1 Isira'eeli'i Efireemike minik ardi hedhaammake koobuwwatike boga'n Raama hiyyemmamke qachchi giddo Isira'eeli'i Gaadike miniki Hilqaana hiyyemaake manjo hedhemman; isiki anninna Yirohaam hiyyemaake Elihuke beltike belto kadaa wodda, Elihu Toohuki belti kinni Tsufike beltike beltomman. 2 Hilqaananna lame melaalle Haannanna Finiina hiyyendaaxxe afe'emman; Finiina oosetixxe amamman; Haanna kinni ila affe'emmabaan.

3 Hilqananna kunni wogga wogga'ninni Dada Duuchcha Ajajaake Duuchchi Woddika Gootta magenoonfato'anna tolcha shiqisho'a alalle Seelo'a me'a'nemmaan; ookkone baro'ni Hofiininna Finihaasi hiyyendaaxi Eelixxi lame labbaxxi oose qeesolete kaddeexxi Seelo Duuchchi Woddike Gootti'a ergatenda'emman. 4 Hilqaana tolcha shiqishammaxxi yanna geltaa wodda duuchcha tolchinke maalanaa'n mitte qoobbo Finiina'a uwwa'emman; iittanni mitte mittende isexxe labbaxxenna meyyaxxe oose'anna mitte mitte qoobbo uwwa'nemman. 5 Haannaa'a yo'oshsha eeyya'emmaxxee lame anga qoobbo ise'a uwwa'nemman; Duuchchi Woddik Goottinna ise'a ila hoyyedhemmaxxee ilde egendebaan. 6 Duuchchi Woddik Gootti Haanna'a ila hoyyedhemmaxxee gina isexxi Finiina isee miita'ni yo'oshsha mufachchiissa'emman. 7 Tinni yaane wogga wogga'ninni duuchchi wodda kada'emmaxxee yaanemman; Duuchchi Woddike Goottike miniba'a Haanna marteexxe yanna duuchcha ooxxa'n ita gibaa qico'n Finiina isee miita'n yo'oshsha mufachchiisa'emman. 8 Tennenaa'ni kexxeexxa aro'i iseki Hilqaana isee «Tee Haannaa! Mayyee ooxxato? Mayyee ita gibbatto? Mayyeete duuchchi wodda konne qico yaaddattochchi? Tomme labbaxxe oosenaa'n ati'a anee woyyabaa?» Hiyya'nemman.

9 Seelo tolcha tolchine ke'nexxi inde ha'winechchi uduma Haanna kexxe uurrite; qeesichchi Eelinna Duuchchi Woddike Goottike galmixxe* hula bira ofo'lemman. 10 Issenna godobi giddo gubatemmaxxee hinqiffatee ooxxa'n Duuchchi Woddika Gootta soodatte. 11 Haannanna hiteexxi werreeggee qici, «Ee, Dada Duuchcha Ajajaatoke Duuchchi Woddike Goottaa! Anee atixxe erganjoka salphinne uudi! Rakko anxanna affetexxi anee dedhagophe'e, mitte labbaka belto ani'a uutottole, aninna baro isika duuchcha ati'a gargar foyyemeeke kadaashsha assannon; umo isikanna haado tuqqabaan» hitte.✝

12 Haannanna konne qicinni Duuchchi Woddika Gootta soodachcho qeerriseexxi lumoxxa yanna turtemmaxxee, Eeli isee afo'i giddo uda'nemman. 13 Haannanna hafuura iseki laqemebaang suume calli le'mitaana'a godobik soodata'ammaxxee Eeli'n ha'wite machchoteechcho labbe. 14 Eelinna, «Machche tinni atenaa'n baxxabaaki haani qico'nite? Tenne atixxa machche qiidiffati!» Hiyye.

15 Issenna iso'n hiissitee haasotee hitee qici: «Anke gootta ani jabaxxe rakko afe'nexxe manjon; woyinetixxa booka yoakani machchessaaka ha'wo ha'webe'noni; yaane kinni anxa godobixxa rakko Duuchchi Woddike Gootta'n ku'la'neten. 16 Anee erganjo atixxa wayi fuldabaaxxe manjoshsha anee uuddoxxe'e; konne qico soodachcho qeerriseennechch rakkonna abara uudennexxe manjo kadennexxeeten» hitte.

17 Eelinna «Yaddobelo me'i! Isira'eeliki Mageni ati isoo soodatettexxa ati'a uwwoo!» Hiyye. 18 Isenna «Soodachcho atixxenni anee erganjo atixxa duuchchi wodda qabataata!» Hite. Ookko'ni kexxe me'iteexxi itte ha'wite, yaddotanna waalde.

19 Langa baro gorsa Hilqaananna isiki mini hadi Duuchchi Woddike Gootti'a sagadeechchi uduma ifike minibaa Raama'a me'ine; Hilqaananna Haanna'a are ifixxeni welti diiphe; Duuchchi Woddiki Goottinna ise qaabate'naa; 20 sila'witexxi labbaka belto ilde. «Isenna Duuchchi Woddika Gootta soodate alfenneken» hita'n summa isika Saamu'eeli hite fulchite.

21 Hilqaananna ifike mini hadinni welti woggatiika tolchanna wereega Duuchchi Woddike Gootti'a uwwo'a alalle Seelo'a me'e. 22 «Belti ununa walee'naa baro isika duuchcha ookko hedho'a Duuchchi Woddike Gootti edo iyyemare isoo uwwannon» hiteexxi aro'oke'n kuldemmaxxe eettene yanna ise insa'nen welti me'iteba'a.

23 Hilqaananna «Eloxxenni, eldaan hitattoxxa assi; belti ununa wala qico'n minenni ofo'li; Duuchchi Woddik Gootti ate'n addachchiise haaso'emmaka ifika hiyyichcho ati'a muoxo'o» hiyye. Tennexxee Haanna belti ununa wala qicon minenni ofoolideexxi belto nossexxammani.

24 Belti ununa waale uduma sase wooggaka jibbichcha, tomme kiillo bullenna, mitte qaliqallo woyinetika bulbulo aaxeexxi belto ifika alalle Seelo hedheeke Duuchchi Woddike Goottike mine'n iyyemarte; ookkone wodda Samu'eeli shiixxonge beltomman. 25 Jibbichchakanna duleechchi uduma beltokanna Eelibaa iyyemarre. 26 Hannanna Eeli'a hitee qici, «Anike gootta, atixxe lubbo! Mittele ati edo uurritexxe Duuchchi Woddika Gootta soodata'emmaxxi manjichcho itti anten. 27 Duuchchi Woddika Gootta soodate'na'a kunni ani'a uwweeke belton; isoo laqennashshanni konne belto ani'a uwweene. 28 Tennexxee ani ta'a isoo Duuchchi Woddike Gootti'a uwwe'enne; isinna hedhaake baro duuchcha'n Duuchchi Woddike Gootti'a uwwemeeke» kadaan hite. Isinna eettene bakka'n Duuchchi Woddika Gootta sagade.