1 Filisixeemik manni Qe'iilaka qachcha loleexxi oodde giddi'n midha saame adhdheexxa Daawwiti laqe. 2 Tennexxe Daawwiti Duuchchi Woddika Gootta, «Filisixxeemika manna mare loloo?» Hiyye Mageno laqe.

Duuchchi Woddiki Goottinna «Eetti! Filisixxeemika manna loldee Qe'iilaka qachcha anjiri» hiyye haaso'e.

3 Yaane kinni Daawwitinni hedhemmak manni, «Kaba Yihudake boga'n he'nanno woddanni sodaanta'ennen; ta'ata Qe'iila'aa me'ine Filisixxeemika lolinka manna lollonnolefa'i caala shoonkannon» hiyye. 4 Tennenaa'n kexxeexxa Daawwiti higgeeni Duuchchi Woddika Gootta laqe; Duuchchi Woddiki Goottinna, «Ani Filisixxeemika manna anga atixxe'n sa'isse uwwaannaxxee martettexxi Qe'iilaka qachcha loli» hiyye. 5 Tennexxe Daawwitinna isinni welti hedhemmak manni Qe'iila marreexxi Filisixxeemika manna lolle miine; insa'ne giddi'inna heddo manna shinneexxi lalokanna gedhebo insa'neeka boojine adhdhine; konneqicini Daawwiti Qi'iilake qachchika arda anjire.

6 Abemelek belti Abiyataari Daawwitbaa Qe'iila'a baaje me'ee wodda Efuudii'i adhdhe me'emman.

7 Sa'ooli, Daawwiti Qe'iila hinaaba dageexxa laqeexxi, «Daawwiti, qachcha dalla'i kinjik ijaaremeeke hulatinna sibilike danqaresanjinni e'yate hiyyo anga ifixxa fonxoro giddo ifi usuratishshate kaddeemmaxxee Mageni isoo anga anxe'n sa'isse uwwo'aten» Sa'ooli hiyye. 8 Tennexxe Sa'ooli ifika lolinka manna ye'eexxi Qe'iilake qachcha'ni duulexxi Daawwitinna isinni welti hedhemmaka manna oddote'n bunqaashsha ajaje.

9 Daawwitinna Sa'ooli iso'ni fuggoxxa hedeexxa laqeexxi qeesichcho Abiyataarii'i, «Efuude kaba'a iyyedagi!» Hiyye. 10 Ookkoneechchi uduma Daawwiti hiyye soodatee qici, «Duuchchi Woddike Gootta Isira'eelike Magenoo! Anee atike erganjixxe buuto'a Sa'ooli dageexxi Qe'iilaka qachcha balleesso'a mudhdheexxa laqeennen. 11 Iitta kaddoole Qe'iilake qachchik manni anee Sa'oolixxe anga'n sa'isse uwwaaxxi hexxee? Laqenneshshann Sa'ooli kabaa daga'neexxi dhugande? Koo Duuchchi Woddike Gootta Isira'eelike Magenoo! Ane atike garbichchi'a hiissichcho uutota'a atee soodata'ennen!» Hiyye.

Duuchchi Woddik Goottinna «Eetti Sa'oolixxi daga dhugaaten» hiyye haaso'e.

12 Daawwitinna higgenna, «Qe'iilake qachchiki manni aneenna aninni welti dheeka manna Sa'oolixxe anga'n sa'isse'e uwwaa?» Hiyye soodate.

Duuchchi Woddik Goottinna, «Eetti ha'noo sa'issine'e unaan» hiyye hiisse.

13 Tennexxe Daawwitinna isinni welt hedhemmak jaane dhibba kadaak manni Qe'iilake qachchinaa'n fulleexxi, mitte boonchibaa wele boonchibaa me'inaamman. Sa'oolinna Daawwiti Aqiilaa'ni baaje me'eexxa laqeexxa yanna Aqiila'a dagaammaxxa waale.

14 Daawwiti Ziifixxe qilla gammoojje bira hedheeke kooba callike boga'n wolo'oti giddo hedha'emman. Sa'ooli iso'a afo'a duuchhci wodda hasa'emman; yaane kinni Mageni Daawwiti'i Sa'oolixxe anga'n sa'isse uwwebaan; 15 Daawwitinna Sa'ooli isoo shiyo'a daga'neexxa ege'ne.

Daawwiti Ziifi bira hexxeexxe qiilla gammoojje bogi giddo Horeeshi hiyyemaaba hedhemman. 16 Sa'oolik belti Yoonataani Daawwiti hedheemmabaa Horeeshi mareexxi addete'ni jabaataashsha Mageniinke summinni jajjabeessa'ni, 17 «Sodaattoxxe anni ankixxi Sa'oolixxi anga ate'e tuqqabaan, ati Isira'eelike moyanjo kaddee'naa ani ate'ni aanee langake kadannoxxa tennee anni anki Sa'ooli midde ege'ne'een.» 18 Tennexxe lamingi Duuchchi Woddike Goottike summinni jaalummati weli aange; ookkoneechchi uduma Daawwiti ookko Horeeshi ofo'le. Yoonataaninna ifike minibaa illee iima hige me'e.✝

19 Ziifike qachchike manninaa'n kadeek manni Sa'ooli hedheeba Gibi'a mare iso'o'n hiyyee qici, «Daawwiti no'oke bogi giddo Yihudixxe qiilla gammoojjenaa'n bita'i darre'n hexxeexxe Hakkilaxxe kooba hana Horeeshixxe wolo'o giddo sho'omee hedheen. 20 Koo moyanjo, ati eetettexxe yanna'n dagan calla dagi no'o iso'o atee moynjixxe anga'n sa'issine uunannon.»

21 Sa'oolinna insa'ne'aa hiyye hiisee qici, «Ani'a quuqendineexxee Duuchchi Woddik Gootti ha'noo eebbiso'o! 22 Ta'anna higgeenna martine'e kokke; haba hedha'neexxanna Daawwiti ayyi ookko afeexxanna wo'me; isi yo'oshsha qaarontichchake kadeexxa laqe'eennen. 23 Isi sho'omaaba duuchchara hubattine affe; ca'ite odo aaxxineexxi aniba'a illee iima higge; ookkonechchin uduma aninna ha'noonni welti me'annon; ookkone loola'n hedheexxe kaddoole Yihudake bogi duuchchi giddo file findige e'yeexxe bale giddo eyee isoo fulchannon.»

24 Tennexxe insa'ne Sa'ooli'a me'atee ke'ebaa edi darre Ziifi'a illee iima hinge; eettene yanna Daawwiti ifike loliinke manninni welti Yihudixxe qiilla gammoojjenaa'n bita'i darre'n Areba giddo hexxeexxe Ma'oonixxe qiilla gammoojje giddo hedhemman. 25 Sa'oolinna isiki loliinki manni Daawwiti'i shorratee ke'ne fule me'ine; Daawwitinna tenne laqemmaxxee Ma'oonixxe qiilla gammoojje'n kino bira sa'eeke mitte tullichcha'n ofo'le; Sa'oolinna tenne laqeexxi Daawwiti'i shorrishate'ni ke'e. 26 Sa'oolinna isiki loliinki manni ookkone tulchibaa'ni mitte darre'n me'inee wodda, Daawwitinna isiki loliink manni tullichchii darree'n. Sa'ooli'ninna isik loliinki manni Daawwitinna ifika loliinka manna bunqeemmaxxee, Daawiti Sa'ooli edii'ni baajate'ni hedhemman. 27 Ergemeek Sa'ooli'i, «Filisixeemito arda lolate'ni hexxeemmaxxee ta'a tennee illee iima higge dagi!» Hiyye. 28 Tennexxe Sa'ooli Daawwiti'i shorra waaleexxi Filisixxeemika manna lolo'a illee iima wirri hiyye hige. Tennexxeetemmanni eettene bakkaki summi «Gargar higati kinjo» hiyyemeeki. 29 Daawwitinna ookko'n ke'eexxi sho'ome hedhemmaba Eenigaadi hiyyemaaba'a me'e.