1 Tsuriyak belti Iyyo'aabi moyanjiink godobi Abeseloomii halcheexxa ege'ne. 2 Tennexxe Iyyo'aabi Teequhe'a manjo ergeexxi mitte qaroontitte manjichcho iyyedangaashsha asse; isenna hiyyee qici, «Tinninna yaadeke manjishsha ifi assite; yaaddotixxa seemma oddo'i; buurokanna issattoxxe; reyeeke manji'a lumoxxa yanna yaaddeexxe manjichcho ifi assi. 3 Ookkoneechchi uduma moyanjiinba martettexxi ani ate'ni haaso'annexxa iso'ni haaso'i» hiyye. Ookkoneechchi uduma Iyyo'aab marte iso'ni kuldaxxa yaane ise'ni kule.

4 Iitti Teequhee'n daggeexxi manjichchonna moyanjiibba marteexxi moyanji edo albiki buttinna tuqqaa qico'ni heeshshi hiteexxi ulfeessiteechchi uduma, «Koo moyanjo balloo ane'e gargaari!» hite.

5 Moyanjikinna «Rakko atixxi maachcho?» hiyyee isee laqe.

Isenna hitee qici, «Aninna dhugaandinni aro'i reyeexxe hiyyeeten; 6 Ani erganjo atixxi lame labbaxxa oose afeennan; insa'nenna diidake'ni welinni weli lolemme; araarsaaki manji hedha gopheemmaxxee mitti mitte gane shiye. 7 Kunnisse firi duuchchi anee erganjo atixxe'ni ke'eexxi ‹Dayyo ifika shiyeemmaxxee dhaalak hedhabaashsha assineexxe kaddee'na midde iso shinnona'a dayyo ifika shiyeeka manjo no'aa uwwi› hina'n anee ko'winse'en. Insa'ne tenne assina'neexxe kaddoleta mitte ille anxa iille balleessinonna aro'o anka buttatenaa'n suummi belonna sanne belo gatinso'aten» hite.

8 Moyanjikinna manjichcho, «Ati mine atikiba'a me'i; yaane atixxee hasisaaka ajaja ani uwwannon» hiyye.

9 Yaane kinni Teequhee'n daggeexxi manjichcho, «Anke gootta moyanjo balleessa ane'ninna anke minke mine'ni kadduun; ate'ninna atixxe moote'n balleessa hexxebaan» hite.

10 Moyanjikinna, «Fedheeki manji mittelchonna haaso'oole isoo anibaa iyyedagi; langaxxa atee rakkisabaan» hiyye ise'a hiisse.

11 Issenna, «Halo fulaak manni anka belto balleessati tennee saxxeexxa miidhensha ane'ni geessinsabaasha ati moyanji atika Duuchchi Woddika Gootta ifika Mageno soodatowwaal» hite.

Moyanjnikinna, «Hedha'neek Duuchchi Woddik Gootti ege'neexxa atike beltike umiink ordichchanaa'ni mitti midde tuqemabaan» isee hiyye.

12 Ookkoneechchi uduma manjichchotinna, «Ani erganjo atixxi gootta anka moaanjo mitte hiyyichcho haaso'onnaa eeti ani'a uuwwi» isoo hite.

Isinna, «Haaso'ita'a,» isee hiyye.

13 Manjichchotinna hiissiteexxi hitee qici, «Iitta hexxeexxa yaane assatee Mageniinke arda'ni heddeetek mayeete? Moyanjikinna bogii'ni fuleeka belto ifika hiissiteboxxon; tenne hitatto wodda ifi'ni mudhiteeboxxoota? 14 Booso ibeeka buuro langaxxa alfinammabaakishsha no'onna kinni rennannon; Mageni kinni bogii iimi'ni fuleeki manjo atenaa'ni bayyate ookko'o gatabaashsha higaaka ora isi'a qophpheessa malee lubbo isixxi tolanga baxxo'a eeyyabaan.

15 «Aninna ta'a kabaa dagenelchi ardi anee sodaachchisemmaxxee tenneenni moyanjo anke gootti'a kulonaaten. Aninna erganjo atixxi tennee ‹Moyanjokee kulannon; dedha erganjo atixxxi ani laqennexxa muuxxattoxxe hexxen. 16 Mageni no'o'a uwweeke geegonaa'ni anenna anka belto fulcho'a ka'lee ke'eeke manjixxe anganaa'ni erganjo ifixxa moyanji anjiraaxxe hexxeni hiyyeteni› hite.

17 «Ta'anna ani erganjo atixxi hiyyaanne qici, ‹Gootti ank moyanji Magenike iimike erganjishsha eloxxanna elobaaxxa gargariti hiisse ege'nammaxxee anke goottiki moyanjiinki hiyyichchi anee jabeessowwaal; Duuchchi Woddik Gootti atik Mageninna attini welti hedhdhowwaal› hita'neen» hite.✝

18 Ookkoneechchi uduma Moyanjikinna manjichcho hiyyee qici: «Aninna atee qoraannexxa yaane; atinna shoxxe boxxongi kuli» hiyye.

Isenna «Anke gootta moyanjo haaso'i» hite.

19 Moyanjikinna «Tenne ati assitattoshsha ajajeeki Iyoo'aabitebaa?» hiyye qore.

Manjichchotinna hitee qici, «Anke gotta moyaanjo summi atikinni kakataannen; anki gootti moyanji hiyyeexxe duuchchanaa'ni middi'anna bitta'i'a higaak ayyinna hedhebaan. Eeti tenne assannoshsha anee ajajeekinna konne hiyyichcho duuchcha ani atixxi erganjo afo'i ankinninni kulannoshsha anee ergeeki erganjo atike Iyyo'aabiten. 20 Atiki erganji Iyyo'aabi tenne asseechchinna kaddeexxa yaane duuchcha jijjiro'a hiyyeeten; yaane kinni ati Duuchchi Woddiike Goottike iimike Erganjiika beekkuma fakkaataaka beekkuma afeettaxxee buttate'ni kaddaaxxa yaane duuchcha egendeten» hite.

21 Moyanjikinna Iyyo'aabi'i hiyyee qici: «Eloxxen; eettii uwweennen; martettexxi darggageessa Abeseloomi'i aaxxe iyyedagi» hiyye.

22 Iyyo'aabinna Daawwiti edo albiki buttina tuqaa qico'ni heeshshi hiyye anga ke'isse ulfesseexxi galateeffate, Iyyo'aabinna lebeexxi, «Moyanji anxa erganji atikixxa kadha laqqetaxxee ani atik ergaanji ati edo elle alfeennexxa telcho ege'nennen» hiyyeen. 23 Ookkoneechchi uduma Iyyo'aabi Geshuure'a mareexxi Abeseloomiinna Iyyerusaalemi'a hiisse iyyedage. 24 Moyanji kinni hiyyee qici, «Isi ookko'a mine ifikibaa me'uuni; ani haraanga ille isixxa uudonnaa hasaabo'non» tennexxee Abeseloomi mine ifikiba'a me'e; moyajiinka alba uudebaan.

25 Abeseloomii'i danchummati lekka uggaaki mitti manjinna Isira'eelike boga duuchcha'ni haranga hedhemmabaan; isinna umokenaa'n ke'isse lekkatike qe'yi qico'ni unshinaachcho afeemmabaake manjomman. 26 Abisoloomi goofaretike kadeemmaxxee goofare nophphite bira saxxaa wodda woggate'ni mittele woxedha'nemman; woxemeeka umo mootummatike minixxe kiilo'ni kiilaa wodda lame kiilo sa'aamman. 27 Abeseloomi sase labbaxxa oosenna Ti'imaari hiyyendaaxa mitte meyyaxxa belto i'leeman; iiti meyyaxxi belto yo'oshsha danchatemman.

28 Abeseloominna moyanjo uudebangi lame wogga Iyyerusaalemi ture. 29 Ookkoneechchi uduma Abeseloomi moyanjiinbaa me'o'aa Iyyo'aabi'i ye'ise Iyyo'aabi kinni isibaa mara eeyyebaan; langaxxa isiba erge; higgeen Iyyo'abi dagebaangi gibe. 30 Ookkoneechchi uduma Abeseloomi erganjuwwa ifikee hiyyee qici: «Kunnise Iyyo'aabiki fichchi anke fichchi biran; isike fichcha'ni haama geyeeke so'a hedheen; ookkone so'a'ni martineexxi giira worre» insa'nee hiyye. Tennexxe Abiselomoonk erganjuwwi mareexxi Iyyo'abike so'a'ni giira worre.

31 Ookkoneechchi uduma Iyyo'aabi Abeseloomike minibaa mareexxi, «Erganjuwwi atik mayeete anke midhatike fichcha'n giira woreek?» hiyyee qore.

32 Abeseloominna Iyyo'aabi hiyyee qici: «Ani atee ye'enne wodda daga gophetexxeten, moyanjiba martettexxi, ‹Geshuurii'n kaba mayye dagene? Ookko tureneele ani'a woyyamman› hitettexxi anxa yaane qor; iittanni moyanjik welti afema dande'annoshsha yaane ani'a giissi balleessa ane'ni afendoole anee shiyuun» hiyye.

33 Tennexxe Iyyo'aabinna moyanjo Daawwitiba mareexxi Abeseloomi hiyyeexxa duuchcha iso'n kule; ookkonechchi uduma moyanji Abesoloomi ye'ise; Abesoloominna mareexxi moyanji edo albiki gonbisemeexxi anga iimi'a ke'isse; moyanjikinna Abesoloomi sunqedhe.