1 Saamu'eelinna Isira'eelike arda duuchcha'n hiyyee qici, «Ani ha'no hitineexxa duuchcha laqennexxi ha'no'a moyanji moyaashsha asseennen. 2 Moynjoke kadeexxi ha'noo akeekaaka manjo ta'a ha'no afine'een. Ani cimeenen, umi ankinna aro'eedheen, labbaxxi oose anxinna ha'nonninni welt hexxeen; dargageessummatenaa'n telchi qico'n ani ha'nooke akeekisanjomman. 3 Ani kunnisse ha'no edo hedhennen; Duuchchi Woddike Gootti edonna isi hariireke moyanji edo dhugaa kulle; ayyike jibichcha adhdhene? Ayyixxe harreta adhdhene? Ayyee sobenne? Ayyee miicenne? Uuda'ni uuda'ebe'noshsha kadona'a ayyinaa'n matta adhdhennne? Konneechchuwwi duuchchinaa'n mittelchonna midde assennexxe kaddoole ha'no'a hiissannon» hiyye.

4 Isira'eeli ardinna hiissee haasoe'e, «Hara matta ayyenaa'n adhdhitebexxo yookaan no'oo miicebexxo; ayyinaa'ninna mittelcho adhdhitebexxo» hine.

5 Saamu'eelinna insa'nee, «Ane'n mitti dhedha affinebaaxxa Duuchchi Woddik Goottinna isi hariireeki moyanji telcho ha'no'n dhugaaten» hiyye.

Isira'eelik ardinna, «Eet! Duuchchi Woddiki Gootti dhugaate!» hiyye.

6 Ookkoneechchi uduma Saamu'eelinna ardake'n hiyyee qici, «Muusenna Aaroonii'i fileek, hundaayyetika ha'noka annuwwa Gibtseke boganaa'n fulcheek Duuchchi Woddike Goottan.✝ 7 Tennexxee ta'a Duuchchi Woddik Gootti hedheeba uurre, ani Duuchchi Woddi Gootti ha'no'anna ha'noke edike annuwwi'a asseexxa anjiratixxa huje duuchcha kokeessona'aten.

8 «Ya'iqoobi Gibtse'a e'yeechchi uduma insa'ne gargaaro'a annuwwi ha'nok Duuchchi Woddike Goottibaa oo'ne; Duuchchi Woddik Goottinna insa'ne'a Muuseenna Aarooni'i erge; Muusenna Aarooninna edika ha'noka annuwwa Gibtseke boginaa'n fulchineexxi konne boga'n he'naashsha assine.

9 «Yaane kinni insa'ne Duuchchi Woddika Gootta ifika Mageno deene; tennexxee Duuchchi Woddi Gootti Siisaara'n, Hatsoorike loliinke mannike ajajalixxe anga'n, Filisixeemitotanna insa'nee lolee injifateeke Mo'aabike moyanjixxe anga'n insa'nee sa'isse uwwe.✝ 10 Insa'nenna, ‹No'o cubbo hunje'ennen Duuchchi Woddika Gootta waalleenneexxi Ba'aalinna Asitaarooti magenofante'eennen. Ta'a kinni no'oo naapha no'okixxe anganaa'n anjir, no'o ateenna magenofantannon› hina'ni Duuchchi Woddike Goottiba'a oo'ne.✝ 11 Ookkoneechchi uduma Duuchchi Woddik Gootti Yiruba'aalii'i* Baraaqii'i* Yoftaaheenna Saamu'eelii'i* ergeexxi nage'ik hexxinaashsha qarqara ha'noke'n hedheeke ha'nooke naaphixxe anganaa'n ha'noo anjire.✝

12 «Yaane kinni Amoonik moyanji Na'oosi dageexxa uuddinee wodda Duuchchi Woddik Gootti ha'noki Mageni moyanjo kade'naan anee ‹Waawwo'o, no'o'a moyanji moyaashsha assi› hitine.✝ 13 Ta'a moyaashsha laqexxinemmakinna fi'litinemmak moyanji kunniseten, Duuchchi Woddik Gootti ha'no'n moyaji moyaashsha asse'een. 14 Duuchchi Woddika Gootta sodaatineexxi isi'a ajajendinoole, ajaja iseke'ninna jallata gophinoole, ha'nonna ha'no'n moyeek moyanji Duuchchi Woddika Gootta ha'noka Mageno hordofinoole yaane duuchchi eloxxe ha'no'a kadda. 15 Duuchchi Woddike Gootti'a ajajema gophphinoolenna ajaja isike'n jallatinaake kaddinoole kinni Duuchchi Woddik Gootti ha'noka hundaayyeti annuwwa xixemmashshanni ha'noonna moyanjo ha'noka xixaan.

16 «Tennexxe ta'a hexxineeba jabaatine uurre Duuchchi Woddik Gootti ille ha'noxxenni uudinaa'na'a assaneexxa mambe'a yaane uuddinaan. 17 Ta'i dinne aadhatixxe yannan; balaqakanna xeena ergaashsha ani Duuchchi Woddika Gootta soodatannon. Tinni kaddaa wodda ha'nonna moyanji ha'no'n moyo'a laqedhiyyoti Duuchchi Woddike Gootti edo fuggoxxa yaane assitineexxa eettenee yanna egendinaan.»

18 Ookkoneechchi uduma Samu'eeli Duuchchi Woddika Gootta soodate; eettenenni barra Duuchchi Woddik Gootti balaqakanna xeena erge. Tennexxee Saamu'eelinna ardi iikki duuchchi Duuchchi Woddika Goottanna Saamu'eeli'i yo'oshhsa sodaate. 19 Iikki ardi duuchchinna Saamu'eeli'i, «Rennabe'noshsha maganneten Duuchchi Woddika Gootta atike Magenibaa no'o'a soodat; moyanji no'o'a moyaashsha laqedhiyyoti edo hunjennexxe cubbo duuchchi hana wele cubbo lephphine'ennen.» 20 Saamu'eelinna insa'ne'n hiisse hiyye haaso'ee qici, «Meeco'o, sodaatinoqqee; dhugaaten moyanji moyaashsha laqedhiyyoti tenne fuggo duuchcha assitine'een; kaddoo malee Duuchchi Woddika Gootta mitte godobinni ergatemme malee'e Duuchchi Woddika Gootta ergatematenaa'n illeema higginoqqe'e. 21 Ha'no'a wayi fuldabaaxxa fakkuwwa hordofinoqqe'e. Tinni fakkuwwa wayi faldabaaxxe kaddeemmaxxee ha'no'a eloxxa yaane assa yookaan ha'noo anjira dandeetabaan. 22 Duuchchi Woddik Gootti ha'noo ifike arda assedho'a eeyyemmaxxee, ifike summa lumoke hiyyeexxi arda ifika waalabaan. 23 Aninna ha'no'a soodata waaliyyoti Duuchchi Woddika Gootta balleessa anenaa'n bayyatto'o. Ani eloxxanna qajeelto yaane ha'noo barsiisannon. 24 Yaane kinni ha'no calli Duuchchi Woddika Gootta sodaatte; mitte godobinninna addatenshati isi'a ergatemme. Ha'no'a asseexxa lumollamma yaanuwwanna deetionoqqe'e. 25 Cubbo hujiyote'n murum hitinoole kinni ha'noonna moyanji ha'nok muddinaan.»