1 «Kunnise, ani'a ora qixxeessaaka anka erganjo ergona'aten; halchitina'neek Dada Duuchchi Gootti galma ifikibaa dedhange dagaan; iso'n gammaddinaak eettene kakok erganji dagaan» hiyya'neen Dada Duuchcha Ajajaak Duuchchi Woddik Gootti.

2 Yaane kinni isi baqissammaxxe giirashsha yookaan anshatike saamunishshate kaddeemmaxxee isixxe dagaxxa barra dande'aak ayyete? Lufi hiyyaaxxa yanna uurraak ayyetee?✝ 3 Isinna birretika sibilo baqiseexxi luqqaasammake manjishsha ofo'laan; Leewwitotanna baqiseexxi worqetishanna birretike sibilishsha luqqi assaan. Ookkonneechchi uduma uwwa qullummati shiqishaaka manna Duuchchi Woddik Gootti afaan. 4 Yihudaxxinna Iyyerusaalemixxi uwwaarinna saxxeexxe wogguwwashanna edike baruwwishsha Duuchchi Woddike Gootta'n adhdhendaaxxe kadda.

5 «Tennexxe ani murtetee ha'nooba dagannon; gojaaleeyyete'n, yabaabulake'n, dharik kakataakeera'n, hujaluwwiinka runda hoyyedhaakeera'n, aro'o affebaaxxaranna anna ama afebaaka miicaakeera'n, alagi mannixxa dhugaa dassaakeera'ninna aneenna sodatabaakeera'n rake dhugaa kulannon» hiyya'neen Dada Duuchcha Ajajaak Duuchchi Woddik Gootti.

6 «Ani Duuchchi Woddik Gootti jijjiiremannokebaan; tennexxee ha'noo Ya'iqoobixxe hortee baxxineexxeba'a. 7 Ha'nooke annuwwixxe yannanaa'ni anke seruwwinaa'n illee iima higgine'een, heqqexxinebaan; anibaanna higge, Aninna ha'noobaa higannon» hiyya'neen Dada Duuchcha Ajajaak Duuchchi Woddik Gootti.

«Ha'noonna ‹Hingannok hittatee?› hitinaan.

8 «Manji isi Mageno mooraachcho? Ha'noo anee moortine'een.

«Ha'noonna ‹Hittaa atee moorranno?› hitinaan.

«Tommittetinna uwwatiten. 9 Ha'noo, kunni ha'nook ardi duuchchi anee moortinaammaxxee'e badindineeken. 10 Mine anke'n ita hexxo'aa, tommitte duuchcha gootarake'n aasse; tenneninna anee hega uudde» hiyya'neen Dada Duuchcha Ajajaak Duuchchi Woddik Gootti. «Iimuwwatixxa masikootuwwanna banabe'noxxa, uggudhitinaaxxa bakka gophinaa qici'a bira saxxeexxa eebbanna ha'no'a duna gophannoxxa udde.✝ 11 Ha'nooxxa midha daamili itabaashsha hoyyannon; ha'nooke fichcha'n hedheek woyinetik hiddichchinna doomaba'a» hiyya'neen Dada Duuchcha Ajajaak Duuchchi Woddike Gootti. 12 «Ookkonneechchi uduma gammashshotike boga kaddinaammaxxe'e gosa gosak ardi duuchchi eebbisemeeke arda hiyye ha'noo ye'aan» hiyya'neen Dada Duuchcha Ajajaake Duuchchi Woddik Gootti.

13 «Dhankaaka afo'o ane'ni fulchexxine'een» hiyya'neen Duuchchi Woddik Gootti.

«Ha'noo kinni, ‹Ate'ni maa hine haasonnene?› hitine'een.

14 «Ha'noonna hitinee qici ‹Mageno ergata woyifuldabaan; isi hasaaxxa duuchcha assatinna Dada Duuchcha Ajajaak Duuchchi Woddike Gootti edo yaadeke mannishsha he'nee mammaremati maa lephphinnenne? 15 Ta'a kinni no'o ifi dukakaara eebbisemeekeeran hinaanne; fuggoxxa assaakiir ti'ni hiyya; Mageno hega uudaakirrinna fula.› »

16 Ookkone wodda Duuchchi Woddika Gootta sodaataak manni welti haaso'e; Duuchchi Woddik Goottinna laqe caqase; Duuchchi Woddika Gootta sodaatakeeri'a summa isikanna ulfeessakeeri'a isi edo qalliitik maxaafi borreesseme.

17 «Ani hujannoxxa barra insa'ne anxe karra kandaan» hiyya'neen Dada Duuchcha Ajajaaki Duuchchi Woddik Gootti; anni isoo ergataammake belti'a mararammashsha aninna insa'ne'a mararanno. 18 Eettene yannanna langaxxa qulliyye mannixxe'ninna fuggichchi mannixxe oddo'n, Mageno ergatammaake mannixxe'ninna ergatammabaake mannixxe oddo'n hexxeexxa gargarumma uuddinaan.