1 Ookkoneechchi uduma Filisixeemik ardi Mageniika Kakotika Taabota booji'echchi uduma Abeneezerinaa'n Ashidoodi hiyyemaaka ifike qachchiba'a adhdhine me'ineexxi, 2 Daagoni hiyyemaake fakketike mine'ni e'yinsheexxi Daagoni bira uggine. 3 Ashidoodik ardi gorsa ke'eexxi uudaa wodda Daagoni Duuchchi Woddike Goottike kakotike Taaboti edo albik gonbisemee'na'a anfe; insa'nenna eettene Daagonxa fakke ookko'n ke'isineexxi edi wodda hedhemmaba hiisine. 4 Langa baro gorsanna ke'neexxi uundaa wodda Daagonxi fakke Duuchchi Woddike Goottike Taaboti edo gonbisende'na'a anfe; ookkone Daagonixxe fakkek goobinna laminxi anga kukkutendeexxi hulatixxe huddumme'n ibee'na'a Daagonik bisi susuma gateemman. 5 Telchi qco'n Daagonixxi qeesolenna kadi Ashidoodi giddo hedheeke Daagonixxe fakkeke galmi giddo magenoonfachchotee e'yaak manni duuchchi lakkati isixxe hulaxxa huddumme tarkaaffante sa'naachchi tene'aaten.

6 Duuchchi Woddik Goottinna Ashidoodika ardanna qarqara insa'neeke'n hedheeka arda duuchcha'n fulantichchi fule dho'e malaqqi malaqqi hiyyashsha assiyyoti insa'nee jaba qicinni gane. 7 Ashidoodik ardi tennee kaddeexxa yanne uudeexxi weli'anni weli, «Isira'eelike Mageni Kakotik Taaboti no'oonna no'oka mageno Daagoni'ii jabaxxe mufenni ganemmaxxee isik Taaboti kaba no'oba turoqqe'e» hine. 8 Tennexxe duuchchinga Filisixeemika galchalluwwa ye'neexxi, «Isira'eelike Mageniinka konnee Kakotika Taabota maa assinano?» hine insa'nee qorre.

Insa'nenna «Gaati iyyemarre» hine hiisine; tennexxee Isira'eeli Magenika Kakotika Taabota Gaati iyyemarre. 9 Yaane kinni kakotik Taaboti Gaati iyyemarreechchi uduma Duuchchi Woddik Gootti ookkone qachchika mannanna mufet ganeexxi jaba qicinni weekemmaashsha asse. Isinna lumo shiixxoke gatebaang arda duuchcha fulantichchike dhukubinni gane. 10 Tennexxe Mageniinka Kakotika Taabota Aqarooni hiyyemaake wele Filisixxeemtotik qachcha dhaalasha asse. Yaane kinn ookko geyyeeshanni ookone boga'ni hedha'nek manni, «Isira'eelk Mageniinka Kakoti Taabota kaba'a iyyedange'echchi no'oonna no'oka arda shiltino'aten» hina'n hunbaashine. 11 Higgeenna Filsixeemike moyanjuwwiba manna ergineexxi «No'oonna no'oka arda shiyebaang, Isira'eelika Kakotika Taabota edo hedhemmanba'a hiisse» hine; Mageni qachcha mufeti ganemmaxxee qachcha duuchcha'n hedheek ardi reyyo lumoshsha sodaate'emman; Filisixxeemike galchalluwwa ye'neexxi «Isira'eelika Kakotika Taabota kabaa'n hoyye; edo hedhemmanba'a higowwaal; kadagophphoole no'onna no'oka arda biraan» hine. 12 Reyebaak gateeka fulaantichchi rakkisa'emmaxxee qachchinke mannixxi raare iima gelte.