1 Saamu'eeli 21

Daawwiti Sa’ooli Edii’n Baqate Me’eexxa

1 Daawwiti Noobi hiyyemaake boonchiba hedheeke qeesichcho Abemelekibaa me’e; qeesichchi Abemelekinna sodaate culphise Daawwiti’i qophedho’a fule mareexxi, «Mitti manjinna atixxa duuka hedhebangi qofitinni kaba’a daggetelchi mayeete?» hiyye qore.✝21:1 Mat. 12:3-4; Mar. 2:25-26; Luq. 6:3.

2 Daawwitinna qeesichcho Abemeleki’n hiisse haaso’ee qici, «Kaba dagennelchi moyanji Sa’ooli Daawwiti’ni ergeexxe erganiten; tennee ergeme dagennexxa yaane ayye’inna haaso’abo’noshsha anee ajaje’een; anke lolinke manna’inna mitteba afemannoxxa bakka haasone’ennen. 3 Kaddanaa’nni ta’a ati maa affe’etelchi hedhee? Onde xalta yookaan affetengelcho ani’a uwwi.»

4 Qeesichchikinna, «Gargar foyemeeka woyyichcha xalta kadoole malee ardi itaaxxi kebbo hexxebaan; atik loliink manni shiqoxxe yanna’ni melaalet welti galebaake kadoole konne xaltanaani itaan» hiyye haaso’e.

5 Daawwitinna qeesichchoke’n, «Baratendeeshshanni ergemme fullannoxxa yanna duuchcha aninna anke loliinke manni’a melaalle lagantanon; heenooxxe erga kaddaa woddanna midde ank loliink manni qullichchaken; telchota edixxi caala qullomabaata?» hiyye hiisse. 6 Qeesichchi Duuchchi Woddike Gootti edo eebbaka xalta uggiyyotee woyyichcha beernaa’n hoyye’emmaka xalta kadoole malee, weli xalti ookko hedha gopheemmaxxee ookkone gargar foyemeeka xalta Daawwiti’a aadhe uwwe.✝21:6 Lew. 24:5-9.

7 Sa’oolixxe allalisanoke umo kadeek Eedoomichchi Dooyiqi, Duuchchi Woddika Gootta magenoonfantammaba okko’o afeme’eemman.

8 Daawwitinna Abemelekii’i, «Moyanjiki ajaji ariifachchisaake kadeemmaxxee bagedo yookaan wele miya adheebo’no’n, bagedo yookaan wolaantichcho afeete?» Hiyye.

9 Abemelekinna, «Ati Ellaxxe Dhooqa’n shilite’etake Filisixeemichcho Goliyaadiki wolaantichchi aniba hedheen; isinna Efuudeti udumi darre hedheen; adhanno hitaattole isoo adhdhi, kaba hedhdheeki lolinki miyyi isoni callan» hiyye. Daawwitinna isooni ani’aa uwwi isoo caalek wolaantichcha habanna afemabaan.✝21:9 1 Sam. 17:51.

10 Daawwitinna Sa’ooli’i baqateexxi Akishi hine ye’naake Gaati moyanjibaa me’e. 11 Moyanjinki Jalqabuwwi, «Kunn bogiinke moyanjo Daawwititeba?

« ‹Sa’ooli kuma shiyallo! Daawwiti kinni tomme kuma shiyallo!›

hita’ni melaalle meelita’nemmak isotebaa?» hine Akishii’i lanqe.✝21:11 1 Sam. 18:7; 29:5.

12 Daawwitinna haaso’a insa’neeka godoba abixxeexxi Akishiininna jaba qico sodaate.✝21:12 Far. 56. 13 Tennexxe Daawwiti insa’ne edo ifi qalbe sa’eeke manjishsha asseexxi hulatika cufana hoqooqa’n areedakenaa’n gorori yaa’aashsha asse.✝21:13 Far. 34.

14 Akishiininna jalqabuwwa ifikee hiyyee qici, «Kunni manjichchi marataken! Anibaa isoo mayee idagine. 15 Ani marata afa gopheennexeete? Kunni manjichchi iitta kado’a anibaa iyyedagineechi? Iitta hedheeka manjo aniba iyyedaginagee?» Hiyye qore.