1 Daawwiti isinni welti hedhemmaka arda mitteba bukki asseexxi kuma loliinka manna ajajammakanna dhibba loliinka manna ajajammakaara hariire. 2 Daawwitinna sannachchuwwa sasekena'ni mitte anga Iyyo'aabi'ni, sasekena'ni mitte anga Iyyo'aabike dayyike Tsuriyake belto'n Abisayi'ni, sasekena'ni mitte anga kinni Gaatichcho Itaayixxe ajajallummanni insa'nen erge. Moyanjikinna sannachchuwwakee, «Ani umi anginninni ha'noonni welti dhugaanda duulanon» hiyye.

3 Mannikinna, «Ati fula hasissabaan; no'o baqantottole manni no'o tuffataaxxe hexxen; gamisi no'oki rennonnole midde insa'ne'a maachchonabaan; ati mitti no'oo tomme kuma saxxatton; tennexxe ati qachchake'ninni hexxe no'oo gargaartettele woyyan» hinne.

4 Moyanjikinna, «Ha'no'a eloxxe fakkaate leelliteexxa duuchcha assannon» hiyye insa'ne'a hiisse. Tennexxe ardi duuchchi kumikinna dhibbiki kuta kuta'ninni googeessiki fulaana'a moyanji dalla'iinxe hula'ni uurreemman. 5 Moyanjikinna Iyyo'aabii'i, Abisaanna Itaayi «Ani'a hitine'e darigaggeessa belto anke Abeseloomi'ni elobaaxxa assitinoqqee» hiyye ajaje. Moyanjikinna belto ifika Abesoloomi'i uuddaxxini mitte mitte ajajali'a ajaja uwwaa wodda; lolinki mann duuchchi laqe.

6 Loliinki mann Isira'eeli lollo'a googeessiki diidinbaa fulle; lolakanna Efireemike gongomi giddo sanfe. 7 Ookkoonna Isira'eelixxa baagediinxa hunna Daawwitixxi bagediinxi hunna injifatte. Eettenne barra'ni lumoki manni mudeen; lame tommi kumi manni eettene barra'ni shyeme. 8 Loli boga duuchcha'ni geyemmaxxee eettenne barra'ni wolaantichchki shineeke manni iimi darre raaqake'ni liqiinseme gateeke manniki laakkossi bira sa'eeni.

9 Eettene yanna'ni Abeseloomi Daawwittike manninni welti dedhange'ni afemme; Abesoloomi gaange gulufeexxi me'a'ni hedhemaxxee; gangige damuwwa bira saxxeeke mitte lumoke qilixxi hundi'ni saxxaa wodda Abesoloomika umo dame abidde; gulufeemmaxxi; gaangichchonna isi hundii'ni saxxe meitee wodda; Abesoloomi iimanni fanniseme gate. 10 Mitti manji tenne uudeexxi Iyyo'aabi'i, «Kunnisetenni Abeseloomi qilxiinke haqichcho'ni fannisemee'naa uudennen» hiyye kule.

11 Iyyo'aabinna kulemmaka manjo, «Maa hitette! Uudetelchinni mayee ookkone wodda gande'e butta ibisa gophphetelchi? Gande ibisetelcho kadeele ani ati'a tomme birretika sibiljonna mitte Zinnara ati'a badhaasannani» hiyyexxi hiise.

12 Manjichchi kinni hiyyee qici: «No'o lanqaa'naa moyanji, ‹Darigaggeessa Abeseloomi'n fugooxxi geltabashsha anxee hitineexxi isoo heqqe› hiyyexxi atte'e, Abisaaninna Itaayi ajajeemmaxxe kadeemmaxxee, mitte kuma birretika sibljo ani'a laako'e uuwweexxe kaddolenna midde moyanjike belto'ni anga anxa ke'isabo'non. 13 Wele darreeni ani lubbo anxa gibe'e Abesoloomi shiyenechcho kaddeele moyanjokenaa'n sho'onde gattaaxxi yaane hedha gophphpaammaxxee silaan atinna ani biri'a shiqqatammabaani» hiyye hiise haaso'e.

14 Iyyo'aabinna «Yooni konnee qicini ani atinni welti yanna tolanga balleessonaa hasabo'non» hiyye; tennexxee angate'ni sase bagedo abixxe me'exxi Abeseloomi qilixxakee'ni lubbonidinni fanniseme hedhee'na bagedo darbeexxi godoba oteen. 15 Itaanni Iyyo'aabika lolinka miyya ba'edhammakeranaa'ni; tommi Abeseloomii elqe kayyi'ni buqqeexxi bagediki onte shinne.

16 Ookkoneechchi uduma Iyyo'aabinna loli urraashsha malagata ufuunfaashsha ajajeen; lolinki manninna Isira'eelika arda shorrshsha waalle udumi'a hige. 17 Abeseloomika renshanna aa'neexxi raaqi giddo hexxeexxe lumoxxe bale giddo darbineen; eettene bale'ni heddo lumollamma kino tuule. Eettenne yanna Isira'eeliki ardi duuchchi baqateexxi mitti mittinigi manji mini mini ifnigiba'a me'een.

18 Abesoloomi, «Summa anka ye'isaaka mittekanna labbaka belto afeebo'non» hiyyexxi kassi isixxe kaddaashsha lubboti hedhemma wodda «Moyanjinxe dhooqa» hinaake booncho'ni ifike summinni sooddo karriseman; telchi qico'ni Abeseloomixxe sooddo hine ye'na'neen.

19 Eettenee yanna Saadooqik belti Ahima'aatsi, «Duuchchi Woddik Gootti naaphake'ni halo fulemmaxxee moyanjoke'ni gammashotixxa odo kuloo» hiyye.

20 Iyyo'aabinna, «Waawwoti telcho gammachchiissaaxxa odo marte odeessitattoki atetebaani; moyanjinki belti reyemmaxxee; telchote kaddebaaki gammachchiisaaxxa odo wele yanna marte odeesitattoni» hiyye.

21 Ookkoneechchi uduma Iyyo'aabi mitte Tophiyiichcho, «Martettexxi uuddettexxa moyanjoke'ni kuli» hiyye. Tophphiyichchikinna anga ifixxa iimi'a ke'isseexxi gonga'ni me'e.

22 Saadooqik belti Ahima'aatsinna higgeenni Iyyo'aabi'i, «Kaddeexxi kaddowwaal; maganneteni Tophiyiichcho dhaqabona'a gonga'ni maro» hiyye.

Iyyo'aabinna kinni «Anike beltoo; mayee marto'ta'a hassette? Badhadha badhatattoshsha maachcho gammachchiisaaxxa odo marte kuldota'ate?» hiyye isi'a hiisse.

23 Ahima'aatsinna, «Kaddeexxi kaddowaal; maronnaa hasaannen» hiyye.

Tennexxe Iyyo'aabinna, «Yooni gongita'ni me'i» hiyye. Ookkoneechchi uduma Akimaasi Yoridaanosixxe dhooqabaa geessisaaka ora gonga'ni me'eexxi Tophiyiichchi geyebaanigi iikki woddi mare geeye.

24 Daawwiti ookkone qachchixxe gadhixxenna giddixxe hulaxxe oddo'ni ofo'leenaa; dalla'iinxa hula heqqaammaaki dalla'i hana hulatiba hexxeexxe xeelphootixxe xungo'ni fule uurre gadhi'a uudaa wodda mitti manji qofittinni gonga'ni dagaa'naa uude; 25 Hula heqqaammakinna hafuura ifika qeerrisee ye'eexxi uudeexxa yaane moyanjoke'ni kule.

Moyanjikinna, «Qofittinni hedheeke kadoole eloxxa odo aadhe dageeke kadaan» hiyye. Iikki gongammaki manjichchinna shiqa'ninni daageeni.

26 Heqqanjikinna higgee'naa weli manji gonga'ni dagaa'naa uudeexxi daalla'iinxa hula heqqammaka ye'eexxi «Uudi! Weli manjinna qofinni gonga'ni dagate'ni hedheen» hiyye. Moyanjikinna, «Kunninna eloxxa odo aadhe daga'neeke kada dande'aan» hiyye hiisse.

27 Heqqanijikinna hiyyee qici, «Iikki edo hedhe gonga'neeki manji Saadoqike beltishsha Ahima'aatsishsha gonga'neekeni» hiyye.

Moyanjikinna, «Isi eloke manjon; eloxxa odo aadhee dagaan» hiyye.

28 Ookkoneechchi uduma Ahima'aatsinna hafuura qeerriseexxi moyanjo, «Duuchchiinxi yaane elo qicinni muuxxende'eeni» hiyyexxi; moyanjii edo albik gonbisemeexxi anga iimi'a ke'isseexxi; gootta moyanjo anke'ni fugoxxinni ke'emmaka manna anga atixxe'ni «sa'isse uwweki Duuchchi Woddik Gootti Mageni saadema'ni hedhowwaal!» hiyye.

29 Moyanjikinna, «Dargaggeessi Abeseloomi nagi'aangee?» hiyyeexxi qore.

Ahima'aatsinna, «Iyyo'aabi moyanjinka erganjonna anee erganjo atika ergo'a hiyya wodda, jabaxxi raankensha uudennen, yaane kinni ani maacho kaddeexxa ege'nebe'non» hiyyexxi hiisse.

30 Moyanjikinna isoo, «Edi'a saxxe uuri» hiyye. Isinna edi'a sa'eexxi uurre.

31 Ookkoneechchi uduma Tophiyiichchi dage dhaqqabeexxi, «Anke gootta moyanjo, gammashshotixxa odo! Telcho Duuchchi Woddik Gootti ate'ni ke'eeke naapha atike duuchchana'ni atee anjire'een» hiyye.

32 Moyanjikinna tophphiyichcho, «Dargaageessi Abeseloomi nage'angee?» hiyye isoo qore.

Tophiyiichchikinna, «Anke goottike moyanjiink naaphinna atee miidho'a ate'ni ke'aaki duuchchi ookkone dargageessishanni kaduun» hiyye hiisse.

33 Moyanjikinna yo'oshsha yaadeeni. Isinna dalla'iinxe hula iimi gama hedheeke mini iima fuleexxi oodhe. Me'ee woddanna, «Koo anke belto Abiseloomi! Anke belto Abeseloomi! Atixxe bakka'ni maa hedhe silaa ani reyeenelee! Koo Abiseloomii, anke belto, aanne anke belto!» hiyya'ni hiiqqise oodhe.