1 Amoonik moyanji Na'oosi, alaalle mareexxi Iyyabiisi Gele'adii'i erqe kayyi'n buqe; Iyyabiisik manni duuchchi isoo hiyyee qici: «Ati no'onni welti kako aagi no'onna ati'a hiremmannon» hine.

2 Amoonichchi Na'oosinna, «Ha'nonni welti kako aagannok ha'no mitti mittingixxa middixxa ille ha'noonaa'n fulche Isira'eelika arda duuchcha salphiseennole callanni» hiyye hiisse.

3 Iyyabiisixxi geedhuuwwanna isoo hitee qici, «Isira'eelike boga duuchcha'n erganjuwa erge'nona'a torbaane barra no'o'a uwwi; no'o'o anjiro'a dagaaka manjo gonphonnole ati'a anga uunannon» hine.

4 Erga maremmaak manninna Sa'ooli hedhemmaba Gibi'a marre gennexxi Na'oosik ardi insa'ne hiyyeexxa yaane duuchcha ardakee haasonnee wodda, Isira'eelik ard duuchchi hafuura gikki asse oodhe. 5 Eettne yaanna Sa'ooli fichcha hucca'ni hosemmabaa'ni ifixxa qotiyyuwwa oofaa'n hige; isinna, «Ardi maa kadee? Mayeete oodha'neek?» hiyye qore. Insa'nenna Iyyabiisik manni insa'ne'ni higgeenna hiyyyexxa iso'ni kulle. 6 Sa'oolinna konne haaso'a laqee wodda Mageniink Hafuuri hunnati iso'n hana dirre; Sa'oolinna yo'oshsha aare. 7 Isinna lamiinxa qotiyyo aadhe duleexxi, maalakanna kukkute; kukkutemmaka maala ookkone erganjuwwake'n anga ergeexxi hiyyee qici: «Sa'oolixxanna Saamu'eelixxa duuka fulabaake manjixxi qootiyyonna iitta kukkutendaan!» hiyya'n Isira'eelike boga duuchcha'n lassinaashsha asse. Eettene yanna ardi duuchchi Duuchchi Woddik Gootti lumoxxa soda'a ardake'n ibise; duuchchingi mitteke kadee fule. 8 Sa'oolinna Bezeqi hiyyendaaxxe baka'ni lolinka manna bukki assee wodda, laakkoossi insa'neki Isira'eelinaa'n dageek sase dhibba kuma kadaa wodda, Yihudannaa'ni dageek sase tomme kuma lolinke mannamman.

9 Sa'ooli Iyyabiisi'n erga dangemmake manninna, «Iyya buusi Gele'adiki manna hitinaa qici, ‹Soodo arishsho eebbitamma wodda anjirendinaan hitine kulle› » hiyye. Ergeme'emmaki manninna mareexxi konne hiyyichcho Iyyabiisike manna'n kulee wodda, insa'ne yo'oshsha gammande. 10 Iyyabiisik manninna Amoonika manna, «No'o soodo anga ha'no'a uunannon; ha'no'n eloxxe labbe leellitaaxxa no'o'n assa dandeetinaan» hiyye. 11 Langa baro gorsa Sa'ooli ifika lolinka manna saseba qoode; insa'nenna soodimaro Amoonitotike mannixxe kaambe giddi'a e'yeneexxi heddo manna saafo'ii qico'n shinne; reyotenaa'n gateekiri midde lame lameke kadee welti hedhabaa qico'n xexxeeremme.

12 Ookkoneechchi uduma Isira'eelik ardi Saamu'eelii'i, «Sa'ooli no'o'n moye galcha dande'abaan hiyyeeki manni ayyeerramaa? Ookkone manna shinnona'a iyyedagge!» hine.

13 Sa'oolinna kinni, «Tinni barra Duuchchi Woddik Gootti Isira'eeli anjireexxe barra kademmaxxee mitti manjinna tenne barra'ni shiyemabaan» hiyye. 14 Ookkoneechchi uduma Saamu'eelinna ardakee, «Amme Geligeeli'a me'ino Sao'oli moyanjo no'oke kadeena'a adhdhinnenexxa haaroba kokeesino» hiyye.

15 Ardi duuchchingi Geligeeli'a mareexxi; Sao'oli'i moyanjumma Duuchchi Woddike Gootti edo kokeesse. Ookkonna ardi mittummatika tolcha Duuchchi Woddike Gootta magnoffantaaba shiqishshe; Sa'oolinna Isira'eelik ardi lumoxxa jila jille.