1 Saamu'eeli Sa'ooli hiyyee qici, «Isira'eelike ardi'a ate harrire moyaanjoke assanoshsha Duuchchi Woddiki Gootti Ergeemmak anten; ta'anna lumok Duuchchi Woddik Goottik hiyyaaxxa laqi.✝ 2 Isira'eeli Gibtsee'n fuldee wodda Amaaleeqik ardi orake'n lola'ni rakkissemmaxxee Dada Duuchcha ajajake Duuchchi Woddik Gootti Amaleqika manna mura woxisatee mudhdheen.✝ 3 Ta'a maritettexxi Amaaleeqika manna koli; anfeechcho duuchcha kutti assi; mitteelchonna gatissoxxee; labbakanna meyyaaka, oosuwwatanna unnoole, lalo, gedhebo, gaaluwwakanna harre shilte biri.»

4 Sa'oolinna ifika loliinka manna mitteba ye'ee bukki asseexxi Xeeleemi hiyyemaaba laakko'e; insa'nek laakkossinna Isira'eelike manninaa'n lame dhibba kuma lekkatika loliinka manna Yihudakenaa'n tomme kumma loiinka mannamman. 5 Ookkoneechchi uduma Sa'ooli ifike loliinke manninni welti Amaaleeqike qachchibaa mareexxi wode'i hedhebaaxxe dhooqa giddo riphe gaade. 6 Isinna Qenaanika manna «Isira'eelik ardi Gibtsee'n fulee wodda eloxxa insaa'ne'aa assitineemmaxxe insa'nenni welti ha'noo birabo'noshsha Amaaleeqike manni giddi'n fuldine me'we» hiyye kule; tennexxe Qanaa'nik manni Amaaleqike manni giddi'n fule me'e.

7 Sa'oolinna isika loliinka manna Amaaleeqika manna Hawila hiyyendaaxxe bakkanaa'n Gibtsee'n boroti darree'n hexxeexxe Suuri hiyyendaaxxa bakka qico'n lolle. 8 Amaaleeqika moyanjo Agaagii'i lubbondinni hedhee'naa booji'eexxi, arda duuchcha wolaantichchiki bire. 9 Yaane kinni Sa'oolinna isiki loliinki manni moyanjo Agaagii'i lubbondinni waale; iittanni munde afeeka gedhebo, ha'iteexxa jibootanna ha'yiteexxa koromme, buruussuwwa, wele elo eloochcho duuchchanna balleessineba'a; insa'ne balleessineechchi la'o afebaachchonna tuffatemeechchuwwa callamman.

10 Duuchchi Woddik Gootti Saamu'eeli, 11 «Sa'ooli anee wale'een; ajaja ankanna heqedha gopheemmaxxee isoo moyanjoke asseenexxee yo'oshsha yade'ennen.» Saamu'eelinna tennee yanee'a mufateexxi hashsha duuchcha Duuchchi Woddika Gootta soodate. 12 Gorsa bariisa ke'eexxi Saamu'eeli Sa'ooli hedheebaa mare; mitti mitti manni iso'ni, «Sa'ooli Qermeloosi qachchi'a me'een, ifike umike ulfinniinxe qallii kaddaaxxa soodo ookko uurriseechchi uduma Geligeelike qachchika adadde me'een» hiyye. 13 Saamu'eeli Sa'oolibaa mare; Sa'oolinna, «Koo Saamu'eel! Duuchchi Woddiki Gootti atee eebbisoo; aninna Duuchchi Woddike Goottika ajaja muuxxeenenni» hiyye.

14 Yaane kinni Saamu'eelinna, «Eega tinni laqaannexxi laliinxe korommexxi barochchonna gedhebiinxi ma'la maachchota?» hiyye qore.

15 Sa'oolinna, «Kunni hori anki loliink manni Amaaleqike mannanaa'n booji'eken; insa'ne munde afeeka laluwwanna gedhebo Duuchchi Woddika Gootta attike Mageni'a tolchaakee iyyedageeken; no'o gateechcho kinni duchchinigelcho kutti assine'een» hiyye hiisse haaso'e.

16 Saamu'eelinna Sa'ooli, «Sammi hiyyi! Duuchchi Woddik Gootti yebeno hashsha ane'n kuleexxa ate'n kulo» hiyye.

Sa'oolinna «kulitaa» hiyye hiise haaso'e.

17 Saamu'eelinna hiyye hiissee qici, «Ati ifi shiixxishshe uuddotolenna Isira'eelixxe gosake minnuwwike akeeksanjo kadde'eten. Duuchchi Woddik Gootti atee hariireexxi Isira'eelike moyanjo asse'een. 18 Cubbaaleessa kadeeka ookkonee Amaaleeqika arda biritattoshsha atee ergeen; mundaa qico'ninna insa'ne shilte birtattoshsha atte'n kuleen. 19 Egedhita mayee Duuchchi Woddike Gootti'a ajajema gibbete? Alfitattoxxe la'o'aa booji'ememmachchuwwi'a haafende Duuchchi Woddika Gootti edo mayee fuggoxxa assitette?»

20 Sa'oolinna hiyye hiisse haaso'ee qici, «Ani Duuchchi Woddike Gootti'a ajajeme'enen; hiyyemmashshanni duule'ennen; Amaaleeqika wele manna shiyye birennexxi moyanjo Agaagii calla booji'e aadhe dagennen. 21 Yaane kinn anki lolinki manni booje'ememmachchuwwinaa'n silaati shiyemammaka munde afeeka gedhebonna laluwwa shiya waaleexxi Geligeela Duuchchi Woddika Gootta atike Mageni'a tolcho'a iyyedage'een.»

22 Saamu'eelinna hiyyee qici:

«Duuchchi Woddike Goottike hiyyichchi'a ajajemate'n gammada qicishsha; Duuchchi Woddik Gootti,

isi'a uuwwendaaxxe midhatixxe uwwuwwa'ninna tolchuwwa'ni gamadaachcho labbee?

Kunnisse! Magenokee ajajensha isi'a uunaaxxe uwwanaa'ni;

hiyyaaxxa caqasatinna gedhebiinke korbeesike ha'yonaa'n saxxaan.

23 Duuchchi Woddike Gootta'n jallata morsiilsatixxe cubbinn qixxeten,

hollaati ifi saada fakkuwwa magenoonfatatixxe cubbonni qixxenden.

Ati Mageniinka hiyyichcho tuffatettaxee, isinna ati moyanjo kaddaboxxoshsha atee tuffate'een.»

24 Sa'oolinna Saamu'eeli'n hiyye hiisse haaso'ee qici, «Eetti ani cubbo hujeenneni; Duuchchi Woddike Goottika ajaja sa'ennen atika hiyyichchonna heqqedhebe'noni; anka lolinka manna sodaate insa'ne hineexxa duuchcha assenneeni. 25 Ta'a balleesseennen ani'a gattowwaali hitotta'a ate'e kadhataannen; Duuchchi Woddika Gootta magenoonfatonna'a aninni welti Geligeli'a illee iima higi.»

26 Saamu'eelinna isoo, «Ani atinni welti ileema higabe'non; ati Duuchchi Woddike Goottika ajaja tuffateeten; Duuchchi Woddik Goottinna Isira'eeli'n moyanjummati hexxabexxoshsha atee tuffate'een» hiyye.

27 Ookkoneechchi uduma Saamu'eeli Sa'ooli birii'n ke'e me'o'a wiri hiyye; Sa'oolii kinni me'abaashsha Samu'eelixxe seemmaka kasa abidee wodda seemmatinna haaqi hite. 28 Saamu'eelinna Sa'ooli hiyyee qici, «Telcho Duuchchi Woddik Gootti Isira'eelixxe mootummaxxa galcha atenaa'n haaqi asse aadheexxi atenaa'n woyyo'aake atike ollalchi'a uwwe'een.✝ 29 Isira'eelik ulfaatek Mageni isi manjishshatebaan; isi sobabaa, lame afo'onna haaso'aba'a; isi manjoke kada gophemmaxxeenna yaada ifika jijiirabaan.»

30 Sa'oolinna hiisse hiyye haaso'e qici «Ani cubbo hujenneen; ate kadhataanexxi anke ardike akekisanjuwwi edonna Isira'eelike ardi duuchchi edo anee ulfeessi; Duuchchi Woddika Gootta atika Mageno magenoonfatonna'a aninni welti Gelgeli'a illee iima higi» hiyye. 31 Tennexxe Saamu'eeli isinni welti Gelgeli'a me'e; Sa'oolinna Duuchchi Woddika Goottta sagade.

32 Saamu'eelinna «Amaaleeqika moyanjo Agaagii'i kabaa iyyedag!» hiyye ajaje. Agaaginna alaayye culphisa'n isiba'a dage; Agaaginna godobi giddo «Dugaandinni reyo iitta qarara'neechcho!» hiyye.

33 Saamu'eelinna,

«Ati wolantichcho atiken amuwwa oose belo gatissetteshsha

ama atixxinna wele meelalle giddi'n oosebelo gate» hiyye;

Ookkoneechchi uduma Saamue'eeli Geligeela Duuchchi Woddike Gootti'a tolcha tolchimalchii edo Agaagii'i kochchise.

34 Ookkoneechchi uduma Saamu'eeli ifike minibaa Raama'a me'e; moyanji Sa'oolinna ifike minbaa Gibi'a hige. 35 Saamu'eelinna hedhoti hedhemmake baro duuchcha'n langaxxa Sa'ooli'i uudebaan. Yaane kinni isi'a hinqilfatee oodhaamman Duuchchi Woddik Gootti Sa'ooli'i Isira'eelike moyanjo assemmaxxee yo'oshsha yaade'emman.