1 Sa'ooli moya safaa wodda wagga isixxi sase tommemman*; Isira'eelinna shoole tommenna lame wogga moye galche. 2 Sa'ooli Isira'eelike ardi giddi'n sase kuma manna file; insa'ne giddii'n lame kuma manna Mikimaasininna koobatike boga'ni Beeti'eeli Sa'oolinni welti hedhemme; mitti kumi manni kinni Biniyaamixxe galcha giddo Gibi'a Yoonataaninni welti hedhdhemmani. Gatemmaka manna kinni ifi ifike miniba'a me'aashsha asse.

3 Yoonataani Gibi'a hedhemmaka Filsixeemike lolinke mannixxa kaanbe loleexxi heddo lolii manna shinne; Filisixxeemik manninna tenne odo laqe. Ookkoneechchi uduma Sa'oolinna, «Ibirito laqqowwaali!» hiyyeexxi bogga duuchcha'ni malagata ufuunfaashsha asse. 4 Tennexxe Isira'eelito duuchchi «Sa'ooli Filsixeemike loliinke mannixxa kaanbe lole heddo manna shiyye; Filisixxeemito Isira'eeli'i bobbeechishsha boshshexxe» hiyyendaaxxa odo lanqe; Sa'ooli Isira'eelitotik loliink manni isinni Geligeela bukki hiyyo'a ajaje.

5 Filisixeemik manninna Isira'eelito lolemo'a bukki hine; insa'nenna sase tomme kuma fadhadinxa gaarenna jaane kuma sarageelluwwa lolliinka manna, abbaayyatike maanchishsha laakkossi bira sa'eeka lekkatika lolliinka manna adhdhine Isira'eeli lollo'a bukki hinne; insa'nenna alaalle qabante Beeti'awwee'ni boroti daree'ni hexxexxe Mikimaasi hiyyendaaxxa kaamibe giisse'ne ofolle. 6 Isira'eeliki manni hedheeki jeeji yo'oshsha sodaachchisaake kadeexxanna insa'neki lollinki manninna jabbaxxe weekenshsha giddo hedheexxa uudee wodda wolo'uwwa giddo, ko'mo'lichuwwi giddo, lumollamma kinoxxe oddo'n baluwwa giddonna dareeruwwi giddo sho'omme. 7 Ibiritotike mannanaa'ni mitti mitti manni Yordaanoosika galaana foofeexxi Gaadikenna Gele'adike bogibaa me'e.

Sa'ooli kinni Geligeelanni ture; isinni welti hedhemmak lolliinki manni duuchchi sodaate culphisa'emman. 8 Sa'oolinna Saamu'eeli isoo ajajeemmashanni torbaane barra Saamu'eel'i dagaaxxa heqqe, yaane kinni Saamu'eeli Geligeeli'a dageba'a; Sa'ooliki lolliinki manni xexxeremate'ni ke'e.✝ 9 Tennexxe Sa'ooli arda, «Ciincatika tolchanna mittoominka tolcha iyyedage» hiyye. Ciincatika tolchanna tolche. 10 Isinna tolcha tolche ke'eeshshani ikki woddi Saamu'eeli ookko ge'ye; Sa'oolinna gadhi'a fuleexxi isoo nage'a aadhe. 11 Saamu'eelinna, «Assitetechchi maachcho?» hiyye isoo qore.

Sa'oolinna iso'n hiyye hiisse haaso'ee qici, «Ard anee waale'e me'o'atemman; atinna dagannoni hiteteexxe yaanna'n dagebexxon; iittanni Filisixeemik manninna Mikimaasike booncho'ni bukki hiyye'na'a uudenneni. 12 Tennexxee ‹Filisixeemik manni adaadde Geligeela anee lolo'a dagoole aninna Duuchchi Woddika Goottika gargaarsa laqedhebe'non› hiyye hedenneni. Tennexxee yaadi anki ciincatika tolcha tolchanoshsha asse» hiyye.

13 Saamu'eelinna isoo hiyyee qici: «Ati gowwummatixxe huje hujjeten; Duuchchi Woddik Gootti atik Mageni ati'a uwweeka ajaja heqqexebexon; heqqexxeetexxe kaddeele isi mootuma atixxa Isira'eeli'ni duuchchi woddi'a hexxeeshsha assamman. 14 Ta'a kinni mootumma atixxi hegere affabaan; kunnisse Duuchchi Woddik Gootti ifike godoba'ni aagaka manjo alfe'een; ati Duuchchi Woddik Goottika ajaja heqqedha gophphetaxxee isi ifike ardiinke akeekisanjo kado'a isoo fi'le'een.»✝

15 Ookkonneechchi uduma Saamu'eeli Geligeela'n ke'eexxi Biiniyaamixxe galcha giddo alalle Gibi'a me'e. Sa'oolinna isinni welti hedhemmaka manna laakko'e; laakkossi insa'nekinna jaane dhibba kade.

16 Filsixeemito Mikimaasi bukki hiteemma wodda Sa'ooli, belti ifiki Yoonataaninna insa'nenni welti hedhemmaaki manni Biniyaamixxe galcha giddo hexxeexxe Geba'i hinaaba he'nemman; yaane kinni Filisixeemik lolliink manni Makimaasi kaanbe ofo'lemman. 17 Sase kanbe'n qoqqoodemeek lolliink manni Filsixeemitotixxe kaanbenaa'ni fule; taakaxxe kutaki manni Sogaalike boga'n hedheek Ofira'a me'e, 18 wele kutaki manni Beetihoroni'a, sakkaxxe kuta manni kinni qiilla gammoojje edi darre hexxeexxe Siboyimmixxe Dhooqanaa'n adadde hexxeexxe gabalaba'a wirri hine.

19 Filisixeemito, «Ibirito wolaantichcha yookaan bagedo ifi'a giise'noqqe'e» hiteemmaxxee Isira'eelike boga duuchcha'ni sibilo tumaaki manni afemebaan. 20 Tennexxee Isira'eelito duuchcha qottisanjo sibiljo (Maarasha), qottuwwa gangansiilso'a, meesanuwwakanna haanituwwa gangansiilso'a Filisixeemitotibaa adadde dirrinaamman. 21 Qottotika sibiljonna qotto gangansiisatee uunamaki hiri shoole giraama biretike sibiljo kadaa wodda meesano iitanni qottotika sibiljo gangasiilisatik hiri kinni saddeeta giraama biretike sibiljomman. 22 Tennexxe Filisixxeeminna Isira'eeli lola inbeexxa barra Sa'oolinna belto ifike Yoonataani gadho insa'ne'ni hedhemmake loliinke manni giddii'ni wolaantichcha yookaan bagedo abixeeki mitti manjinna hedhemmabaan.

23 Ookkone wodda Filisixeemitotik loliink manni sannachchi Mikimaasixxe xurreba'a fuleemman.