1 Ziifike qachchik manni Sa'ooli hedheeba Gibi'a mareexxi, «Daawwiti Yihudinxe qiilla gammoojje albi edi darre Hakkila hiyyemaake tullichcha'ni sho'ome hedheen» hiyya'n iso'ni kulle.✝ 2 Sa'oolinna rake ke'eexxi Isira'eeli giddo fiifinake kadeeka sase kuma loliinka manna adheexxxi Daawwitika hasito Ziifixxe qiilla gammoojjeba'a me'e. 3 Sa'ooli Hakkilake tulchinaa'n sa'aneeke ori bira, Heeshimoona edi darre ofo'le; Daawwiti kinni qiilla gammoojje'n hedhemmani. Sa'ooli isika hasito dageexxa afeexxi, 4 dooyyaaka manna ergeexxi Sa'oolixxi ookko daga dhugaate kaddeexxa ege'ne. 5 Ookkoneechchi uduma rake ke'e mareexxi, Sa'oolinna isike lolinke mannik ajajalli Nerik belti Abeneer diipheemmaxxa bakka afe. Sa'oolinna loliink manni bakka abixeexxe oddo'n diiphee'naa isik loliinki manni kinni qarqara isike'n qececeemman.

6 Ookkoneechchi uduma Daawwiti Hiitichcho Abemelekinna Tsuriya ildeexxe oosenaa'n Iyyo'abika dayyo Abisaanii'i, «Ha'no lami giddii'ni aninni welti Sa'oolixxe kaambeba maraaki ayyete?» hiyye qore.

Abishayinna, «Ani marannon» hiyye hiisse haaso'e.

7 Tennexxe eettene hashsha'ni Daawwitinna Abisaani Sa'oolik loliinki manni hedhemmaba marre e'yine; Sa'oolinna loliinke mannixxe oddo'n diiphee'na'a anfe, bagedokanna umiinbaa'n butta olteemman. Abeneerinna loliinki manni isike qarqara'n diinpheemman. 8 Abisaaninna Daawwitii'i, «Mageni tenne hashshaa'n naapha atika anga atixxe'n sa'isse uwwe'een; langasebo'nog mitte ochchi callinni isoo buttinki buttinake assoo!» hiyye.

9 Daawwiti kinni Abisaani'n hiyye hiisse haaso'ee qici, «Duuchchi Woddik Gootti hariiree moyashsha asseeka anga sa'aaka Mageni umo ifingenninni isoo xixaan, waali isoo shiltoxxee. 10 Hedhaake Duuchchi Woddike Goottixxa; umo isingenninni Duuchchi Woddik Goottinni Sa'ooli qoomaan; yookaan reyammaxxi barra geltee'naa, yookaan bagedoke'n reyaan. 11 Duuchchi Woddik Gootti hariire moyaashsha asseeka moyanjo anga sa'a anenaa'n bayyato'o! Yaane kinni umo isikiba hedheeka isika bagedonna wode'iinxa isixxa baarre adhine me'ino» hiyye.✝ 12 Tennexxe Daawwiti bagedokanna wodeiinxa baarre Sa'oolike umibaa'n aadhee'na'a isinna Abisa ookko'n me'ine; Duuchchi Woddik Gootti insa'ne diinphe cokooki hinaashsha assemmaxxee, tinni duuchchi kaddaa woodda mittikinna dammaqe afeeki yookaan ege'neeki hedhemmabaani.

13 Ookkoneechchi uduma Daawwiti dhooqati wido hedheeke boonchibaa foofee; insa'nenaa'inna bayyateexxi koobati hana uurre. 14 Daawwitii Sa'oolike loliinke mannibaa hafuura gikki asseexxi «koo Abiner hee hitabexxo?» hiyye.

Abeneerinna, «Moyaanjoke'n taaqqi hitaa'ettek ati ayyete?» hiyye.

15 Daawwitinna hiyyee qici: «Koo Abeneer! Ati Isira'eeli'ni ege'nendeeteke lumooke manjoba? Hittata moyanjo atika gootta adda heqitabexxochchi? No'oo giddi'n mitti manji atika gootta shiyyo'a ha'noba dageemman. 16 Tinni ati assitettexxi yaane eloxxebaan; koo Abeneer, hedhaake Duuchchi Woddike Goottixxa! Mageni hariirexxi moyaashsha asseeka moyanjo, ha'nooka gootta dandeetinee heqqa gophphineemmaxxe'e ha'noo duuchchiinge hasisaachchi shiyyematen! Umiiba hedhemmaka isika bagedonna wode'e ikkilamaxxi baarre ta'a haba hexxe? Mee qarqara atike'n uudi» hiyye.

17 Sa'oolinna Daawwitike haaso'a kadeexxa ege'nemmaxxe'e, «Anke belto! Kunni haasota'etek atende?» hiyye qore.

Daawwitinna, «Eetti anke gootta! Anenden hiyye hiisse haaso'e» 18 Ookko iimanni lebeexxi, «anke gootta anee atika erganjo mayyeta shorritaatyota? Maa balleessenne? 19 Moyaanjoo! Magannete'n ani haaso'aannexxa laqi! Ati ane'n kexxattoshsha asseeki Duuchchi Woddike Gootta kado'oole, tolcha shiqishiyyoti araarsedha dandeesissaan; yaane kinni manji tennee asso'oole martee wele magenuwwa magenofati hiyyatishsha Duuchchi Woddik Gootti ani'a uwwemmake geeginaa'n anee shorrinemmaxxee Duuchchi Woddik Gootti insa'nee uudo. 20 Duuchchi Woddike Goottinaa'n bayyatennexxi annafee boga'n ani shiyyemannoshsha assitoxxee. Ati Isira'eeliki lummoki moyaanji badda'a giddo goroorre adamammake manjishsha anee taffetenaa'n woyyo'abe'noka manjo mayee shorritatto?» 21 Sa'oolinna, «Anke belto Daawwiti! Balleesseenne; illee iima higee anibaa amo; ta'ann elqa ate'n fuggoxxen ke'abe'non; yebeno hashsha lubbo anxee mararte'eten; gowwummati ani konnete hiyyemabaake dedha huje'ennen» hiyye hiisse haaso'e.

22 Daawwitinna hiyye haaso'e hiissee qici, «Moyaanjo! Bagedi atik kaba hedheen dageexxi adhdhowaal mitte manjo atike lolinke manninaa'n ergi. 23 Mitte mittengi hujeexxe eloxxe hujeka hira uwwaak Duuchchi Woddik Goottaan; atee Duuchchi Woddike Gootti anga anxe'n sa'isse uwwe'naa'n ani kinni atee anga sa'a gibennen. 24 Telcho atixxi lubbo ani eddo lomoka ulfinna alfitemmashshan anxi lubbonna Duuchchi Woddik Gootti edo ulfinna lumoka alfitaashshanna rakkotenaa'n anee gatisaa'ana iso'o soodata'ennen!»

25 Sa'oolinna Daawwiti'i, «Anke beltoo! Mageni atee eebbisoo! Asitattoxxi duuchchi ati'a qajeeldaan» hiyye.

Tennexxee Daawwiti me'ammaba'a me'e; Sa'oolina mini ifikiba'a illee iima hige.