1 Daawwitinna isixxa duuka me'ammaki manni sakkaxxe barra'n Tsiqilaagi gennee wodda; Amaaleqik manni bita'i darreka boganna Tseqilaagii'n duuleemman; Tsegilaaginna lolle miinee qachchakanna gunbe. 2 Melaalle dargageeyyenna geedhuwwa duuchcha boojine adhdhine me'ine; boojineechcho adhdhine me'ine malee mittikinna shinneeki hedhemmabaan. 3 Daawwitinna isinni welti hedhemmaki manni ookko geyee wodda qachcha gunbe birree; aruwwa insa'neexxa, labbaxxanna meyyaxxa oose boojine adhdhine me'ineexxa egenne. 4 Daawwitinna isixxa duuka me'ammaki manni qonqo insa'neexxi sheeritaa qico'n hafuura gikki assine oo'ne. 5 Laminxi Daawwitixxi are Iyyizira'eeli bogixxi Ahino'aaminna Qermeeloosi bogixxi Naabaali adhdhemaxxa Abigeelinna bojinemman.✝

6 Manni duuchchi labbaxxanna meyyaxxa oose insa'neexxa boojinemmaxxe daafe'a yo'oshsha aarremmaxxee isoo kinjik cancanqo'a mari'antemmaxxe Daawwiti lummoxxe rakko giddo hedhemman. Isinna Duuchchi Woddik Gootti ifiki Mageni jabeessaaxxa ege'ne. 7 Daawwitinna Abemelek belto qeesichcho Abiyataarii'i, «Efuude ani'a iyyedagi» hiyye. Abiyatarinna efuude iyyedage.✝ 8 Daawwitinna, «Ookkonne saamemmaka manna shorre abido?» hiyye Duuchchi Woddika Gootta laqedhe.

Magenikinna, «Shorrite dhaqqabe'e booji'ememmaka manna hiissitaton» hiyye isi'a hiisse.

9 Tennexxe Daawwitinna jaane dhibba geyaake isixxa duuka me'ammake manninni fullee me'ine; Biisoori hinaake wode'i bira gennee wodda, shiixxoki manni hafuura adhdha'n ture. 10 Daawwiti kinni shoole dhibbi manninni welti shorricho safe;; weli lami dhibbi isoo hordofammaki kinni wode'e dande'enne foofa gonphemmaxxee udumanni gante. 11 Mitti Gibtseke bogiki dargaggeessi qiilla gammoojjenaa'n daga'naa anfeexxi Daawwitiba iyyemarre; insa'nenna itaachcho uune'na'a ite; wode'ekanna ha'we. 12 Baggeexxa balasetixxa gummanna lame woyinetixxa gummaxxa rodde uune; dargaaggeessi ite ke'echchi uduma jabaate; ookkoneechchi edi gama sase barranna sase hashsha midhatanna wode'e afo'oke'n maqeechchi hedhemmabaan. 13 Daawwitinna darrgaggeessa, «Ati ayyike erganjo? Daggetebi haba'nite?» hiyye iso'o qore.

Dargaaggeessikinna, «Ani Gibtseke bogike manjon; mitte Amaaleqichchi'a ergatemaanneken; ela gophennaxxee sase barra edi gama gootti anki anee hune me'een; 14 Kelitotika bita'i darreka boga, Yihudaka boganna Kaalebika bita'a lollee Tsiqilaagika qachcha gunbennen» hiyye hiisse.

15 Daawwitinna, «Ikki saamemmaki manni hedheeba no'o iyyemara dandeetatto?» hiyye qore.

Dargaaggeessikinna «Anee shiya waalde anke goottixxe anga'n sa'issite uutaboxxoshsha kakatottole leellishannon» hiyye hiisse. 16 Ookkoneechchi uduma Daawwiti'i saamemmaki manni hedheeba iyyemare geesisse.

Saamemmaki manninna erqenna kayya xexxeremee ita'ninna ha'wa'ni gammada'n hedhemman; Filisixeemi'ninna Yihudaa'n boojineexxi booji'o yo'oshsha lumoxxemman. 17 Daawwiti eettene hashshanaa'n gorsi qico'n lolee insa'nee miidhe; gaala guluffe baqatte fuldeexxa shoole dhibba dargaggeeyye malee okkone saamemmake manni giddii'n mittikinna baqate fuleeki hedhebaan. 18 Daawwitinna Amaaleeqik manna booji'e adhdhe me'emaalcho manjokanna karra duuchcha, iittanni laminxa are isixxanna hiissedhe. 19 Mittilchinna gatebaangi Daawwiti isixxa duuka me'ammake mannixxa labbaxxanna meyyaxxa oose, iittanni Amaleqiki manni booji'e adhdhe me'emmalcho duucha hiisse. 20 Ittanni Daawwiti lalo Gedhebokanna re'e booji'e; isixxa duuka me'ammaaki manninna isi edo oofa'n «Kunni duuchchi Daawwiti booji'eechchon!» hiyye.

21 Daawwitinna Biisoorke lagi qarqara yo'oshsha gophee hafuura adhdhate'n gatemmake isixxa duuka dande'e me'a gophemmake lame dhibbi manniba'a hige me'e. Insa'nenna Daawwitinna isixxa duuka me'ammaka manna qophe'no'a dange; Daawwitinna insa'neba'a shiqeexxi nage'inginni hexxinee hiyye. 22 Yaane kinni Daawwitinni welti me'emmake manni giddii'n adaba eloka afebaak mitti mitti goofi manni, «Insa'ne no'onni welti lolinba'a me'a gonpheemmaxxee boojinennalcho insa'ne'a qoondabo'non; aruwwanna oose insa'nexxa calla adhdhine me'inowwaal» hiyye.

23 Daawwitinna hiyyee qici, «Anke dayyuwwa! Duuchchi Woddik Gootti injifachcho no'o'a uwweemmaxxee iitta assa dandetinabaan! No'o hedhoti he'nannoshsha assee saamemmaka manna injifantannoshsha hunna no'anna uwweeki isoten. 24 Ha'noo hitina'neexxa yaane ayyinna adhabaan! Uduma gatee miya heqqa'n turemmakinna iittanni loliiba'anna duuleeki duuchchi boojinemmalcho duuchcha qixxe qoodema hasissaan» hiyye. 25 Daawwitinna eettene barranaa'n ke'isse telchi qico'n Isira'eelike boga'n kunni seerinna galdumi hedhaashsha asse.

26 Daawwitinna Tsiqilaagi'a higeexxa yanna ifike jaaluwwi'a Yihudaxxe geedhe'a, «Tinni uwwa Duuchchi Woddike Goottike naaphuwwanaa'n booji'endeexxen» hiyya'ni boojinemalchonaa'n gamisa insa'ne'a erge. 27 Ookkone booji'emalchonaa'n Beeti'eel hedheekee, Yihudike bita'i darrexxe Raamaati hedheekeenna, iittanni Yaatirike qachchuwwa'n hedheeke ardi duuchchi'a erge. 28 Iittanni Aro'eerike, Sifimootike, Eshiteemo'ake boga'n hedheekeenna, 29 Raakaali hedheeke Yirahime'eelixxe sanne'anna Qenaanitotee, 30 Horima'ni, Boori'ashaanke, Ataakeenna, 31 Kebiroonike qachchuwwa'n he'naake duuchchi'a erge; iittanni Daawwitinna isixxa duuka me'ammaki manni mammaremeemmake boncho duuchcha'n hedhemmake manni'a uwwa erge.