1 Barratixxa bara Filisixeemik manni Gilbo'ixxe kooba'n Isira'eelinni welti lollemme; heddi Isira'eeliki manni baaje, heddi manninna reye. 2 Filisixeemik manni kinni shorre dhaqqabeexxi sasiinxa Sa'oolixxa oose Yoonataanii'i, Abinadaabinna Malkishu'a shorre dhaqqabe. 3 Bagedi Sa'ooli hedhemma darre'n jabaata'ni me'eemmaxxee naaphakenaa'ni darbendammaxxi gabuwwa Sa'ooli fuggo ottee madeessite. 4 Sa'oolinna isika lolinka miyya ba'edhaammaka dargageessa hiyyee qici, «Kunni Mageno ege'nebaaki anee otee salphiseexxi manni'n, ati wolaantichchi atikenni anee shiyyi» hiyye.

Yaane kinni lolinka miya ba'edhammaki dargageessi kinni sodaatexxi shiyebaan; tennexxee Sa'ooli ifinga wolaantichcha adhdheexxi hana ibe dirrimmeme. 5 Lolinka miya ba'edhdhammaki dargageessinna Sa'ooli reyeexxa udeexxi isinna ifinge wolaantichchike qara'n hana dirme Sa'oolinni welti reye. 6 Yooni Sa'oolinna sasinxi isixxi labbaxxi oose lolinka miya ba'edhdhammaaki dargageessinna Sa'oolixxa duuka me'ammaki manni eettene barra'ni mittenba renne. 7 Yordaanoosike galaanibaa'n boroti daree'ninna Iyizira'eelixxe dhooqa wido hedhemmaaki Isira'eeliki manni Isra'eeliki sannaachchi baqateexxa, Sa'oolinna oose isixxa shinneexxa lanqeexxi qachcha waaliee baqante; Filisixeemik manninna dageexxi qachcha abixxe.

8 Lolikinna langa baro gorsa, Filisixeemik manni reyyeemake mannanaa'n loliinka miya adhdhino'a marreexxa yanna, insa'nenna Sa'oolika renshanna sasiinxe isixxe ooseki renshi Gilbo'ixxe kooba'n ibe'naa anfe. 9 Sa'oolika gooba wonxeexxi isixxa loliinxa seemmanna fulchine adhdhine magenuwa insa'nekike galmi'anna arda insa'neeke duuchchi'a gammashshotixxa odo lassaaka manna Filisixeemike boga duuchcha'n ergine. 10 Ookkoneechchi uduma Filisixxeemiki manni Sa'oolika loliinka miya asitaarooti hiyyemaake melaalletike mageno insa'neke galmi giddo ugine. Sa'oolika rensha Beetishani hinaake qachchiinke dalla'a'ni misimaareti ganne fanninse.

11 Iyyabiisi Gele'adik manni Gele'adike qachchik Filisixeemik manni Sa'ooli'ni asseexxa yaane laqeexxi, 12 insa'neki loliinki jannuwwi ke'e dageexxi hashsha duuchcha Beetishanemi'a marre. Insa'nenna Sa'oolikanna isixxe ooseka rensha qachchiinke dalla'anaa'n dirrinse Iyyabiisi'a iyyedage gunbe. 13 Ookkoneechchi uduma miqe insa'nixxa aa'neexxi Iyyabiisi giddo hedheeke Tamaaresiki hiyyemaake haqichchi hunda moogeexxi torribaane barra indeechi hedhebaanig agabo goddo honse.