1 Saamu'eeli 8

Moyanji Moyaashsha Isira’eeli Qorte

1 Saamu’eeli cimee wodda ifixxa lame labbaxxa oose Isira’eeli’n hayyummati murtaashsha asse. 2 Angafi isi beltike summi Iyyu’eel, langakik Abiya hiyyemmaake kandaa wodda lamnig Beersaabehi hayyummati murte mura’emman. 3 Yaane kinni insa’ne anna insa’neek me’eeka ora me’inebaan. Seeri belo la’o alfatee matta adhdhina’n murte dassina’emman.

4 Tennexxe Isira’eelik akeekisanjuwwi duuchchi mitteba bukki hiyyeexxi Saamu’eeli hedhemmaba’a Raama dageexxi isoo, 5 «Kunnisse, ta’a ati cinde’eten oose atixxi ora ati me’itetteka me’itebaan; wele arduwwi afemmashshanni no’oo galchaak moyanjo moyaashsha assi» hine.✝8:5 Lew. 17:4. 6 Yaane kinni insa’ne «Moyanjo no’oo moyaashsha assi» hiyyiyyo insa’nexxi Saamu’eelii’i gammachchiiseba; tennexxee Duuchchi Woddike Goottibaa soodate. 7 Duuchchi Woddik Goottinna Saamu’eelii’i hiyyee qici, «Moyanjo insa’nek kadabe’noshsha tuffanteek ante malee atete kada gophphetaxxee ardi hiyyaaxxa duuchcha laqi. 8 Ani insa’nee Gibtseke boginaa’n fulchennexxe yannanaa’n telchi qico’n anee waalexxi wele magenuwwa magenoonfachchoti assinemmaxxa duuchcha ate’inna assina’neen. 9 Ta’a ati insa’ne hinaaxxa laqi; yaane kinni insa’ne’n moyaak moyanji maa insa’nee assaaxxa insa’ne’n ege’nish; jaba qicinninna insa’nee xexxe’achchiise.»

10 Saamu’eelinna Duuchchi Woddik Gootti hiyyemmaxxa duuchcha moyanji moyaashsha laqedhemmake arda duuchcha’n kule. 11 Isinna hiyyeexxi kulee qici, «Ha’no’n moyaak moyanj assaxxi yaaneri konnechchinni butti’a hexxeexxen: labbaxxa ha’nooxxa oose aadheexxi ifixxe loliinxe fadhadinxe gaaretike oofalluwwanna lolinke manna kandashsha assaan, weletanna fadhadiinxe gaare edo gongita’n insa’ne’a ora giissitaaxxe kaddaaxxe assaan. 12 Insa’e giddi’n wele lolinke mannike kumiinke ajajalluwwa, onde tommike ajajalluwwa kandaashsha assaan; labbaxxi ha’nooxi oose moyanjika fichcha hujjaaxxenna isi’a midha aassitaaxxe, isika lolinka miyanna isixxe fadhadiinxe gaareka miyya hujjaaxxe kaddaashsha asaan. 13 Meyyaxxi ha’nooxxi oosenna adheexxi isi’a shitto giissitaaxxe, wele isi’a ita duuchcha ra’issitaaxxe kaddaashsh asaan. 14 Shamo shamoka ha’nooka fichcha, elo elolla woyinetike hiddichchixxa bakkanna ha’noxa ejersinxa haqquwwa adhdheexxi ifike jalqabuwwi’a uwwaan. 15 Ha’nooxxe midhanaa’ninna ha’nooxxe ejersiinxe haqqenaa’n tomme anganaa’n mitte mitte adhdheexxi ifike moyeti minike ja’labuwwi’anna jalqabuwwi’a uwwaan. 16 Labbaxxanna meyyaxxa ha’nooxxa garboole, elo eloka ha’noka lalonna harruwwa ha’nooxxa adhdheexxi ifixxe la’o’n hosilsaan. 17 Ha’nooke gedhebokenaa’ninna re’etenaa’n tommitte adhaan; ha’nonna isixxe garboole kaddinaan. 18 Iitti barra geltaa wodda ifi’aanni fi’litinemmak moyanji ha’no’ni geessisaaxxe rakkonaa’n kexxeexxa qaraarfatinee ooxxinaan; yaane kinni eettene barra Duuchchi Woddik Gootti oodhishsha ha’nooxxa laqabaan.»

19 Yaane kinni ardi Saamu’eeli hiyyaxxa laqa gibee hiyyee qici, «Waawwo’o, moyanji no’o’n moyaasha hansaanneni; 20 No’onna wele ardishshanni no’oo akeekakenna no’o edo me’aake no’okaa lolanna no’o’a lalaaka moyanjo anfeenneke arda kandannoni.» 21 Saamu’eelinna ardi hiyyeexxa duuchchinxa laqe ke’eexxi mareexxi eetteneenni Duuchchi Woddike Gootta’n haaso’e. 22 Duuchchi Woddik Gootti Saamu’eeli’i «Ardi hiyyeexxa adhdhitetexxi moyanjo insa’ne’a uwwi» hiyye. Ookkoneechchi uduma Samu’eeli Isira’eelika manna «Duuchching ifi ifike miniba’a higge» hiyye.