1 Isira'eelixxe gosak mine duuchchi Daawwiti hedheeba Kebirooni dageexxi isoo hiyyee qici, «Yoona no'o atinni mitte mundenna mitte maalan. 2 Konnechchinni edo Sa'ooli no'oke moyanjo kade akeekaamma wodda Isira'eelike ardi edo hexxe lolinka manna akeekattaki atetemman; Duuchchi Woddik Goottinna ‹Arda anka Isira'eeli'i heqitaton, akeekisanjo insa'nekenna kadatton› » attee hiyyemmani.

3 Tennexxe Isira'eelike ardixxi geedhuwwa duuchchi kebirooni daggee; moyanji Daawwitinna Kebroonke booncho'ni Duuchchi Woddik Gootti edo insa'nenni welti kako aage; insa'nenna Daawwiti'i harrireexxi Isira'eel'ni moyaashsha assine. 4 Daawwiti moyee wodda wogga isixxi sase tommemman; shoole tomme wogga moye galche. 5 Kebirooni ofo'leexxi Yihudaka arda torbaane wogganna jaane agenjo; iittanni Iyyerusaalemi ofo'leexxi Yihudiinkanna Isira'eelika arda duuchcha sase tommenna sase wogga moye galche.✝

6 Moyanjikinna manni isiki Iyyerusaalemi hedhaammaka Iyyabusika manna lollo'a ookko'a duulle. Iyyaabusiki manninna hiyyee qici, «Daawwiti kaba e'ya dande'abaan» hiyye hendemaaxxe Daawwiti'i, «Naafuwikinna balla'uwwi midde ate hoyyammaxxee kaba'a e'yitaboxxon» hine.✝ 7 Kaddo malee'e Daawwitinna Tsiyoonixxa kollo abixxe; kunninna Daawwitike qachcha hiyyemeeken.

8 Eettene barra Daawwiti hiyyee qici, «Iyyaabusito lolee kutti asso'a hasaaki Daawwitik naaphi kadeeke ‹Naafuwwinna balla'uwwa› dhaqqabo'a wode'inba'a me'inammaka qettelinna qabata hasissaan» hiyye. Tennexxe « ‹Naafuwwikinna balla'uwwi› mootummatike mine'ni e'yinabaani» hineechchi tennexxeeten.

9 Ookkoneechchi uduma Daawwitinna kolloti hana galduma ifika assedhe; bakka etteneenna «Daawwitike qachcha» hiyyeexxi summa fulcheeexxi; Daawwitinna Miillo'n ke'isse ookkone qachcha qarqara duuchcha ijaare. 10 Lumoki Duuchchi Woddik Gootti Mageni isinni welti hedhemmaxxe Daawwiti barra barra'ninni jabaata'ni me'e.

11 Eetene yanna Xiroosike bogiki moyanji Kiraami Daawwitiba'a erga erge; iittanni biribirisiinxa haqqe, mine ijaaraaka mannanna kino bocaaka manna insa'nenni welti erge; insa'nenna Daawwiti'a mootummatika mine ijaare. 12 Daawwitinna Duuchchi Woddik Gootti isoo Isira'eelike moyanjo asse hunna uwwe jabeesseexxanna Isira'eelike ardi'a hiyyee mootumma isixxa lummiseexxa ege'ne.

13 Daawwiti Kebiroonii'ni Iyyerusaalemi'a higeechchinni uduma edinxe melaallee'ni lebeexxi wele melaalluwwanna jaaluwwa adheeman; iittanni heddo labbaxxanna meyyaxxa oose i'leemman. 14 Daawwiti Iyyerusaalemi hedhemma wodda i'leexxi oose: Shaamu'a, Shobaabi, Naataani, Solomooni, 15 Yibihaari, Elishuu'a, Nefegi, Yaafi'a, 16 Elishaama'i, Eliyada'inna Elifeelexiiramman.

17 Daawwiti Isira'eelike moyanjo kadeexxa Filisixeemito laqqeexxa yanna isika hasito hunna jabeessexxexxi fulde; Daawwitii kinni tenne laqeexxi kollo ifixxiba'a adadde me'e. 18 Eettene yanna Filisixeemito daggeexxi Raafayimixxe dhooqa'ni xexxerende kanbe abixxite. 19 Tennexxe Daawwittinna Duuchchi Woddika Gootta, «Konne Filisixxeemika manna fule loloo? Anga anxe'ni sa'issite uuttatto?» hiyye laqe.

Duuchchi Woddik Goottinna, «Eeti martetexxi loli; ani insa'nee anga atixxe'ni sa'isse uwwannon» hiyye hiisse.

20 Tennexxe Daawwiti Ba'aaliperaasimi'a mareexxi Filisixxeemito lole injifate. Isinna «Lola'i enqe e'yee findigammashsha Duuchchi Woddik Gootti naapha ani edo enqe» hiyye. Tennenaa'ni kexxeexxa ookkone boonchiki summi Be'al Feratsim hiyyeme. 21 Filisixxeemito magenoonfatammaxxa fakkuwwa waalde baqateemmaxxee Daawwitinna isinni welti hedhemmaki manni booji'e adhdhe.

22 Filisixeemito higgeen daggeexxi Raafayimixxe dhooqa'ni xexxereende kanbe abixxite. 23 Tennexxe Daawwiti higgeeni Duuchchi Woddika Gootta laqe; Duuchchi Woddiki Goottinna hiyyee qici, «Insa'nee udumii'n saxxe buqqetexxi ode'iinxe haqqe edi ga'mii'ni loli malee kalchakenaa'n insa'ne'ni martoxxee. 24 Ode'iinxe qacce iimi'ni googeessiinka hafuura laqqottole eettene yanna'ni Duuchchi Woddik Gootti Filisixeemika loliinka manna lolo'a ati'a edise fule'een hiyyoten; eettene yanna atinna rakke rakke edi'a me'i» hiyye hiisse. 25 Tennexxe Daawwitinna Duuchchi Woddik Gootti ajajemmashshanni asse; Filisixeemito Geba'ii'ni ke'isseexxi Geezeri qico'ni insa'nee lole shorre.