1 Sa'ooli reyeechchinni uduma Daawwiti Amaaleeqito lole injifate higeexxi, Tsiqilaagi lame barra ture. 2 Sakka baro darendeexxa seemma oddo'wee, omo ifike'ni buko fiffiixeeki mitti manji Sa'oolixxe kaambebaa'ni dage. Isinna Daawwiti'i ulfeesse heeshshi hiyye.

3 Daawwitinna isoo, «Habaa'ni daggete?» hiyye qore.

Isinna, «Isira'eelitotixxe kaambebaa'n baqate dagennen» hiyye hiisse.

4 Daawwitinna, «Kadeexxi yaane maacho?» hiyye isoo qore.

Isinna, «Ardi bagedokenaa'ni baje'een; insa'ne giddii'ni heddi manni ribbi hiyyeen; reyeedhen; Sa'oolinna belti isik Yoonataaninna renne'en» hiyye.

5 Ookkoneechchi uduma Daawwitinna ergeme dagemmaka dargaggeesichcho, «Sa'oolinna belti isik Yoonataani renneexxa hitta egendette?» hiyye isoo qore.

6 Dargaggeessichchi manjichchinna hiyyee qic, «Ani iittanni Gilbo'axxe Kooba fuleennan» ookko'o «Sa'ooli abixxeexxe ebo'ni irkateeba hedhe'naa naaphiinxa fadhadiinxa gaaruwwanna fadhaduwwa oofammakiiri isoo hordofe dhaqqaphphe. 7 Sa'oolinna udumi'a wirri hiyyee anee afeexxi ye'e; aninna ‹Mayee yexxette?› hiyyennen.

8 «Isinna hiisseexxi, ‹Ati ayyete?› hiyye anee qore.

« ‹Aninna ante Amaaleqichchoken› hiyyee hiissene.

9 «Ookko'ni anee, ‹Reyotixxenna hedhotixxe oddo'ni hedhennen; lubbo kinni anenaa'n fuldebaan; amo anee shiyi› hiyye.

10 «Aninna mittele ibeechchi uduma gattabaaxxa ege'neennaxxe'e biri'a shikki hiyyennexxi shiyennen; umo isike'ni hedhemmaka kallachchanna hirrete'ni uggu'leemmaka hirboora aadhennexxi kunnuuxxi ati'a goota ankee iyyedageennen» hiyye.✝

11 Ookkoneechchi uduma Daawwitinna isinni welti hedhemmak manni duuchchi yaandemmaxxee ifi ifixxa seemma daddarre. 12 Insa'nenna Sa'oolinna belti isike Yoonataani wolaantichchik shiyemmeemmaxxee Duuchchi Woddike Goottike sannachchi'anna Isira'eelike mini hadi duuchchi'a bogi hashshaa qico'ni indeechchi hedhebang oo'na'ni honse.

13 Daawwitinna ergeme dageemmaka dargaggeessichcho, «Ati habaa'n daggette?» hiyye qore.

Isinna «Ani wele boganaa'n dage ofo'leeke Amaaleqichchiinke belton» hiyye hiisse.

14 Daawwitinna «Duuchchi Woddik Gootti fi'le hariireeka moyanjo hitta soda'a belo shiltette?» hiyye.

15 Ookkoneechchi uduma Daawwiti isike manni giddii'n mitte ye'eexxi, «Marte shiyi» hiyye; isinna mare shiye; Amalqichchikinna reye. 16 Daawwitinna, «Duuchchi Woddik Gootti hariireeka ‹shiyenneni hite atinge afo'inninni dhugaa fulchite kuldeetexxee ati mundii manjon› » hiyye.

17 Daawwitinna Sa'oolixxeenna belto isike Yoonataanixxe reyoxxee wi'lishsha'ni oodhe 18 Iittanni tennee yaadotixxa wi'lishsha Yihudak ardi'a barataashsha ajaje; tinninna Yaasharke maxaafa'ni borressendeemman:✝

19 «Tee Isira'eeli! Atik gaachchanni

koobuwwate'ni hana oteme reye.

Jajjabbi hitta ibaa!

20 «Tennee Gaati'ni haasotinoqqe'e,

Asiqeloonamike hodhicha'ninna lassitinoqqe'e

Filisixeemitotik dubarruwwi gammadoqqe'e,

Duuchchi Woddika Gootta addatebaak dubarruwwi ililisoqqe'e.

21 «Ha'no Gilbo'ake tulluchuwwa

kiifo xeenixxi ha'noo'ni cophphoqqe'e!

Umiinxa uwwa uutatake fichcha'n midha hexxoqqe'e;

ookkoo jabake manjichchixxe wonte battootemmaxxee,

Sa'oolixxa wonte ta'inni elqi'a zayite issendabaan.

22 Yoonataanixxi gabe shiltebang higgabaan,

Sa'oolik wolaantichchi tola boddichcha dagabaan;

jajjabba gane enqaake,

naaphakanna shiye birammakemman.

23 «Sa'oolinna Yoonataani hedhoti he'nemma wodda,

insa'nenna yo'oshsha weli eena'neekenna afo'i insa'neek weli aagekemman;

reyote'ninna gargar hingebaan;

insa'nenna sinbir irra yo'oshsha winaammaan

neenqi caalanna hunnameeyyetemman.

24 «Ha'no Isira'eelike dubarra,

baddeessitte, butta gelteexxa seemmanna fuuta ganneexxa seemma oddeeseemmake,

seemmuwwa ha'nooxxa worqeti seesemmake,

Sa'ooli'a oodhdhe.

25 «Jajjabbi hitta kadee lolake'ni iba,

Yoonataani tulluchchuwwake'n oteme reyeen.

26 Anke dayyo Yoonataani;

ani atixxee yaadennen.

Ati ani'a yo'oshsha fiixxeetan,

Eeya atixxi ani'a mambe'akemman

melaalletixxe eeyya irra eloxxemman.

27 «Jajjabbi hitta ibe!

Isik loliinki miyuwwi hitta tola gate!»