1 Bo'eezi qachchiinii qarqara hexxemmaxxe songoba mare ofo'le. Ookko'ni Bo'eezi Ruuti'ni kulemmak Abemeelekiki shiqik firi Bo'eezi ofo'leebaa dage; Bo'eezinna summik ye'eexxi «Amo ani bira ofo'li» hiyye. Isinna isi bira mare ofo'le. 2 Ookkoneechchi uduma Bo'eezi geedhe giddii'ni tomme geedhe fi'leexxi ofoldaashsha asse; insa'nenna ofollee wodda; 3 Bo'eezi ookkone aanteti shiqammaka manjichcho «Na'oomi kunni Mo'aabike boganaa'ni higge dagge'een; Abemelek fira no'okika fichchanna gurgurto'aten; 4 Tinni yaane atee uuddaxxen; tennexxee konne fichcha hassaattole tenne kaba ofoldeexxe geedhe edo gatilsi; hasa gophphaattole kinni ane'ni kuli; tenne hiyyannechchi fichchaa gatilsitota'a seeri uwweeki ati'aaten; ati gatilsa gophphaattole seeri uwwaaki ani'aaten» hiyye.

Manjichchikinna «Aninni gatilsannon» hiyye. 5 Bo'eezinna «Eloxxen yaane kinni Na'oominaa'n fichcha gatilsitaatole reyemakiki summi ba'abaashsha eettene aro'i reyee'na Mo'aabike boganaa'ni daggemmaxxa Ruutiinna dhaaliyyo hassissaan» hiyye.

6 Manjichchikinna «Iittate kaddoole fichchi kunni dokko anxe oose'a kada gophphaammaxxee'e gatilsabo'non atinni gatilsi» hiyye.

7 Ookkone baro'n Isira'eelike ardike galdummishsha hidhdhaakinna gurguraak iittanni afeexxa karra welekee uwwaak uwweexxa yookaan gurgureexxa ege'nishaatee kophe lekkate'naa'ni fulche hidhdhemmakee uwwaamman; tinninna Isira'eelike ardi'a gurgureexxanna hidhdheexxa kokeessatishshaten.

8 Tennexxe manjichchinna Bo'eezii «Atinni gatilsi» hiyyee kophe lekka ifixxenaa'ni fulcheexxi Bo'eezi'a uwwe.✝ 9 Ookkoneechchi uduma Bo'eezi geedhettanna ookko ofo'leemmaka manna duuchcha, «Yooni Ebemelekixxanna oose isixxe Kelewoonixxaanna Mahiloonixxa karra duuchcha Na'oominaa'n telcho dhaaleennexxa ha'no duuchchiniingi dhugaaten; 10 Iittanni ookkone reyemmake Mahiloonixxa are Mo'aabichcho Ruutii'i dhaaleennen; tinninna karra gadhi'a fuldabaashshanna summi isik ye'ema'n hedhaashsha assitaan; tenne duuchchi'a techcho ha'no dhugaaten» hiyye.✝

11 Ookkoneechchi uduma geedhettinna ookko hedheemmak manni duuchchi hiyyee qici, «No'o tenne duuchchi'a dhugaaten; Duuchchi Woddik Gootti tenne dhaaldaattexxa manjichcho Isira'eelika mine mittumat hujjeexxe Raaheelishshanna Liiyashsha isee'e assowwaal. Ateenna Efiraatake bogaa'ni duroonso'o; Beetelihemi'ninna gurri atik laqemaake manjo asso'o.✝ 12 Duuchchi Woddik Gootti tinni ka'untichcho belto ati'a ildaaxxa oose eebbiso; mini hado atika Ti'imaari Yihuda'a ildemake Faareesike mini hadishsha assowwaal» hine.✝

13 Konne qicinni Bo'eezi Ruutii'i dhaale; Duuchchi Woddik Gootti isee eebbisemmaxxee iikki woddi siila'wite labba belto ilde. 14 Ookkone olla'ixxi melaalle Na'oomii'i «Atee akkisaaka akka'o ati'a uwweeka Duuchchi Woddik Gootta galati geyoo! Konne beltonna Duuchchi Woddik Gootti Isira'eeli'ni gurriinke asso'o! 15 Belti atikixxi beltto Ruuti lumoshsha atee eeta'neen; torbaane labbaxxi oose assitaa iimi gama saxxeexxa lumoxxa yaane ise ati'a assite'een; ta'anna kinni gammachchiisaakanna cindatto wodda atee akkisaaka labbaka belto ati'a ildeen» hite.

16 Na'oominna anno tenne iseke finnishsha assitee adhdhite luu'mexxe lumoke kookkishshinni nossite.

17 Olla'iinxi melaalle annotika summa Iyyobeedi hite fulchite; «Na'oomi'a labba belti ilemeen» hita'ni manjo duuchcha'n odeessite.

Moyanjo Daawwitika anna Isseyii'i ilaak Iyyobeediten.

18 Faareesinaa'ni Daawwiti qico'ni hexxeexxa horte: Faareesi Hetsiroonii'i i'le; 19 Hetsirooni Aaramii i'le; Aarami Aminaadaabi i'le; 20 Aminaadaabi Ne'aasooni i'le; Ne'aasooninna Selimoonii'i ile; 21 Selimooninna Bo'eezi i'le; Bo'eezi Iyyobeedii'i i'le; 22 Iyyobeedi Isseyii'i i'le; Isseyyinna Daawwitii'i i'le.