxxa giira he'yishinabaashsha ha'noo giddii'ni mitti galmiinxa hula cufeelenaa! Ani ha'noo'n gammadabe'no,» hiyya'neen Dada Duuchcha Ajajaak Duuchchi Woddik Gootti; «Anga ha'nooxxenaa'ni hoone tolchanna adhdhabe'no. 11 Arishsho fuldammabaa'n e'yitamma qico'n summi ank gosa gosake arda duuchcha'n lummedhaan; summi ank gosa gosake arda duuchcha'n lumedhammaxxee duuchchiinxe bakka'n hixaanikinna luqqitte uwwa ani'a shiqqaan» hiyya'neen Dada Duuchcha Ajajaak Duuchchi Woddik Gootti.

12 «Ha'noo kinni Dada Duuchchike Goottixxi qore, ‹Battoteexxen› ita isixxinna, ‹Tuffatendeexxen› hitina'n isoo shollissineen. 13 Ha'noonna, ‹Tinni hittata kurbu assita'neexxe yaane!› hitina'n qi'mi hitineen» hiyya'neen Dada Duuchcha Ajajaaki Duuchchi Woddik Gootti.

«Ha'noo mooremeemmaka naafakanna ela gopheeka hore ani'a iyyedagineexxi uutinoole ani konneera ha'nooxxe anganaa'n adhdhannota?» hiyya'neen Duuchchi Woddik Gootti. 14 «Ani Dada Duuchchike Goottan; summi ankinna gosa gosake arda'n sodaatema hassissaake kadeennaxxee'e, hore ifik giddo buruusi hedhe'naan werreegemmaka werreega gaabbat ci'memmeeka hore Duuchchi Woddike Gootti'a tolchaak badinemeeke kadowwaal» hiyya'neen Dada Duuchcha Ajajaaki Duuchchi Woddik Gootti.