1 Duuchchi Woddik Gootti Saamu'eelii'i, «Isira'eeli'n Moyanjummati hedhabaashsha Sa'ooli'i gibennekee ati isi'a haani qico'n ooxxa'n hexxato? Ejeerisiinxa zayite buudate'ni wonshitettexxi Beeteliheemi hedhdhaake Isseyiba mari; ani oose isixxi gidi'ni mitti moyaanjoke kadaashsha fileennen» hiyye.

2 Saamu'eelinna «Tennee laqoole Sa'ooli anee shiyaan; hittata mara dande'anno?» hiyye qore.

Duuchchi Woddik Goottinna, «Mitte raada aaxxe marte'e ‹Duuchchi Woddike Gootti'a tolchona'a dageennen› hiyyi. 3 Tolchiinba'anna dago'a Isseyii'i ye'i; aninna ati maa assitattoxxa ate'n kulannon; ani hariiri hiyyannoka manjichchonna hariite moyashsha assitaatton.»

4 Saamu'eelinna Duuchchi Woddik Gootti ajajeexxa asso'a Beetelihemi'a mare; ookko geyeeshshaanni qachchinki akeekisanjuwi sodaate culphise Saamu'eeliba'a mareexxi «Elonxe daggete?» hiyye qorre.

5 Saamu'eelinna, «Eett! Eloxeenden; ani Duuchchi Woddike Gootti'a tolchona'a dageennen; ifi woyyoonsitine'e aniba'a amme» hiyye hiisse insa'ne'n haaso'e. Saamu'eelinna Isseyinna Isseyixxa labbaxxe oose woyyonseexxi tolchinba'a insa'nee ye'e.

6 Ookko genne wodda Saamu'eeli Isseyyixxe labbaxxe oose giddi'n Eli'aabite hiyyemaaka belto uudeexxi «Kunni manjichchi kaba Duuchchi Woddike Gootti edo uurre'eki isi, dhugaandin moyanjummati fileme'eeken» hiyye hede. 7 Yaane kinni Duuchchi Woddik Goottinna Saamu'eeli'i «Eli'aabixxe Ejjumaka qeerinenna isixxe bifaxxa biifa uuddoxxee; ani isoo tuffate'ennen; ani uudannok manji uudashshatebaan; manji albake uudaan Duuchchi Woddik Gootti kinni godoba hexxeexxe uudaan» hiyye.

8 Ookkoneechchi uduma Isseyi Abinadaab hiyyemaaka ifika belto ye'exxi Saamu'eeli edo shiqaashsha asse. Saamu'eeli kinni, «Konnenna Duuchchi Woddik Gootti file'ekebaan» hiyye. 9 Ookkoneechchi udumanna Isseyi Saama hiyyemaaka ifika belto shiqaashsha asse; Saamu'eeli kinni «Konnenna Duuchchi Woddik Gootti file'eekebaan» hiyye. 10 Konne qicin Isseyi ifixxa labbaxxa toorbaanixxa oose Samu'eeli edo shiqishe; Saamu'eelinna Isseyyii «Tenne atixxe labbaxxe oose giddi'n Duuchchi Woddik Gootti mittekanna filebaan» hiyye. 11 Saamuee'linna Isseyi'i, «Atixxi labbaxxi oose yoona tennendee?» hiyye qore.

Isseyyina «Maa'nichchi hedheen; kinni isi gedhebo allaletee me'een» hiyye.

Saamu'eelinna «Isiba'a manjo ergte dagaashsha assi; isi dagaaxxe offollabe'non» hiyye. 12 Tennexxe Isseyyi manjo ergeexxi dagaashsha asse; isi daayyake, dhagga biifaakenna ille giddo kololotishsha hedheeke dargageessamman; Duuchchi Woddik Goottinna Saamu'eeli'i, «Fileenneki konneten, kexxettexxi isoo hariir!» hiyye. 13 Saamu'eelinna ejersiixxi zayiite hexxemmaxxa buuda aadhexxi Daawwiti'i, isike dayyuwwi edo hariire; iikki woddi Duuchchi Woddike Gootti Hafuuri Daawwiti'n hunnati dage; ookkoneechchi uduma Saamu'eeli ifike minibaa Raama'a illee iima hige.

14 Duuchchi Woddike Goottiki Hafuuri Sa'oolinaa'n gargari higemmaaxxe Duuchchi Woddike Gootti ergemmak fuggichchi hafuuri isoo wixxirri assaamman. 15 Sa'ooli'a erganjuwwinna Sa'ooli'i hiyyee qici, «Kunni Magenibaa'n ergemeeki fuggooki hafuuri atee wixxirri assaani; 16 Tennexxe no'oke moyanjoo! Kiraara gana ege'ne'eeka manjo hanse ati'a iyyedangannoshsha mitte atika erganjo ajaji; ookkoneechchi uduma iikki fuggichchi hafuuri ate'n dagaa wodda iikki manjichchi ati'a kiraara ganaan, atinna fayyake kaddaton.»

17 Sa'oolinna ifika erganjuwwa, «Kiraara elo qico gane ege'neeka manjo ani'a hassine iyyedagge» hiyye.

18 Isike erganjuwwi giddi'n mitti, «Kiraara elo qico gana ege'neeka Beeteliheemi qachchi giddo hedhaammake Isseyika belto afeennen; isi jannake, dhagga biifake, jabake lolinke manjonna haaso'a ege'neeken; Duuchchi Woddik Goottinna isinni welti hedheeke manjon» hiyye.

19 Tennexxe Sa'ooli Isseyibaa manjo ergeexxi, «Atika belto, gedhebo alalammaka Daawwiti'i anibaa ergi» hiyye. 20 Isseyinna buddeenakanna qalqallo wo'ma woyinetixxa booka aadhee harrete'n fe'eexxi Daawwitinni mitte re'etika buruusin welti Sa'ooli'a erge. 21 Daawwitinna Sa'ooliba'a dageexxi isi'a ergatemate'n ke'e; Sa'oolinna yo'oshsha isoo eeyyeexxi ifika loliinka miyya ba'edhaake assedhe. 22 Ookkoneechchi uduma Sa'ooli Isseyi'n «Daawwiti yo'oshsha eeyyennen; tennexxe kabaanni hedheexxi ani'a ergatemuun» hiyye dhaame. 23 Mageniibaa'ni ergememmaaki fuggichchi haafuuri Sa'ooli'n daggaamma wodda duuchcha Daawwiti kirraara aadheexxi gana'emman. Fugggichchi haafuurinna isinaa'n bayyata'emmaxxee Sa'oolinna fayyake kada'emman.