1 Ookkoneechchi uduma Saamu'eeli ejersiinxe zayitexxa buuda aadheexxi zayite Sa'oolike umo'n hana dune isoo sunqedhe hiyyee qici, «Duuchchi Woddik Gootti isika arda Isira'eeli'i galchitota'a atee hariiredheen. 2 Techcho ani birii'n gargarti higgatoxxa yanna Biiniyaamike bogixxe gabalaa'ni hedheeke Tseltsahi hiyyemaake boonchcho'ni Raaheelike hirreesi bira lame manninni afendatton; Insa'ne atee, ‹Ati hassaatexxi harruwwa afende'een. Anni atik Qiishi harruwwaatixxee heda waaleexxi, «Belto ankixxa yaane maa assennexxa woyya?» hiyyati ta'a qodhdhate'n hedheen hinaan› ate'n kullaan.

3 «Ati ookko'n saxxetexxi Taaboori hedheeke lumooke haqichchiba me'itatton; ookkonna sase manna, mitti sase re'etika buruusuwwa ga'na'n, langaak sase kebbo anga abixxe, sakaaki woyinetixxe bookaxxa qalqallo dulkeexxi Magenokee tolcha tolchatee alaalle Beeteli'a me'a'ni atinni afemaan. 4 Insa'nenna atee nage'a aa'neexxi lame kebbo ati'a uunaan; atinna insa'nenaa'ni aadhitatton.

5 «Ookkoneechchi uduma Filisixeemik loliink manni hedheeba Gibi'a hiyyendaaxxe Mageniinxe koobabaa martatton; qachcha gelteteshshanni raagoletixxi tuuta kiraara, okole masinqonna lumoka kiraara ganda'n, suusu'le ufuufaa'n raaga raanga'n tullichchii hana tolchinammaxxe bakkanaa'n adadde daggaa'na'a afendatton. 6 Dedhange'n Duuchchi Woddike Goottik Hafuuri ate'n hunnati dirraan; atinna insa'nenni welti raaga raagatton; atiinna jijjirende wele manjonna kaddatton. 7 Kunni beessisuwwi muuxxemaaxxa yanna Mageni atini welti hedhemmaxxee assiyyo dandeetattoxxa duuchcha assi.

8 «Ati ani'a edisetexxi adadde Geligeeli'a me'i; aninna ciincatika tolchanna mittummatika tolcha tolchona'a atiba'a dagannon yaane kinni atiba dageneexxi maa assitattoxxa ate'n kulanno qico'n torbaane barra turiyyo hassisaan.»

9 Sa'ooli Saamu'eelinaa'ni garigari higee me'o'a ke'eshaanni Mageni Sa'ooli'a haaroka adaba uwwe; Saamu'eeli kulemaki beessisi duuchchi eettene barra'n muuxeme. 10 Sa'oolinna isiki erganji Gibi'a gennee wodda raagolettixxe tuutanni welti afemme; Mageniinki Hafuuri Sa'ooli'n hunnati dirre'na'a isinnna insa'nenni welti raaga raage. 11 Edi wodda isoo egge'neemmaki duuchchi wabeekoti welti raaga raaga'naa anfeexxa yannna weli'anni weli «Qiisike belto'ni maa dagee? Sa'oolinna wabeeka kade?» hine. 12 Ookko hedha'neeki mitti manjichchi hiisse haaso'e, «Insa'nek anni ayyete?» hiyye. Tennexxee, «Sa'oolinna wabeekotixxe gamonaa'nite?» hiyyemaak mammaasi mammakeme.✝ 13 Sa'ooli raaga raage ke'eechchi uduma tullichchake'n hedheeke tolchimalchiba'a me'e.

14 Sa'oolike anniki dayyi, Sa'oolinna erganjo isika, «Haba hexxinema?» hiyye qore.

Saa'olinna, «Harre hasito me'ineennan; yaane kinni harre afendabaaxxa egennene wodda qortetee Saamu'eeliba marreennan» hiyye hiisse haaso'e.

15 Sa'oolike annik dayyinna, «Saamu'eeli ati'n kuleexxa ane'n kuli» hiyye.

16 Sa'oolinna hiisse haaso'e, «Harruwwa afendeexxa no'o'n kokeesse kule'een» hiyye. Yaane kinni Saamu'eeli mootummatixxa yaane anniike dayyo'n haaso'eba'a.

17 Saamu'eeli Isira'eelik arda Duuchchi Woddike Goottinni afemo'a Mitsipha'a ye'eexxi, 18 insa'ne'n hiyyee qici, «Duuchchi Woddik Gootti Isira'eelik Mageni hiyya'nee qici, ‹Ani Isira'eeli'i Gibtsee'n fulchennen; Gibtsexxe hunnaa'ninna ha'no wele gosa gosake miicama duuchchinaa'n ha'no anjirennen.› 19 Telcho kinni ha'noxxe rakkonaa'ninna abara duuchchanaa'n ha'no'o anjiraaka, Duuchchi Woddika Gootta ha'noka Mageno tuffatineexxi, ‹Waawo'o, Moyanj no'o'n moyaashsha assi› hitineen. Tennexxee ta'a ha'noo, ha'noke gosatike minimininna aanchi anichinni Duuchchi Woddike Gootti magenoonfantamaba'a shiqqe.»

20 Ookkineechchi uduma Saamu'eeli mitti mittiniinge Isira'eelixxe gosak mini hadi duuchchi magenoonfachchotee shinqee wodda Duuchchi Woddik Gootti Biiniyaamixxe gosak mine fi'le. 21 Higgeenna Saamu'eeli Biniyaamike gosatika mine anchi anchinni shiqishee wodda, Maxiirik aanchi fileme. Muuxamake'n Sa'ooli Qiisik belti fileme. Yaane kinni iso'o hansee wodda isi afemeba'a. 22 Tennexxee ardi higgeenna Duuchchi Woddika Gootta, «Manjichchi kaba dage'ee?» hine qorre.

Duuchchi Woddik Goottinna, «Eeti, Sa'ooli mi'yi giddo sho'omedheen» hiyye.

23 Insa'nenna gongine marreexxi sho'omebaa'n aa'ne iyyedange, isinna ardi giddo uurree wodda wele ardi duuchchinaa'n agoodik alalle tataagichcha hoja qeerakemman. 24 Saamu'eelinna arda duuchcha, «Duuchchi Woddik Gootti fileeka manjichcho uddineen? Ardi duuchchinaa'n isinni qixxo'aak mitti manji hedheba'a» hiyye. Ookkoneechchi uduma Ardi duuchchi hafuura gikki asseexxi, «Moyanji lubbo galowwaal!» hiyye.

25 Saamu'eelinna moyanjokee assemiyyo hassisaaka seeranna aada ardake'n barrise kuleechchi uduma ookkone seeranna aada maxaafake'n borreesseexxi Duuchchi Woddika Gootta magenoonfantammaba ugge. Ookkoneechchi uduma Saamu'eeli arda wocci assee'naa'a ifi fike mininbaa me'e. 26 Sa'oolinna Gibi'a ifike minba'a me'e; Mageni qalbe insa'nexxa ke'iseek jajjabbi manni Sa'oolixxa duuka me'e. 27 Yaane kinni mitti mitti wayi fulabaak manni, «Kunni manjichchi naaphakenaa'n no'oo dande'e anjiraa?» hina'ni isoo tuffante. Uwwatanna isi'a uuneba'a. Sa'ooli kinni sammi hiyye.