1 Saamu'eeli reye, Isira'eeliki ardi duuchchi mitteba bukki hiyye oodhe; okkonechchi uduma Raama mini isingi giddo moonge.

Ookkoneechchi uduma Daawwiti Faaraanixxe qiilla gammoojjebaa me'e.

2 Ma'ooni offo'leeke mitti manji hedhemman; isinna karra Qerimelosi'i afe'emma'a; isinna sase kuma gedhebonna mitte kuma re'e afeeke yo'ooke dureesamman; Qermeloosike boncho'ninna gedhebo ifikixxa orida cira'emman. 3 Ookkone manjichik summinna Naabaali, are isixxikinna Abigeeltemman; isenna danchitettenna qalbeeffachcho afeexxe kaddaa wodda isi kinni adaba afebaake fuggoke manjomman; Isinna Kaaleebixxe gosake manjomman. 4 Daawwitinna qiila gammoojje'ninni hedhee Naabaali gedhebiinxa orda woxa'neexxa laqe. 5 Tennexxe isinna tomme dargageeyye fileexxi Qermeloosi martine'e Naabaali'n nage'a ankanna kulle. 6 Martine hitinaa qici, «Anke jaalo! Ati nage'ange, hori manji atiki duuchchi nage'ange? Hiyya'neenni hitine kulle. 7 Atike gedhebixxa orida woxissaattexxa laqeennen; allalisano atixxi gedhebo atika allalida'n no'o bira hexxemma wodda duuchcha no'o insa'nee tunqebe'non; Qermeloosi he'nemma woddanna gedhebokenaa'n mittekanna midde adhdhinebe'non. 8 Allalisano atixxa laqqottolena insa'ne ati'n kullaan; kunni no'onna telcho gammashshotixxa jila jildaatexxe barra'n dangennen; no'onna elo qicinni adhdhite keessunsexxattoshsha hiyya'neenni atee Daawwiti; tennexxe no'oo atixxe ergatemeeyye'anna atike jaali'a Daawwiti'a hitee afetelchcho no'o'a uwwi» hine.

9 Daawwiti ergedhdhemmaki manninna Daawwiti kullemmashshanni Naabaali'n kulleexxi sammi hine ofoolle heqe'ne. 10 Naabaalinna Daawwiti ergemmake manni'a hiyyee qici, «Isi kunni Daawwiti ayyete? Isi Isseyik belti ayyete? Ani isoo ege'nebe'non! Kunni ta'a goottoletee ajajema gibe baqateexxi garboole boga duuchcha'n wo'mite'een! 11 Tennexxe waasa ankanna wodde'e anka iittaanni gedhdhebi ankixxa orda woxxammake manni'a dulenneke lalinka maala habaa'n dageexxa ege'nebe'noke manni'a uwwaabe'non!» Hiyye.

12 Daawwiti ergemmaki manni wirri hiyye higeexxi Naabaali hiyyeexxa duuchcha mitte mitteti kulle. 13 Daawwitinna isinni welti hedhemmaka manna, «Wolaantichcha ha'nooka ka'litine ke'we!» hiyye ajaaje. Insa'nenna ka'line ke'ne; Daawwitinna wolaantichcha ka'le; miya heqaaka lame dhibba manna ookkonni waaleexxi shoole dhibba manna adhdhexxi me'e. 14 Naabaali ergatammaxxe ergatameeyyenaa'n mitti Naabalixxe are'ni Abigeeli'n hiyyee qici, «Daawwiti qiilla gammoojje'ninni hedhdhe gootta no'oka nage'inginni hexxete hiyye erga ergeemman; isi kinni insa'nee yowee salphiseen. 15 Insa'ne kinni no'o'a eloxxe asseeke mannamman. Insa'ne mitte rakkonna no'o'n geessinsemmabaan; insa'nenni welti badda'ate'n he'nenna wodda duuchcha hore no'okenaa'ni mittikinna midde moorememmabaan. 16 Hore no'oka alla'lina'n insa'nenni welti he'nenna wodda barranna kadi hashsha duuchchi wodda insa'ne no'o'o heqqina'nemman. 17 Maganneten tenne yaane heddee ati assiyyo hasissaaxxa yaane mudhdhi; iitta kada gophphoole gootta no'oke'ninna isike mini hado duuchcha'n elobaaxxi gelto'aten; isotenna kadoole ayyika gorsa laqabaake woyi fulabaake manjon!» Hiyye.

18 Abigeelinna rakkeexxi lame dhibba wodhamo, lame qalqallo'ni woyineti bulbulo wonshite, onde gedhebika dudhinsheeka maala, tommenna torbaane kiilo anneeka tisha, mitte dhibba woyinetixxe gummaxxa roddenna lame dhibba balasetixxe gummaxxa kebbo mitteba bukki assiteexxi harruwwate'ni feete. 19 Ookkoneechchi uduma erganjuwwa isekee, «Ha'no edi'a me'ee; aninna duuka ha'nooxxe'n hedhennen» insa'nee hite. Yaane kinni aro'o ifike Naabaali'n kuldeemmabaan.

20 Isenna harichcho gulufeexxi tullichchinii qarqarika adaddeeshumma me'a'neeka ora me'ita'n dedhanga Daawwitinna isiki mann iseba'a adadde danga'naa futti hite. 21 Daawwitinna godobi giddo hiyya'n hedaamma qici, «Ookkone woyi fulabaake manjixxa karra tenne qiilla gammoojje'n mayee heqqa'n turene? Isixxe karranaa'n mittilchinna mooreme ege'nebaan. Yooni ani isi'a eloxxa asseneexxee isi ani'a elobaaxxa asse! 22 Soodo bariisa isixxa labbaxxa oose duuchcha mittetanna gatisebo'nogi shiye bira gophonnoole Mageni ane'e shiyo!» Hiyye.

23 Abigeelinna Daawwiti afeexxi rakkee harrichotenaa'n dirriteexxi Daawwit edo albike butta wabbi hiteexxi anga iimi'a ke'issite. 24 Lekka isixxe'n ibbeexxi hittee qici, «Anke gootta! Magannetenni ani attixxi erganjo hiyyannexxa laqi! Balleessa ane'ninni woxxi. 25 Anke gootta ookkone gowwi manjika Naabaalika haaso'a mittelchishshanna laakkootoxxee; summi isingi gowwaake hiyyote kadeemmaxxee manjichchikinna summi isikishshanden; gowwumma isixxinni hundii'ninni dagggeexxen. Erganjuwwi atiki dagemma wodda ani hedhenabaan.

26 «Haloti kexxee naapha atika shiltabexxoshsha anga atixxa abideeki Duuchchi Woddike Goottan; kunni ani duuchchi wodda hedhaake Duuchchi Woddike Goottixxanna atixxe hedhoxxa; naaphi atikinna ate'n fuggoxxa asso'a hasaaki duuchchi Naabaalishsha xixichcho adhdhinaan. 27 Anke gootta! Maganneten ani erganjo atixxi ati'a iyyedageennexxa uwwa adhdhitee erganjuwwa atikee uwwi. 28 Anke gootta ati Duuchchi Woddike Gootti'a lolda'n hexxeten; hexxattoke baro duuchcha'n mittelchonna fuggoxxa yaane hasa gophphaattaxxee balleessennexxe ballessa'a magannetenni ani'a gattowwaali hiyy; Duuchchi Woddiki Gootti duuchchi wodda mootattoshsha assaan. 29 Fedheeki manji ate'n fuggoxxa asso'a hasoole manji eloka hira fulchitaaxxa karra ifixxa heqqedhammashsha Duuchchi Woddik Gootti Mageni atee heqqaan; naaphuwwi atikixxeenna kaddoole mitti manji kinjo looyyati darbatammashsha Mageni naapha atika hunaan. 30 Duuchchi Woddik Gootti ati'a assannon hiyyemmashshan, eloxxa calla ati'a assee Isira'eelike moyanjo assaa wodda, 31 Mittilchi yaadisaachchi yookaan godobi atiki giddo qurruxi hinaageechchi hedhaabaan. Anke gootta, tolanga yookaan halo fuldotaa'a hitee shiltetteki manji hedhebaan; tennexxee anke gootta, Duuchchi Woddik Gootti ati'a eloxxa bira sa'isaa wodda aneenna deetoxxe'e» hite.

32 Daawwitinna isee hiyyee qici, «Aninni welti afendatoshsha atee aniba'a ergeeki Duuchchi Woddik Gootti Isira'eeliki Mageni saademowwaal! 33 Telchixxe barra'n halo fulatee hiyye munde dunabo'noshsha asseeki elooki yaadi atiki eebbisemo'o; teeyyoo atinna eebbisemi. 34 Ate'n fuggoxxa assabo'noshsha Duuchchi Woddik Gootti anee hoyyeen; rakkee anibaa daga gophpheetele kinni, Naabaalixxa labbaxxa oose duuchcha mittetanna gatisebo'nongi bogi soodebangi shiye bironna'a hedhaake Isira'eelike Magenike summinni kakateennan.» 35 Okkonechchi uduma Daawwiti isi'a iyyedaggemmalcho adhdheexxi hiyyee qici, «Mini atikibaa nage'iki higge me'i; hitettexxa laqeennen; ati hassettexxa duuchcha ati'a assannon» isee hiyye.

36 Abigeelinna Naabaalibaa higge dagee wodda moyatike minixe jilashsha gargariti hexxeexxa ita qophpheesedheexxi yo'oshsha machcho'e gammada'n utaala'nemman tennexxee bogi soodaqico'ni mittelchonna isi'a haasotebaan. 37 Ookkoneechchi uduma gorsanni Naabaali machche balleeffateechchi uduma duuchchinxa yaane isi'a haasote; isinna alayye qexxeri hiyye kinjinsha bage gate. 38 Duuchchi Woddik Gootti Naabaalii'i mufeti ganemmaxxee tomme barra uduma isi reye.

39 Daawwitinna Naabaali reyeexxa laqeexxi, «Naabali anee yowweemmaxxee Duuchchi Woddik Gootti iso'ni halo fule aneenna erganjo isika dedhakenaa'n heqqeemmaxxee, Duuchchi Woddiki Gootti saademowwaal. Isi Naabali'i isixxe fuggoxxe huje'a xixeeni» hiyye.

Ookkoneechchi uduma Daawwiti Abigeeli aadho'a hasa'neexxa kulo'a manjo ise'ni erge. 40 Erganjuwwi isikinna Qermeloosi Abigeeliba mareexxii, «Daawwiti atee aadho'a hasemmaxxee atiba'a no'o ergammale isibaa atee adhdhine me'inonna'a dangeennen» isee hiyye.

41 Abigeelinna buttinake'n albiki gonbisende anga iimi'a ke'isitee, «Ani anke goottixxe erganjon, anke goottike erganjuwwixxa lekka anshatee qophpheffateennen» hite. 42 Isenna rakke harricho gulufeexxi onde ise'a hujammaxxa garboole adhdhiteexxi Daawwitike erganjuwwinni welti me'ite Daawwiti'ni heerunde.

43 Daawwiti edi darre Iyyizira'eelixxe sanne kadeexxa Ahino'aamii'i aadheemman; ta'anna kinni lebbeexxi Abigeeli'i aadhe. 44 Sa'ooli belto ifixxa Daawwiti aadhemmaxxa Melkoolii'i Gaalimi ilemeeka Leessake belto Feeliixi'n heerunsiiseemman.✝