1 Na'oomi aro'o isekee Ebemeleki'a aanteti shiqaaka Bo'eezite hinaaka dureessanna shiqika fira affeemman. 2 Mitte barra Mo'aabichcho Ruuti Na'oomii «Heqqi midha haamammake manjike fichchiba maro; dedha ani'a marare deegge qocedhi hiyyaaka manjo gophabo'noni» hite; Na'oominna «Marte qocexxaata anxe belto!» Hite.✝

3 Tennexxe Ruutinna fichchuwwiinbaa marteexxi haamammake mannixxa duuka angatenaa'n ibbammaxxa deegge qocexxa'nemman; egendebaangi qocexxa'nemmaki fichchi kunni Ebemelek firike Bo'eezike fichchamman. 4 Eettene yanna'n Bo'eezi Beeteliheemii'n ke'eexxi fichchiinba'a dage; haamammaka manna «Nage'inginni hossine! Duuchchi Woddik Gootti ha'noonni welti hedhowwaa!» Hiyye.

Insa'nenna «Duuchchi Woddik Gootti atee eebbiso'o!» Hine.

5 Ookkoneechchi uduma Bo'eezi haamammake manni'a umoke kadeemmaka «Itti ka'untichcho belto ayyixxe?» Hiyye qore.

6 Manjichchikinna «Ise Na'oominni welti Mo'aabike boganaa'ni daggeexxe Mo'aabichchon; 7 Isenna haamammake manni udu'mii'ni me'ita'ni ibbemmaxxa deegge qocexxo'a anee laqqeen; gorsinaa'n ta'i qico'ni qocexxa'nemman; ta'a kinni shiixxo qico hafuura adhdhito'a fooqi giddo ofolde'een» hiyye hiisse.

8 Eettene yanna'ni Bo'eezi Ruutii'i «Tee belto! Hiyyaanexa laqi; kaba haanda'neexxe melaallexxa duuka me'ita'ni qocedhi malee konne fichcha waalde wele fichchibaa me'itoxxee. 9 Melaalle hoone ga'manaa'n haanda'neexxa uudda'n insa'ne callinni hedhi. Kaba haama'neeki labballi atee rakkisabaashsha jabeesse kuleennen; wode'e dheebottotole odolchote'ni wonshine ugginemmaka marta'ni ibilsita'ni ha'wi» hiyye. 10 Eettene yanna'ni Ruutinna albik buttinna tuqqa qico'n heeshshi hite, Bo'eezii «Konne qico ani'a hedde rakkattaateki mayeete? Wele bogixxe manjo kade ati edo ulfinna alifonaa hitta dande'eene?» Hite.

11 Bo'eezinna «Aro'i atik reyeechchi uduma atixxe ballo'a assitettexxa eloxxa yaane duuchcha laqeenen; iittanni kinni anna atikanna ama atixxa, ilendetteka boga atika waalde konnechchi edi ga'ma egendeboxxoke ardinni welti hexxottaa daggetexxa ege'neennen. 12 Hujjetexxe eloxxe huje duuchchika hira Duuchchi Woddik Gootti ati'aa uwwo. Qarqaarsa isika addateettexxi daggetaki Isira'eelik Duuchchi Woddik Gootti Mageni hira atik bira sa'aashsha atee eebbisowwaal» hiyyeexxi hiisse.

13 Ruutinna «Anke gootta! Fedhee qiconna mine atike'ni hujammaxxe melaale giddii'ni mittetishsha uudama gophoo'nolna lumoshsha ani'a atixxe erganjo'a arjoondetexxi eloke atike haaso'inni anee dayyeesiteeten» hite.

14 Dhiyaana indammaxxe yanna'n Bo'eez Ruutii «Amo qoreti biri'a shikki hite; kebbo adhdhitetexxi woxeeti bookkitta'ni iti» hiyye. Isenna midha haamammake mannini welti ofolde; Bo'eezinna anneeka deeddamo uwwe; isenna goddita qico'n itte; itattanna itte gophphee'naa gatteeman. 15 Ruutinna higgeenni qocexxo'a kexxee wodda Bo'eezi haamammaka manna, «Ladde hoyyendebaang oddo oddote'ninna saxxa'n qocexxuun hoyyitinoqqen; 16 Matanga usurtineemmaxxe ladduwwanaa'n luqqisina'ni waaldinaa'naa qocexxuun» hiyye.

17 Tennexxe Ruutinna qocexxa'n hossemmaxxa deegge uxxitee wodda lame gimbe kadde.

18 Midha ba'exxe qachchi giddi'a higge; isenna hittee qicika qocceexxa ballo isexxee'e leellishshe. Ittanni barra itte gophphee'na gattemmaxxa itanna uute. 19 Na'oominna «Tenne midha duuchcha habaa'n qoccette? Qocca'ni hosseteki fichchi ayyike? Tenne eloxxa ati'a asseeka manjo Mageni iso eebbiso» hite.

Ruutinna «Ani qoca'ni hoseenneke fichchiik anni Bo'eezite hinaaken» hite ballote'n kulde.

20 Na'oominna «Hedheekeenna reyeeke uwweexxa adde muuxaak dada duuchchik Duuchchi Woddik Gootti Bo'eezii eebbisowwaal!» Hite; higgeenna «Ikki manjichchiqqa no'o'a shiqixxe aante kademmaxxee no'oo gargaaraan hinannoke firanaa'ni mitteke» hite.✝

21 Ookkoneechchi uduma Mo'aabichcho Ruuti «Duuchchiinxe iimi gama anee mambe'a assiteexxi midha haamme bukki assina qico'n haamammake manni birii'n gattebo'nongi deegge qocedhannoshsha kuleexxen» hite.

22 Na'oominna Ruutii'i «Anxe belto dhugaate hiteten! Bo'eezike fichcha'n hujjaammaxxe melaalluwwaxxa duuka me'ita'ni qocexxotole woyyan; wele manjike fichchibaa me'itetexxe kaddoole akimagaada ka'um atee rakkisaan» hite. 23 Tennexxe Ruuti so'akanna dinne fichchakenaa'n haammende bukki hitaa qico'n Bo'eezixxe garbitte bira haandammaxxe melaallen welti me'ita'n deegge qocexxa'n turitteen; isenna ballo isexxe Na'oomi birii'ni gargariti higgebaang isenni mitteba hexxaamman.