1 Eettene yanna'n Filisixeemik ardi Isira'eeli lolo'a loliinka sannachcha bukki assedhe. Akishinna Daawwiti'i, «Atinna atinni welti me'ammaki manni loliinbaa me'inaannexxa ege'ne» hiyye.

2 Daawwitinna, «Ani atiki erganji maa assannoxxa atinni uuda dandetatton» hiyye hiisse.

Akishinna, «Eloxxen! Ani atee duuchchi woddike ulfesendeeteke heqqanjo anke assannon!» hiyye.

3 Saamu'eeli reyee wodda Isira'eeliki ardi duuchchi isixxe reyo'a yaade oodheexxi isi hedhammange qachcha'n Raama mongeemman. Edi wodda Sa'ooli ekedha haasesammakaaranna morammaka manna Isira'eelike bogi giddi'n shorre bireemman.✝

4 Filisixeemik loliink manni bukki hiyye dagee Sunemi qachchi bira bakka abixxe ofo'le, Sa'oolinna Isira'eelika arda duuchcha bukki asseexxi Gilbo'exxe kooba'n bakka abixxe ofo'le. 5 Sa'oolinna Filisixxeemika sannachcha uudexxe yanna'ni sodaate culphise. 6 Sa'oolinna Duuchchi Woddika Gootta laqedhe, Duuchchi Woddiki Goottinna kinni oojjotinna Uriiminni yookaan qeeseti darree'ni yookaan wabeekoti gamii'n isi'a hiisse haaso'a gibe. 7 Ookkoneechchi uduma Sa'ooli, «Ekedha haasossitaaxxa mitte meyyaxxa manjichcho ani'a hasse; tennexxe aninna mare hitaachcho laqedhannon» hiyye isi'a ergatemammaka manna ajaje.

Insa'nenna «Kunni ekedha haasositaxxi Mitte manjichcho Ayyindoori hexxeen» hine hiissine.

8 Sa'oolinna seemma welenxa odo'we ayyumma egennabaashsha lame manninni welti hashsha manjichchotibaa me'e. Ookko'o geyyeshshanni, «Ekedha haasossite edi'a kaddaaxxa yaane ani'a kuli, ani summa kulannoka manjo ke'issi» isee hiyye.

9 Manjichchotinna, «Moyanji Sa'ooli asseexxa duuchcha egendeeten. Isiqqa morammakanna ekedha haasossammaka manna Isira'eelike bogi giddii'n bire'een. Yoon ati anee abidisse shilchiisotta'a hassaatelchi mayi'ate?» hite.

10 Ookkoneechchi uduma Sa'oolinna ise'ni, «Tenne yanna'ni Sa'oolinna atee xixabaaxxa hedhaake Duuchchi Woddike Goottike summinni kakataannen» hiyye.

11 «Ke'isaaneki ayyete?» hite qorte.

Isinna «Saamu'eeli ke'issi» hiyye.

12 Isenna Saamu'eeli uudee wodda hafuura gikki assite cancita'n, «Ati Sa'oolinde kaddee mayee anee sobbete?» hite.

13 Moyanjikinna, «Meeco'o sodaattoxxee! Maachcho uuddete?» hiyye isee qore.

Isenna, «Magenummatixxa bifa afeechchi moogokena'n fulaa'naa uudannen» hite.

14 Isinna, «Maachcho laba?» Hiyye isee qore.

Iseenna «Kaabba odo'weeki mitti geerchi ke'a'nee hedhdheen» hite hiissite.

Ookkoneechchi uduma Sa'oolinna iikki Saamu'eelite kadeexxa ege'neexxi buttinake'n waabi hiyye anga iimi'a ke'isse.

15 Saamu'eelinna Sa'ooli'i, «Ane ke'issite olokkaateki mayye'ate?» hiyye.

Sa'oolinna «Ani Filisixeemike manninni welti lolema'n yo'oshsha rakkatee wixixxi iyyeennen! Magenikinna anenaa'n bayyete'een. Isinna wabeekoti darree'ninna kadi oojjotinna haaso'a gibeen. Tennexxe maa assa ani hassisaaxxa ani'a kuldottaa atee ye'isennen» hiyye.

16 Saamu'eelinna Sa'ooli hiyyee qici, «Duuchchi Woddik Gootti atee gibe ate'n naaphoole anee mayyee ye'isatto? 17 Duuchchi Woddik Gootti ani darree'n ati'a haaso'emmaxxa muuxxate'n hedhdhen. Atixxa moyaanjumma atenaa'n hoyyee olla'a atikee Daawwiti'a uwwe'een. 18 Ati Duuchchi Woddike Gootti'a ajajendeboxxon; Amaaleeqika mannanna insa'nelchcho kadeechcho duuchcha balleessite birteboxxon, isexxee Duuchchi Woddiki Gootti ta'a tenne duuchcha ate'n assa'neechchi tenne daafe'aten.✝ 19 Tennexxe isi atenna Isira'eelika arda Filisixeemike mannixxe anga'n sa'isse uwwaan; soodo atinna oose atixxi ani hedhdheneeke booncho'n dagginaan. Duuchchi Woddik Goottinna Isira'eelika sannachcha Filisixxeemike mannixxe anga'ni sa'isse uwwaani.»

20 Sa'oolinna Saamu'eeli hiyyichcho laqeeshshanni alayye shaqqeexxi buttinake'n wabbi hiyye ibe. Isinna eettene hashshanna barra duuchcha mittelcho ita gophemmaxxee shaqqe. 21 Manjichchotinna Sa'ooli bira marteexxi roqonsaa'naa uudemmaxxee hitee qici, «Ani atixxi erganjo ati hitettexxa laqeennexxi lubbo anxa jibbee ati hitettexxa muuxxennen. 22 Atinna kinn ta'a ani atixxi erganjo ati'a hiyyaannexxa laqi; shiixxoxxa ita ittotaa shiqishaannen; itte'e jabaate me'a dandeetattoshsha.»

23 Sa'oolinna hiyyee qici, «Mittelchonna itabo'non» hiyye gibe. Kaddo malee isiki erganjuwwinna iitti manjichcho jaba qicinni isoo kadhantemmaxxee buttinake'n ibbemmabaa'n ke'eexxi taqete'n ofo'le. 24 Manjichchotinna ha'yaka jibichcha affeemman, rakke okkone jibichcha duldeexxi. Isenna shiixxoxxa bulle aaxxe qushshitee gamami tuqebaaxxa kebbo kebbisse. 25 Itatanna Sa'ooli'anna isike erganjuwwi'a uute'naa indee eettene hashsha ookkoo'n ke'ne me'ine.