1 Duuchchi Woddike Goottik Kakoti Taaboti torbaane agenjo Filsixeemike baga'n turee wodda, 2 Filisixeemik ardi ifixxa qeese Daagoninna Ashidodi morammaka manna ye'eexxi, «Konne Duuchchi Woddike Goottika Kakotika Taabota maa assinannoxxa? Hitta wirri assine isixxe bakkaba'a hiissinannoxxa no'o'ni kulle» hiyya'n qodhdhe.

3 Insanenna hine hissinee qici, «Isira'eelike Magenika Kakotika Taabota illeema hiisitina'noole balleessa ha'noxxee uwwemaake tolchinni welti illeema hiisse malee isoo calla hiissitinoqqe'e; ookkone wodda dhibotenaa'n fayyitinaan; jabaxxe ifixxe mufenninna ha'no'o mayee ganeexxanna egendinaan» hine. 4 Filisixeemik ardinna «Balleessaxxa leellisho'anna tolcha maacho isi'a erginnano?» hiyye qore.

Qeesetinna galchalluwwi hiyye hiissichcho uwwee qici, «Ha'no'inna ha'noke ondinge moyanjuwwa'n ibeek dhukkubi mitteke kademmaxxee fulantichchinxe fakke'n giisemeeka onde worqetika fulantichcho, Filisixxeemike moyanjuwwike laakkossixxe qixxe'n onde lama'inxe fakke'n giisemeeka worqetika lama'e uutinaan. 5 Tennexxe boga ha'noka balleeso'a ergemeekee lama'uwwinxenna fulantichchuwwinxe fakkuwwaxxa uwwa giisiyyoti Isira'eelika Mageno ulfeesse; iitta assitineexxe kaddoole Isi ha'no'o, ha'noka magenuwwanna ha'noka boga duuchcha mufeti gana waalaxxe hexxeen. 6 Gibtsek ardinna Gibtsek moyanji assemmashsha mayee godoba jabeesixxene? Gibtsek ardi Isira'eelika arda me'o'a wocci asseek Duuchchi Woddik Gootti Gibtseka arda mufeti ganeechchi udumateba'a? 7 Tennexxe haaroxxa gaare giissitine'e lame unuunsaaka, qanbar fe'eme ege'nemebaaka saayya qophpheesse; gaare harkilsaashsha ookkone lame saayya'n qanbara usurtinee jabbuwwa isixxanna moona giddi'a hiissitine usurre. 8 Duuchchi Woddike Goottika Kakotika Taabota saxxine aaxxine gaarete'ni hana ugge; balleessa ha'noxxike tolchixxe uwwa'a isi'a ergitino'a giissitinemmaxxa worqetixxa fakkuwwa saxxine giddo uggitineexxi Taabotii qarqara uggurre; lami saayyi harkilsa'n me'ashsha orake'n fulchitine waale. 9 Yaane kinni lami saayi gaare haba'a haarkilse me'aaxxa uudde; Beetishemeshike qachchi darre'n me'oole konne fuggoka dhukkuba no'o'n ibiseek Duuchchi Woddike Goottan hiyyoten. Ookkone darre'n me'a gophoole kinni kunni fuggok dhukkubi iittanni dageeke malee Isi no'o'n ibiseeke kadebaaxxa egennanon.»

10 Filisixxeemiki ardinna hiyyendemmashshanni gaarete'n usurremmaka qanbara aaneexxi lame saayya'n feene; jabuwwatanna moona giddi'a aassine hula cunfe. 11 Insa'nenna Duuchchi Woddike Goottika Taabota aa'nexxi lama'uwwinxenna fulantichchuwwinxe fakkuwwa'n giissendemmaxxe worqe giddo hexxeexxe saaxxinen welti lami saayyixxe gaare hana feene. 12 Lamingi saayyi middi bita'i'a gorebaang ora abixxe'e Betishemeshi darree'n me'ate'n ke'e; me'amma wodda madhata'ne'e me'aamman; Filisixeemik galchaluwwinna udumi udumi'n me'a'n Beetishemishixxe gabala qico'n genne.

13 Beetishemeshik manninna dhooqa giddo dinne haa'ma'nemman; tammi assine uundaa wodda Kakotika Taabota anfe; isoo anfemmaxxenna lumoshsha gammande. 14 Gaaretik lamingi saayy Beetisheemmeshi hedheeke Iyyaasu hiyyemaake manjichchike fichchibaa geyeexxi lomoke kinji bira dage'e uurre; ardikinna gaaretika haqichcho shashatte laminga saayya Duuchchi Woddike Gootti'a hedheeshshanni ciincatike tolcha assine shiqinshe. 15 Leewwitotinna Duuchchi Woddike Goottika kakotika Taabotanna isinni welti hedhemaka worqe giddo hexxeexxa saaxxine ke'isineexxi lumokekinji hanauggine; Beetishemeshik manninna ciincatika tolchanna wele tolchuwwa duuchcha Duuchchi Woddike Gootti'a shiqinshe. 16 Ondiniig Filisixeemik galchalluwwi tenne duuchcha uuda'n tureechchi uduma eettenenni barra Aqarooni'a hige.

17 Filisixeemik manni Duuchchi Woddike Gootti'a balleessa ifixxike tolcha kadoe'a onde worqetike fulantichchinxa fakkuwwa mitte mitte qachchuwwi'a mitte Ashidoodi'a, mitti Gaaza'a, mitti Asiqelona'a, mitti Gaati'anna mitti Aqarooni'a erge'nemman. 18 Insa'nenna onde worqetike lama'uwwixxa fakke Filsixeemike galchalluwwike laakkossixxe qixxe'ninna insa'ne galchinammake kinjike dalla'uwwike qachchuwwixxe qixxen ergine. Worqeti giissineke lama'uwwixxi fakkuwwanna ergendeemmak mitte mittenge Filisixxi'eemik moyanjuwwi galcha'emmake onde kinjik dala'uwwike qachchuwwikenna qarqarake'n hedheek olla'uwwike summinnitemman; Beetisheemmeshi hedhaammake Iyyaasuke fichchi giddo Duuchchi Woddike Goottika Kakotika Taabotanna hana uggine'emmak lumok kinji telchii qico'n kaddeexxa yaane qalli assaake kadee ookkone hedheen.

19 Kakotike Taaboti giddo uundemmaxxee Mageni Beetishemeeshike torbaane tomme manna shiye. Duuchchi Woddik Gootti konne manna duuchcha insa'ne giddi'n biremmaxxee Beetishemeeshik ardi yaande oo'ne.

20 Tennexxe Beetishemeeshik manni, «Konne Woyyichcha Duuchchi Woddike Gootti edo dande'e shiqaak hedhebaan. Taaboti no'oba'an ayyibaa me'u?» hine qore. 21 Ookkoneechchi uduma Qiriyatiyi'aarimi manniba'a manna ergineexxi «Filisixeemik manni Duuchchi Woddike Goottika Taabota idage hiisse'een adade daggineexxi aadhdhe» insa'nee hiyye.