1 Ookkoneechchi uduma Daawwiti Raama giddo hexxeexxe Naayyotinaa'n baaje Yoonataaniba mareexxi «Maa assene? Ballessa anxi maachcho? Anni atiki anee shiyo'a hasa'neeki maa gorse'naate?» hiyye qore.

2 Yoonataninna, «Tinni atenaa'n bayyattoo! Rertaboxxoni!; Lumoxxe kadi shiixxoxxa yaane anki anni anee sho'aaxxi hexxebaan; tenne yaanenna kaddoole anni anki anee sho'abaan; mayee sho'a!» hiyye.

3 Daawwiti kinni, «Anni atiki anee yo'oshsha eettaatexxa ege'ne'een; tennexxe hexxeexxa ate'n ege'nishabaashsha mudhdheeni; tennenna assa'neechchi ati tenne egendotole yo'oshsha yaadattoxxa ege'nemmaxxeten; Hedhake Duuchchi Woddike Goottik summinni: atixxenna anxe oddo'ni balete hexxeen inbonnaa qaraqqarake'n he'nenen» hiyye kakate.

4 Yoonataaninna Daawwitii'i, «Ati hassetechcho duuchcha ati'a assannon» hiyye.

5 Daawwitinna, «Soodi baate fuldammake ayyanan; silaanni aninna moyanjiki welti ofo'le itannaken; yaane kinni o'lmisoodixxe hashsha qico'n sho'omonna'a ani'a eeti uwwi.✝ 6 Aki magada anni atiki anee haseexxe kaddoole ‹Firik welti woggatika tolcha shiqin sha'emmaxxee qachcha ifike Beetelihemi'a rake me'o'aa Daawwiti ane'e magannise kadhaten› hite iso'n kuli. 7 Moyanjikinna, ‹Eloxxen› hiyyoole, ani atiki erganji nage'ik hedhannoxxa ege'nannoni; mufatoole kinni fuggoxxa ani'a hede'eexxa egendattoni. 8 Mageniinke summinni ani'a kako aagetaxxee maganneten anee garbichcha atikee eloxxa assi; ani balleessanjoke kadonnole atinni anee shiyi malee shiyaashsha anna atike'n mayee anee sa'issite uutatto?» hiyye.

9 Yoonataani kinni, «Iitta hedheeka heduma hara heddoxxee! Ate'n fuggoxxa asso'a hedeexxa dhuganda ege'nenelcho kaddeele, ani ati'a kulannaba?» hiyye.

10 Daawwitinna, «Yoona anni atiki elobaaxxa anxee mufeti ate'n haasoole ayyete ane'n kula?» hiyye qore.

11 Yoonataaninna, «Amotata! Diidinba'a me'ino!» hiyye hiisse; lamingi diidi giddi'a me'ine. 12 Yoonataani Daawwitii'i hiyyee qici: «Duuchchi Woddik Gootti Isira'eeliki Mageni ege'neexxa! Soodo iitexxe yanna'n yookaan olmi soodo Anni anki ati'a eloka yaada afe'eeke kadeexxa qoree ca'a assennelchi uduma tenne yaane ca'a asse kulaaka manjo atiba ergannon. 13 Ate'ni fuggoxxa asso'a hasa'neeke kadoole kinni, ate'n ca'a asse kula gophe, atinna nage'inginni me'itatoshsha assa gophonnole anki Anni ate'n fuggoxxa asso'a hedeexxa Duuchchi Woddik Gootti ane'n geessiso'o. Anke Anninni welti hedhemmaki Mageni atinninna welti hedhowwaali! 14 Ani lubboti hedhenneke baro duuchcha'ni shiyemabo'noshsha Duuchchi Woddik Gootti eeyyaaxxa addatendeexxa jaalala ani'a leellishi; 15 Iitanni Duuchchi Woddik Gootti atika Daawwitika naapha buttatenaa'n biraa wodda addatendeexxe atixxe jaalalanni anka mini hadonna waaldoxxee.» ✝ 16 Tennexxee Yoonataani, «Daawwitike naapha'n Duuchchi Woddik Gootti halo fulowwaal» hiyyeexxi Daawitixxe hortenni welti kako aage.

17 Yoonataani Daawwitii'i lubbo ifixxishsha eeyyammaxxee Dhugaati anee etattole higgeenna kakati hiyye. 18 Ookkoneechchi uduma Yoonataani isoo hiyyee qici, «Soodo baate fuldammake ayyaannan ofoldattake barcumi duwwi gatoole hexxeboxxoxxa ege'nendatton; 19 Olmi soodo galgala tinni rakko kaddee wodda sho'ondeeteba Etseli hiyyemaake kinji uduma marete sho'omi. 20 Aninna miselcho'n alaama'neeke manjishsha kinji qarqari'a sase gabe darbannon. 21 Ookkoneechchi uduma darbennaxxa gabuwwa iyyedagaashsha anka erganjo ergannon; isoo ‹Gabuwwa ati kayyi darre hexxeen affetexxi iyyedagi› hiyyonnole hedhaak Duuchchi Woddik Gootti ege'neexxa ‹atee miidhachchi hedhebaani› hiyyoten. Tennexxee shondetabaa'n fuli. 22 Yaane kinni ookkone belto ‹Gabuwwa ati eliqi darre hexxeeni› hiyyennexxe kaddoole Duuchchi Woddik Gootti ate me'isse'emmaxxee me'i. 23 Atinna ani weli haasonennaxxe yaanexxee duuchchi woddi'a Duuchchi Woddik Gootti ati'anna ani'a dhugaaten.»

24 Tennexxe Daawwiti badda'a giddo sho'ome ture; baate fuldammake ayyanixxa barra Sa'ooli la'o la'ato'a ofo'le. 25 Sa'ooli wele woddishshanni ifixxe ulfinniixxe bakka'n mineke'n irikateexxi ofo'le; Abeneerinna iso'n itti aane ofo'laa wodda Yoonataani kinni isi edi gami'n ofo'lemman; konne wodda Daawwiti ofo'lammake baricuma'n ofo'lemang hedhemmabaan. 26 Kaddo malee Sa'ooli «Daawwiti kaddexxe yaane hexxeen; yookaan seerinke ajajishsha battummatena'n ca'a hiyyagopheten» hiyya'n godobik hedammaxxee eettene barra haaso'aage hinaageechcho bucuqqi hiyyebaan. 27 Baate fuldammake ayyanni sa'ena'a langaxxa barra Daawwiti ofo'lammake baricuma'n ofo'leemang hedhemmabaan; tennexxee Sa'ooli belto ifika Yoonataanii'i «Isseyik belti bereqqenna techcho mayeete tenne lumoxxe ita'ni afema gopheechi?» hiyye qore.

28 Yoonataaninna, «Daawwiti Beetelihemi'a me'o'aa eeti isi'a uwwannoshsha magannise anee kadhate. 29 ‹No'oki mini hadi qachchi giddo tolcha tolchaammaxxee ookko afemannoshsha anki dayyi anee ajaje'een; atenaa'n elle alfoonnole maganneten eetti an'a uwwi dayuwwa anka mare uudo› hiyye anee laqeemman; tennexxeeten moyanjiinxe tenne lumoxxe ita'ni afema gopheechchi.»

30 Sa'oolinna Yoonataani'n yo'oshsha mufateexxi «Ati dabaaleetetikenna xaqartite manjichchoki belti! Ati ifi'anna shooke ama atixxanna salphisota'a Isseyike beltinni welti jaalondetexxa ege'nennen! 31 Isseyik belti lubboti hedhee qico'n ati mootumma atixxe'n jabaate uurritaboxxoxxa egendeboxxo? Marte isoo aaxxe iyyedagi! Isi shiyemaaken.»

32 Yoonataaninna ifika anna Sa'oolii'i, «Maye'a shiyema? Balleessa isixxi maachcho?» hiyye haaso'e.

33 Sa'ooli tennenaa'n kexxeexxa Yoonataanii'i shiyo'a anga abixxeeka bagedo iso'n darbe; tennexxee Yoonatani Anni isik Sa'ool Daawwiti'i shiyo'a mudhdhee ke'eexxa ege'ne. 34 Yoonataani anni isik Daawwiti'i salphisemmaxxee Daawitixxee yaadexxi qoree waale ke'e; ookkonee baate fuldammake ayyaani langa baro mitte itande hinaachcho itebaan. 35 Langa bara gorsa Yoonataani mitte shiixxoka belto adhdheexxi Daawwitinni welti afemo'a abixxinemmaxxe bakkaba'a me'e. 36 Beltokanna «Edi'a gongite me'ite darbataannexxa gabuwwa hasse ani'a iyye dagi» hiyye. Beltikinna gonga'ni Yoonatani beltokenaa'ni edi'a sa'isse mitte gabe darbate. 37 Iikki belti gabe ibbemmaxxa bakka geyee wodda Yoonataani «Gabe ibbe'eebi edi'anden!» 38 Sammite ookko'o uurritoxxe! Rakke me'i! Hiyya'n beltoke'n cance; beltikinna gabuwwa adhdheexxi gootta ifike Yoonataanibaa hige. 39 Tinni yaane Yoonataani'aanna Daawwiti'a malee beltokee buqoxxemman. 40 Yoonataaninna belto ookkone «Anka lolinka miya aaxxe qachchi'a me'i» hiyye. 41 Beltikinna ookkone me'eechchi uduma Daawwiti sho'omemmabaan, kinotixxe tuuloke bita'inaa'n fuleexxi Yoonatani edo sasele kumbuyye sagade; lamingi weli sunqe'na'n oonaa'mman; Yoonataninaa'n caala kinni oodhe'emmak Daawititemman. 42 Ookkonechchi uduma Yoonataani Daawwitii'i, « ‹Atixxe hortexxenna anxe hortexxe oddo'n Duuchchi Woddik Gootti duuchchi woddi'a dhugaate kaduun› he'nennexxi jaalooma no'oxxi jabaatashsha Mageniike summinni kakanteennaxxee yoona nage'iki me'i» hiyye. Daawwiti ke'e me'e; Yoonataninna qachchi'a hige.