1 Haannanna soodata'n hitee qici:

«Ani yo'oshsha Duuchchi Woddike Gootta'n gammadeenneni;

Magenik hunna anxi jabaateen.

Naapha anikanna oso'lannon;

anee anjirtetexxee gamadannon.

2 «No'oke Duuchchi Woddike Gootta Goottishsha woyyichchi hedhebaan;

ati gadho weli hedhebaan;

no'oke Magenishsha hedheek golli hedhebaan.

3 Hollammak manni hollatika haaso'a waalowwaal;

Duuchchi Woddik Gootti Mageni duuchchinxa ege'ne'een;

ardi hujaaxxa duuchchanna muraan.

4 Duuchchi Woddik Gootti jajjabbi Lolinke mannixxa gabuwwa enqe;

gophaaleeyye kinni hunna labbe.

5 Goddeemmaki manni, itaachchi'a manni hunda huje;

yaane kinni solo'we hedhemmak manni godde;

ila afeemmabaaxxi torbaane oose ilde;

heddo oose affeemmaxxi kinni oose belo gatte.

6 Duuchchi Woddik Gootti shiyaan, hedhotanna uwwaan;

buttin hundi darre reyemmak manni hedhemmaba sa'isaan;

ookko'ninna fulchaan;

7 Duuchchi Woddik Gootti dureeyye hiyyoonsaan; hiyyeeyyetanna duuroonsaan;

salphisaan; ulfantashshanna assaan.

8 Isi hiyyeeyye hiyyummatenaa'n fulchaan;

rakkiyyetanna rakkotenaa'n gatiseexxi

ja'labuwwik insa'nee offo'lishaan;

ulfiniinka booncho insa'nee dhalchisa;

Duuchchi Woddike Goottan buttati hundika utuphuwwa giiseek;

konne uutuphuwwi hana buttatanna dadeeki isoten.

9 Mageni isi'a addatemeeke mannixxa hedho heqqaan;

fuggaaleeyye kinni buttin hundi darre reyemmak manni hedhemmaba sa'issaan.

«Manji hunna ifixxi injiffachcho alfabaan;

10 Duuchchi Woddike Gootta'n morkaakiir bullo'aan;

isinna insa'ne'n iimi'n dindimaan;

Duuchchi Woddik Gootti butta duuchcha'n hedheekeni muraan.

«Moyanjo ifikeenna hunna uwwaan;

hariire moyaashsha assekeenna hunna lebaan» hite.✝

11 Ookkoneechchi uduma Hilqaana mini ifikiba'a Raama'a higeexxi me'e; shixxok belti Saamu'eeli kinni qeesichcho Eeli hunda Duuchchi Woddike Gootti'a ergatema'nemman.

12 Eelixxi labaxxi oose Duuchchi Woddike Gootti'a ajajendaammabaaxxe fuggaaleeyyemman. 13 Qeese barateemmak adabishshanni assitaamma qici, manji mitti tolcha shiqishshaa wodda gafememmak maali ra'ate'n hedheena'a qeesichching erganji sase ottisanjik sibilinke qalasuma aadhe dagaan; 14 Ookkone ottisanjinke qalasuminni disiteti giddi'n yookaan meshshe giddi'n yookaan waabi giddi'n yookaan huburi giddi'n hoole fulcheeka duuchcha qeesichchi ifi'a adhdha'emman; tinni yaane Seelo'a dageexxi tolcha tolchammake Isira'eelike arda duuchcha'n assendaammexxeman. 15 Iittanni ha'yyi ciincessemebaa edo qeesichchink erganji dageexxi tolcha tolchammaka manjichcho «Qeesichchi inqaka maala malee gafeemeeka atenaa'n aadh agophaammaxxee isi'a dudhishonna'a inqaka maala ane'n uwwi» hiyya'emman.

16 Manjichchikinna, «Ediseexxi ha'yi ciinceessemee'naa ookkenneechchi uduma ati eetetteka adhdhitato» hiyyeele midde qeesichchink erganji, «Waawo'a ta'anni ane'n uwwi! Gibottole kinni hunnati atenaa'n aadhannon» hiyyamman.

17 Konne qicinni Duuchchi Woddike Gootti'a shiqaammaka tolcha shollisha'emmaxxee Eelixxe oosexxi cubbo Duuchchi Woddike Gootti edo ha'urteemmaxxemman.

18 Saamu'eeli kinni oosummande'n suqqendeexxi ganendeexxa seema* odo'wee Duuchchi Woddike Gootti'a erigatema'nemman 19 Ama isixxinna wogga wogga'ninni aro'ik welti woggatika tolcha shiqishatee me'itaa wodda duuchcha oddoonoti hana lebeme oddo'wemmaaka kaabba qopheessita'n isi'a iyyemarta'emman. 20 Eeli, Hilqaananna isixxa are Haanna'a, «Duuchchi Woddike Gootti'a gargar foyemeeke kadaashsha werreege uutemmake beltixxe bakka'n ati'a tenne manjichchonaa'n wele oose uwwoo!» Hiyya'n eebbise.

Ookkonechchi uduma insa'nenna mine ifikiba'a hinga'emman.

21 Duuchchi Woddik Gootti Haanna'a eebbisee; tennexxee wele sase labbaxxa oosenna lame dubarra ilde; shiixxoki belti Saamu'eelinna Duuchchi Woddike Gootti'a ergatema'n nophphe.

22 Eelinna eettene yanna yo'oshsha cimeemman; Oose isixxinna Isira'eelike arida'n assita'neexxa elobaaxxa yaane, afenshatixxe dunkaaniinxe hula edo erigatendaammaxxe melaallenni welti yabaabuldeexxa laqe. 23 Tennexxe insa'ne hiyyee qici, «Mayee tenne elobaaxxa yaane assitina'ne? Assitina'neexxa elobaaxxa yaane duuchcha duuchchinge Manjonaa'n laqeennen; 24 Anixxe labbaxxe oose! Duuchchi Woddike Goottike ardi gido ha'noxxee haaso'enda'neexxi odo eloxxebaan iitta hexxeexxa elobaaxxa yaane walle hujjinoqqe'e! 25 Mitti manji mitte manjo balleesoole, Mageni oddote'n e'ye muraan; yaane kinni manji Duuchchi Woddika Gootta balleesoole ayyete isoo Duuchchi Woddike Goottinni araarsaa?» Hiyye. Yaane kinni Duuchchi Woddik Gootti insa'ne biro'a hasemmaxxe Eelixxi oose anniinka gorsa adhdhiteba'a.✝

26 Shiixxok belti Saamu'eeli kinni hojjati nophpha'n, Duuchchi Woddike Gootta'ninna Manjoke'n eeyyemeeke kade.

27 Duuchchi Woddike Gootti ergemeeki mitti wabeek Eelibaa dageexxi iso'n hiyyee qici, «Duuchchi Woddik Goottinna: ‹Atik hundayyetike annixxi horte Gibtseke boga'n Feri'oonixxe anga'n garba kandeexxi hexxamma wodda ani insa'nen leellennen; 28 Isoo Isira'eelixxe gosake minuwwinaa'n anke tolchimalcho'n hixxaana gubaashsha, ani edo Efuude odo'waashsha, anke qeesichcho kado'a fi'lennen; hundaayyetike atike annixxe oosenna Isra'eelik ardi shiqishaaka ciincatika tolcha insa'ne'a uwweennen.✝ 29 Anke kakotike Taabotike galduma'n shiqaashsha ajajenneka tolchanna uwwa tuffatineechchi mayeete? Atinna atixi oose Isira'eeli ank ardi shiqishemmake tolchinaa'n elo eloka ittinee furdatiyyoti anee irra oose atixxa mayee ulfeesitette?›

30 «Tennexxee Duuchchi Woddik Gootti Isira'eeliki Mageni hiyya'nee qici: ‹Atik mini hadinna atike hundaayyeke annik mini hadi duuchchi wodda ani'a ergatendinaan hiyyee addachchiiseennani: ta'a kinni iitta kaddabaan; Anee ulifeessaaka ulfeessannoni; anee tuffataaki tuffatemaan. 31 Laqi; atike mini hadike daali giddo mitti manjinna cimoti qico'n hedhabaashsha atika mini hadonna atike annuwwika mini hado shiyye birannoxxi yanna shiqqa'neen. 32 Ane'e magenooffachotixxe bakka'n ate'n abarate geltaan; Isira'eeli giddo eloxxi yaane kadaa woddanna midde atike mini hadi giddo mittikinna cimoti qico geyaaki afemabaan. 33 Anke tolchimalcho'n ergatendina'neeke atike manji giddi'n lubbo gataak mitti manji ooxxa'na'a ille atixxi garjitaashshanna godoba atee boorossaake kadaan; tinninna ati'a beessissake kaddaan.

34 « ‹Atixxi laminxi oose Hofiininna Finihaasi mitte barra'n wolatichchoke'n mundaaan; tinni ati'a bessissake kaddaani.✝ 35 Godobi anki gammadaaxxa assaka addatemeeka mitte qeesichcho fi'lannon; isi'anna ani hariirenneke moyanji edo ergatenda'n hexxaaxxa horte uwwannon. 36 Atixxe horte giddi'n lubbo gataak duuchchi ookkone qeesichchiba mareexxi guluffatee anga bane'e maallaqakanna itaachcho isoo kadhataan; Barratixxa ita alfonna'a maganneten qeesumma atix hunda ergatemo'a eeti'i ani'a uwwi.› »