1 Duuchchi Woddik Gootti isike naapha duuchchanaa'ninna Sa'oolixxe anganaa'ni isoo anjiree wodda, Daawwiti konneechchinni butti'a hexxeexxa faaro Duuchchi Woddike Gootti'a faarse. 2 Isinna hiyya'ni faarsee qici:

«Duuchchi Woddik Gootti jabaxxe anxe rassan, jabaxxe anke kollonna anke wodallon;

3 Anki Mageni irkatannoxxe anxe rassan,

anxe wontenna anxe anjiremaxxe hunnan.

Isinna jabaxxe anxe kollon,

irko anxenna anke anjirallon,

atinna hunnaameyye mannanaa'ni anee anjirtatton.

4 Ani Ggalata hasisaaka Duuchchi Woddika Gootta ye'edhanno,

naapha anikenaa'ninna anjirmanno.

5 «Reyo abbayyatike danbala'ishsha anee buqqe;

balleessaak lola'inna anee liqiinse.

6 Hirreesiinxi wodaro ane'ni mirqende;

shiltaaxxi fonxoro anee abide.

7 Rakko ane'ni geltee wodda

Duuchchi Woddika Gootta ye'edhenne;

anke Mageniba'anna raarenne.

Isinna galma ifik giddo hedheexxi hafuura anka laqe;

raare anixxinna mansha isixxe'n cophphi hite.

8 «Mageni mufate'emmaxxee booso buttiniinxi daaqqe,

iimatixxi boosuwwanna girgiri hite;

lele'mite.

9 Sano isixxenaa'ni wiliille tuqutuqu hite;

afo'o isikenaa'n ittaaxxi giira bubbe,

holati kashilinna afo'o isikenaa'n faqafaqa hiyye.

10 Isinni Iimuwwa benqasse'e butti'a dirre;

lekka isixxi hunda xilledhe raacho'eeke duumancha hedhemman.

11 Isinna kirubeele gulufe pirri hiyye;

diidalotike keelinninna shiwwi hiyye.

12 Dukkanaa oddowwe;

raachcho'eeki, xeeni callik duumanchi isoo buqe.

13 Isi edo wa'aa hiyyeeke ifinanaa'ni kexxeexxa

kashili faqafaqa hiyye.

14 Duuchchi Woddik Gootti iimi'ni dindime;

Lumok Mageni hafuura ifikanna laqise.

15 Isinna mogido ifika darbeexxi,

naaphuwwa ifikanna xexeere;

banqotike balaqinninna insa'ne'e shorre.

16 Duuchchi Woddike Goottike xixichchonaa'ni,

sano isixxenaa'ni tuqutu hiyyaake hafuurinaa'ni kexxeexxa, lumoxxi abbayya buqqe'emmak buttinni leelle;

buttatixxi boosonna ce'e hitte gatte.

17 «Duuchchi Woddik Gootti iimi'n anga qeerrise anee abide;

dhi'mo wode'iinaa'ninna anee harkise fulche.

18 Ane'n ke'emmake jabake naaphuwwinaa'n, anee gibammake mannixxe

anganaa'n anee gatise.

19 Rakkote'n hedhee'naa ane'n ke'ne lolle;

Duuchchi Woddik Gootti kinni anke kipha kade.

20 Isinna ba'laba anee fulche;

ane'ni gammademmaxxee anee anjire.

21 Duuchchi Woddik Gootti anxe qullummashshanni ani'a hira uwwa;

elloxxa assenneshshanni ani'a eloxxa assa.

22 Ani Duuchchi Woddike Goottika ora heqqedheennen;

anke Magenonaa'ni udumi'a higee fuggoxxa assebe'non.

23 Mageniinka seera duuchcha muuxe'ennen;

ajaja isikanna gibebe'non.

24 An balleessa afebe'noxxa isi ege'ne'een;

cubbo hujabe'noshshanna if heqqedhe'eennan.

25 Duuchchi Woddik Gootti qulluma anxishshanni,

eloxxa assenneshanni hira ani'a uwween.

26 «Ati'a addatemeekee, atinna isi'a addatendeeteke,

qajeeli manji'anna qajeelumma atixxa iso'n leellishshatto.

27 Ca'ichchakee atinna ca'umma atixxa iso'n leellishshatto,

fuggaalessakee kinni fuggo isixxishshanni hira isi'a uutatto.

28 Shaqqaka manna anjirtatto,

hollameeyye kinni salphissatto.

29 Ee, Duuchchi Woddike Goottaa ati anke ifan;

dukkana anxa ati ifisatto.

30 Atike gargaarsinni lolinka sannachcha injifatanno;

anke Magenixxe hunnanni dalla'a utaale sa'anno.

31 «Mageniink ori dedha afeekebaan;

Duuchchi Woddike Goottik hiyyichchi dhugaaten;

isoo irko assedheeke duuchchi'a isi wonteten.

32 Duuchchi Woddika Gootta malee'e ayyete Mageni?

No'oka Mageno malee rassa ayyete?

33 Hunna ani'a uwweexxi

ora ankanna qajeelchaak

Magenoken.

34 Isii lekka anxa gophphabaaxxe buddannetixxe lekkashsha assaan;

qephphpichcha bonchuwwa'n uurrannoshsha assaan.✝

35 Hitta lolannoxxa isi anee barachchiisa;

maalde'inxa gabenna darbannoka uuduuda ani'a uwwaan.

36 Anjirtaaxxa atixxa wonte ani'a uutette;

anee kiphphee lummissette.

37 Ati ora ani'a giissitette;

lekka anxinna xaldebaan.

38 «Naapha anka gussee abidannon;

insa'nee balleessebo'noki uudumi'a higabo'non.

39 Dandammantabaa qico'n insa'ne'e ganannon;

Langaxxa munnuqqi hinabaa;

renshii insa'nekinna lekka anxi hunda ibaan.

40 Lolakee hunna ani'a uutette;

naapha ankanna injifatannoshsha assitette.

41 Naaphi anki udumi'a higee baajaashsha assitette,

anee jibbammakaaranna kutti assenne.

42 Insa'nenna gargaarsake'e raarre, anjireki hedhebaan.

Duuchchi Woddike Goottibaa raarre; isi kinni sammi hiyye.

43 Diiddallo adhdhite me'itammaxxe bukkoshsha insa'nee bulleessenne;

ori giddixxe dhoqqeshshanna insa'nee hirbeessenne.

44 «Jallichchi ardinaa'n anee anjirtette.

Gosa gosake ardike umo assitee anee hariirtette;

ege'nebo'nok ardinna ani hunda galeen.

45 Alagi bogik manni ani'a heeshshi qokki hiyya;

gurra anka lanqeeshshanni ani'a ajajemaan.

46 Alanee culphinsa;

rooqonsina'n koollifanteebaa'n fulee anibaa dangaan.

47 «Duuchchi Woddik Gootti hedheeken!

Golli anki isii ulfaatowwaal!

Anjirall ank, rassa anxi Magenii lummedhowwaal.

48 Isi naapha anke'n ani'a halo fulaan;

gosa gosak ardi ani hunda galaashsha assaan.

49 Naapha ankenaa'n anee anjirtatto;

naaphi anki hana anee lummissatton;

manna midhaakerinaa'n anee gatissatton.

50 Ee Duuchchi Woddike Goottaa tennexxe gosa gosake ardi giddo atee galatefatannon;

summa atikanna faarsannon.✝

51 Moosisemmaka moyanjo isi injifatashsha assa;

fi'leeke moyanjo, Daawwitiinna, horte isixxa duuchchi woddi'a eeyyaa.»