1 «Ta'anna tee qeese kunni ajaji ha'noo'aten. 2 Laqa gophphinoole qalbe ha'nooxxanna anee ulfeesatee qixxefata gohphinoole» yoona badino ha'noo'n wocci assannon: eebbisensha ha'nooxxanna badinote'n jijjiirannon ha'noonna «Anee ulfeessatee qalbe ha'nooxxa qixxeefata gophphineemmaxxee ha'noo badinendine'een hiyya'neen Dada Duuchcha Ajajaak Duuchchi Woddik Gootti.

3 «Horte ha'nooxxanna xixannon; ha'nooke tolchika cege'oo alba ha'noke'n xeerannon; ha'noonna isinninni mitteba fugussendinaan. 4 Leewwi'a aagennexxe kako'a konne ajaja ergennek ante kadeennaxxa egendinaan» hiyya'neen Dada Duuchcha Ajajaak Duuchchi Woddik Gootti.✝ 5 «Isi'a aagennexxi kako hedhotixxenna nage'iinxe kakomman; tennee hedhonna nage'a insa'ne'aa uwweennen; tinninna ani'a ulfinna iyyedagge; isinna anee ulfeesse; summa ankanna sodaataten jabaate. 6 Dhugaatixxi barachchiisa isike afo'o'n hexxemman; arrabo isikenaa'ninna dhari afemebaan; aninni welt nage'ikinna qajeelummat me'e; heddo mannanna cubbotenaa'n ille iima hiisse.

7 «Qeesichchi Dada Duuchcha Ajajaak Duuchchi Woddike Goottike erganjo kadeemmaxxee'e arrabi isiki ege'naa, mannikinna isike afo'inaa'n barachcho heqqedha hassissaan. 8 Yaane kinni ha'no ookkone oranaa'n gortine'een; ha'nooxxe barachchiissanninna heddo manni guggufataashsha assitine'een; Leewwixxi kakonna bushshaashsha assitine'een» hiyya'neen Dada Duuchcha Ajajaake Duuchchi Woddik Goott. 9 «Tennexxee ora anke'n me'a gophphineemmaxxeenna ha'nooxxe barachchiissanni gamissineemmaxxee'e ardi duuchchi edo tuffatendinaashshanna salphatinaashsha ha'noo asseenenni.»

10 No'o duuchchiingi anfeennek mitte annabaata? No'o dadeekinna mittenge Magenobaata? Weli'anni weli xuurameeyyete kada gonphe xe'yishati no'oke annuwwaxxa kako mayee diinganotaa?

11 Yihuda amanemebaan; Yihuda'ninna Iyyerusaalemi giddo diqachchiissaaxxi yaane assende'een. Yihuda alag magenixxa belto aadhati Duuchchi Woddik Gootti eyyaaka galma battoose'een. 12 Tenne assaak huuni manjinna Duuchchi Woddike Gootti'a uwwa iyyedagoolenna midde Dada Duuchcha Ajaajaak Duuchchi Woddike Gootti Ya'iqoobike duunkaaninaa'n isoo fugussaan.

13 Assitnaaxxi wele yaanee: Duuchchi Woddike Goottika tolchimalcho indiddotike assitinaan; ta'anni edi'a ha'nooxxe uwwa'n macci hiyya gophaammaxxeenna gammashshoti anga ha'nooxxenaa'n adhdha gophaammaxxee ooxxinaan; hunbaashitinaan. 14 Ha'noonna «Tinni mayee kaddee?» hitine qortinaan; tinni kaddeechchi Duuchchi Woddik Gootti atixxenna atixxe oosummati woddixxe arexxe oddo'n dhugaa kulate kadeemmaxxeeten. 15 Duuchchi Woddik Gootti insa'nee mitteke assemmabaata? Insa'ne maalikinna hafuurik isiken; mayeete insa'nee mitteke asseechchi? Mageniinxa soda'a affeexxa horte hasa'neemmaxxeeten. Tennexxee hafuura ha'nooka heqqedhdhe; ha'nooxxe oosummatixxe are'aa affineemmaxxa xuurameessumma xe'yishshinoqqe'e.

16 «Ani weli tikate gibanno» hiyya'neen Duuchchi Woddik Gootti Isira'eelik Magen; «Manji seemmati ifi buqammashsha xaqarotti ifi buqa* manjiinxe gibannon,» hiyya'neen dada duuchcha ajajaak Duuchchi Woddik Gootti.

Tennexxee xuurameesumma ha'nooxxi xe'yitabaashsha hafuura ha'nooka heqqedhdhe.

17 Duuchchi Woddik Gootta haaso'a ha'nookenni ko'wisine'een.

Ha'noonna, «Hitta isoo ko'winsenne?» hitinaan.

«Fuggoxxa assaak duuchchi, Duuchchi Woddike Gootti edo eloken» isinna fuggaaleeyyete'n gammadaan.

Yookaan «Dhugaa muraak Mageni haba hedhee?» hitine qoratiten.