1 Mitte barra Sa'oolik belti Yoonataani isika lolliinka miyya ba'edhdhammaka dargageessa, «Amo, wele darree'n Filisixeemik loliink mannixxe kaanbeba'a foonfo» hiyye. Yanne kinni Yoonnatani tenne yaane anna ifike'n kule'emmabaan. 2 Sa'oolinna Gibi'ake kassa'n Migiroon hiyyeendaxxe bakka'n roommanni hiyyemaake mitti haqqichchi hunda ofo'leemman. Isinni welti jaane dhibbi qici loliinki manni hedhemman. 3 Konne manni giddo Efuude oddo'waammak Akiya hedhemman; Akiyak anni Ahixuub Ikaboodike dayyomman. Ahixuub Finhaasike, Finihaasi Seelo giddo Duuchchi Woddike Goottike qeesichcho kadeemmake Eelike beltomman. Ardi Yoonataani haba mareexxa ege'neemmabaan.

4 Yoonataani Filsixeemike sannachchixxe kaanbeba'a foofo'a hedeexxe xurreke middi bita'a'n, mitti Boozezi, mitti Senne hiyyendaaxxe lame suuxxite kino hexxemman. 5 Tenne kinnonaa'n mitti kinji middi darre'n, Mikimaasi edi darre, langak bita'a darre'n Gibi'a edi darre'n uurremman.

6 Yoonataani isika lolinka miyya ba'edhammaka ookkone dargageessa, «Amo, Mageno ege'nebaake Filisixxeemike sannachchixxe kaanbebaa foonfo; heenokenninna kadi heddik anjira Duuchchi Woddika Gootta dhibbammabaaxxee, akimagaada Duuchchi Woddik Gootti no'o'a lolaaxxe hexxeen» hiyye.

7 Isika loliinka miya ba'edhamak iikki dargaggeessinna, «Godobi atik yoreexxa duuchcha assi; mee udumi'a higi; aninna mitte godobinni atinni welti hedhennen» hiyye hiisse haaso'e.

8 Yoonataani isoo hiyyee qici, «Yoona amota'a Filisixxeemike mannibaa widi'a foonfennexxi insa'ne'n leellino. 9 Insa'nenna no'oo, ‹Ha'noba'a dangannoxxee ookkonni no'oo heqqe› hinoole, he'nennenba he'nanno'n alalle marabe'no. 10 Yaane kinni insa'ne no'oo, ‹No'obaa alalle amme› hinoole no'onna alalle marrannon, Duuchchi Woddik Gootti Filisixxeemika manna anga no'oxxe'n sa'isse uuweexxa tinni beessisake kaddemmaxxee insa'nebaa alalle marrannon.»

11 Tennexxe insa'ne lamingi Filsixeemike loliinke mannik sannachchi insa'nee afaashsha kande; Filisixxeemito, «Uuddineen! Ibirito sho'ondemmaxxe baleenaa'ni fulate'ni hexxeen!» hine. 12 Filisixxeemixxe lolinke mannixxe kaambek sannachchinna «kaba no'oba'a alaalle amme; ha'no'a barrisiinsanexxe yaane hexxeen» hinaa'ni Yoonataaninna isika loliinka miyya ba'edhammaake'ni caancine.

Tennexxe Yoonnataani ifika lolinka miya ba'edhammaka, «Anxa duuka amo; Duuchchi Woddik Gootti Filisixxeemika manna Isira'eelixxe anga'n sa'isse uuwe'een» hiyye. 13 Yoonataaninna anga lekkati boxxaa'ni lolinka miyya ifika ba'edhammak udumi'n duuka dagana'a alaalle qabate fule; Yoonataninna edi darre'n loldammaxxa Filisixxeemito shiyye; isika lolinka miyya ba'edhammakinna insa'ne udumi darre'n loldammaxxa Filisixxeemito shiye. 14 Yoonataaninnna ifika lolinka miyya ba'edhammaaki Siretixxe barraxxe shiyya'n mitte qottiyyo barrate'n hujaaxxe bakkaxxe qixxexxe'n lame tomme geyaaka manna shinne. 15 Hadi giddo hexxemmaxxi Filsixxeemito duuchcha weekende; fuggoxxa assaamak kaambe giddo hedhemmake loliinke manna'n weekenshate kadde; buttinkinna lele'me; tinni weekenshanna Magen insa'ne'n ibiseexxemman.

16 Biiniyaammixxe galcha'ni Gibi'a hedheemmaki Sa'oolik heqqanjuwwi Filisixxeemitotiki lolinki manni ora ora'n culphisa'n baanja'neexxa uunde. 17 Ookkoneechchi uduma Sa'oolinna isinni welti hedheemmaka loliinka manna hiyyee qici, «Amme loliinka manna laakkotineexxi kabaa'ni ayyi me'exxa affee» hiyye. Laakkone woddanna Yoonataaninna isika loliinka miyya ba'edhammaki ookko he'nemabaan.

18 Sa'oolinna qeesichcho Akiyaa'a hiyyee qici, «Mgeniinka kakotika taabota kabaa iyyedagi» hiyye; (Eettene yanna taaboti Isira'eelitoti giddo hedhemmaani) 19 Sa'ooli qeesichchoke'ni haaso'ande'n hedhee'naa, Filsixeemike loliinke mannixxe kaambe'n canci bira saa'a'ni me'e. Tennexxe Sa'ooli qeesichcho, «Assitatexxa yaane uurrisi» hiyye. 20 Okkonneechchi uduma Sa'oolinna isiki loliinki manni bukki hineexxi loliinbaa me'ine. Insa'nenna, Filisixxeemiki loliinki manni dommi hiyyeexxi ifinge wolaantichchinni weli'aanni weli wowwonxaa'naa anfe. 21 Ediwodda Filisixeemitotike loliinke mannibaa higeexxi Filisixeemitotixxe kaanbebaa alaalle me'emmak Ibiritotik manni Sa'oolinninna Yoonataaninni welti he'nemmabaa Isira'eelitotibaa hinge. 22 Koobuwwa callike Efireemike bogga'n sho'omee hedhemmaaki Isira'eelik manni duuchchi; Filisixeemik manni baajate'ni hedheexxa lanqee wodda; jaaba qici'ni insa'nee horidonfeexxi lolle. 23 Eettene barra Duuchchi Woddik Goottinna Isira'eelito anjire; Isira'eelitotinna Filisixxeemito Beeti'awweke qachchi widi qico'n lolde.

24 Sa'oolii, «Ani techcho naapha anke'n halo fulanno qico'n ayyinna hashshi qico'n mitteechchonna afo'ik maqoole badinemeeke kadowwaal!» hiyyeexxi arda kakachchiisemmaxxee, eettene barra Isira'eelik ardi wexeqema'n hose. Tennexxee Isira'eelik ardinaa'n ayyinna midha afo'ik maqeek hedhemmabaan. 25 Loliink manni duuchchi gongomi giddi'aa e'ye, malebiinxa dhaaba butta booncho booncho'inni anfe. 26 Ardikinna gongomi giddi'aa e'yee wodda malebiinxi la'e dhaabatenaa'n coccobe'eexxa afe; yaane kinni kako sodaatemmaxxee ayyinna ookkone malebiinaa'n afo'ik maqeek hedhemmabaan. 27 Yaane kinni Yoonataani anni isik arda kakachchiiseemmaxxa laqeemmaba'a. Tennexxe anga afeexxe siqqoxxa qacce malebi giddo cuuphe angate'n coccossa'n muxedheen, hafuurakanna hiissedhe jabaate. 28 Ookkoneechchi uduma loliinke mannanaa'n mitti, «Ani atik loliinka manna, ‹Telchixxa barra ayyinna midha wode'e afo'ik maqaak manji badinemeeke kadowwaal!› hiyyeexxi jaba qicinni kakachchiisedheen. Manji duuchchi shaqqe'echchi tenne buutonniten» hiyye. 29 Yoonataaninna, «Anni anki no'oka arda rakkisse; malebokenaa'n shiixxoka afo'ik abidene woda hitte qico hafuura hiissedheennexxa uudde. 30 Ardita techcho naapha injifatee booji'emmaxxe booji'onaa'n iteechcho kaddeele silaa hittatta eloxxemman. Shiyyemammak Filisixeemik manni konne caala kadammabaan.»

31 Eettenne barra Isira'eeliki manni Filisixeemika manna Mikimaasinaa'n Ayyaloon qico'n shinnechchi uduma yo'oshsha gopheemman. 32 Tennexxe naaphakenaa'n boojinemmaxxe booji'o'n tirbi hiyya'n gedhebo, lalokanna jibootuwwa dulaa'n mundendinni maala ite. 33 Sa'ooli'n mitti manji, «Kunniseten ardi kunni maala mundendinni itati Duuchchi Woddike Gootta'n cubbo hunjeen» hiyya'n odo kule.

Sa'oolinna «Seera enqitine'een!» Amme ta'a «mitte lummoka kinjo anibaa gogo'mishshe»✝ 34 Ookkoneechchi uduma Sa'oolinna, «Ardi giddo mammarendina'n ‹Horatineeka lalakanna gedhebo duuchcha iyyedagineexxi duldinee kaba itte; maala mundendinni ittina'n Duuchchi Woddike Gootti edo cubbo hujjinoqe› hitina'n kulle» hiyye ajaje. Tennexxe eettene hashsha mitti mitting manji ifi ifika mitte mitte jibichcha iyyedageexxi ookko dule. 35 Sa'oolinna ookko Duuchchi Woddike Gootti'a tolcho'a tolchimalcho giisse; tolchimalcho giissa tinni isi'a siretixxemman.

36 Sa'oolinna ifika loliinka manna, «Amme Filsixeemike mannibaa aadadde marennexxi dokko hashsha insa'nee lollee sooda qico'n karra insa'neexxa saamme insa'nee duuchchiinga birro» hiyye; insa'neenna «Eeldaan hitattoxxa duuchcha assi» hine; qeesichchi kinni, «Edinseneexxi Mageniinxa fedhi laqe'no» hiyye.

37 Tennexxee Sa'oolinna Magenoo, «Filisixeemika manna aade marre lolloo? Insa'nee anga'n no'oxxe'n sa'issite uutato?» hiyye qore. Yaane kinni Mageni eettene barra qortuma isike hiissichcho uwwebaan. 38 Ookkoneechchi uduma Sa'ooli loliinke mannika akeekisanjuwwa, «Kabaa daggine'exxi telcho hiini cubbo hujendeexxa qorqortine affe. 39 Hedhaak Duuchchi Woddik Gootti, Isira'eeli'i anjireek ege'neexxa balleessa hujeeke manji belto anke Yoonataanite kaddoolenna midde iikki manji dhugaaten shiyemaan hiyye kakate.» yaane kinni manni giddi'n mittikinna isi'a hiissichcho uwweek hedhemmabaan. 40 Ookkoneechchi uduma Sa'ooli insa'nee, «Ha'noo duuchchiingi konne darre'n uurre. Aninna anki belti Yoonataani ookkone darre'n uurrinaannoni» hiyye.

Insa'nenna, «Eldaani hitattoxxa assi» hine hiissine haasonne. 41 Sa'oolinna «Duuchchi Woddika Gootta Isira'eelika Mageno dhugaa fulchi» hiyya'n soodate; hixikinna Sa'ooli'ninna Yoonataani'n ibe; ardi kinni qullo fule.✝ 42 Ookkoneechchi uduma Sa'ooli, «Ane'ninna Yoonataani anke belto'n hixa ibisse» insa'nee hiyye. Hixikinna Yoonnata'n ibe. 43 Ookkoneechchi uduma Sa'ooli Yoonataanii'i, «Assitetechcho ane'n kuli» hiyye qore. Yoonnatanninna, «Anga abixxenexxe siqqoxxe qaccenni malebo shiixxoka muxedhe'eennen, shiyyemona'anna kunna'a qixxeefate'e» hiyye kule.

44 Ookkonneechcha uduma Sa'oolinna, «Mageni fuggoxxa ane'n ilo ati shiyema gophphotole!» hiyye.

45 Ardki kinni Sa'ooli'n, «Isira'eeli tenne lummoxxa injifacho'a geessisseek Yoonataani shiyemaa? Hara shiyemabaan! Hedhaak Duuchchi Woddike Goottixxa, shiyema waalinii umike isike ordichchinaa'n mittikinna qunxi hiyyabaan; telcho tinni isi asseexxi duuchchi Mageniinke gargaarsinni kaddeexxen» hiyye; Konne qicinni ardi Yoonnatani shiyematenaa'n anjire.

46 Ookkoneechchi uduma Sa'ooli Filisixeemika manna shorrishsha waale; Filisixxeemiki manninna illeema higee ifike bogiba'a me'e.

47 Sa'ooli Isira'eelike moyanjo kadeechchi uduma, qarqara duuchcha'n hedheeka isika naaphuwwa duuchcha lole; insa'nenna. Mo'aabik, Amoonikinna Eedoomiki arduwwa, Tsobak moyanjuwwanna Filsixeemike ardan; duulokee fuleeba duuchcha'ni naapha ifika injifata'emman. 48 Isinna jannummati Amaaleeqika arda lolee injifateexxi Isira'eeli'i booji'emmakiirixxe naaphphuwwixxe anganaa'n anjire.

49 Sa'oolixxi labbaxxi ooseki summi Yoonataani, Yishiwinna Malkishu'a hiyyendammaxxeeramman; dubarakenaa'n angafa beltok summi Meeraabi kaddaa wodda, shixxooxxi kinni Melkooli hiyyendaxxemman. 50 Sa'oolixxe arek summi Ahino'aam hiyyendaan; isenna Ahima'aatsixxe beltomman; Sa'oolike lolinke manniki ajajalli Abeneertemman. Abineer Nerike, Nerinna Sa'oolike annike dayyike beltomman. 51 Abeneerik anni, Nerinna Sa'oolik anni Qiisi dayyuwwakemman; insa'nee lamingiik anninna Abi'eelitemman.

52 Sa'ooli lubboti hedhemmaka baro duuchcha Filsixeemike manninni welti jaba qicinni lolemaa'nee hedhaamman; tennexxee Sa'ooli jabaka yookaan janna manjo afoole adhdheexxi ifike lolinke mannixxe una assedha'emman.