1 Akixofeelinna, Abeseloomii hiyyee qici, «Tommenna lame kuma manna filleeneexxi telchixxe hashsha'ni anna atika Daawwiti'i shorishshannoni. 2 Isi goofamma woddanna hunna gophamma wodda ani lola iso'ni ke'issannon; weekenshatanna iso'ni iyyedagannon. Ookkoneechchi uduma aninna isinni welti hedhemmak ardi isoo waale baaje'naa qofi gateemmaka moyanjo shiyannon; 3 arda duuchcha atibaa hiissannonn; ati kinni mitte manji callixxe reyo hassaaten. Ookkoneechchi uduma ardi duuchchi nage'ik hedhaan.» 4 Kunni gorsi Abeseloominna isinni welti hexxemmaxxa Isira'eelixxa akeekisanuwwa duuchcha gammachiiseen.

5 Abeseloomi kinni, «Amme mee Arkichcho Huusheyi ye'we isi hiyyaaxxanna lanqo» hiyye. 6 Huusheyinna Abeseloomibaa dagee hiyyee qici: «Akixofeel no'oo gorse'een; yoona konne isi hiyya'neeka qorsa adhdhinoo? Kada gophoole atika ya'a amo mee no'o'ni kuli» hiyye.

7 Huusheyinna Abeseloomii hiyyee qici: «Akixofeel uwweeki gorsi tenne yanna'a elokebaan. 8 Anni atikinna isinni welti hedheeki manni riffi hiyabaake lolinke mannanna beltanna isixxa hundii'ni adhineeke gochcho fakkaatake biniicnhishsha soodaachinsaake kandeexxa atinna egendeeten; higgeenni anni atikinna lolinxa lumoxxa ege'na afeeken; hashsha lolinke manninni welti galabaani. 9 Ta'a midde mitte wolo'o'ni yookaan wele booncho'ni sho'omaaxxe hexxeen. Daawiti edise loleexxi, atika lolinka manna heenoka shiyoole; tenne laqeeki duuchchi, ‹Abeseloomixxa duuka me'emmaki lolinki reye mude› hine oddeessinaan. 10 Anni atiki lumoshsha lolakee ege'nemeekenna isinni welti hedheekirinna jannuwwake kandeexxa Isira'eeli duuchchi egendemmaaxxee, neenqinsha godobi riffi hiyyabaake hiyyemeeki udumi'a higabaaki lolinki manni midde sodaate culphisaan.

11 «Tennexxe ani atee gorssaaneki gorsi, Laakkossi insa'neeki abbayyati qariqqarike maanchishsha bira sa'eeka Daanii'ni Berisaabehi qiconi hedheeka Isira'eelika arda duuchcha atibaa bukki hiyyaashsha assite ati umi atngenninni lolinike mannike akeekisanjo kaddee lolinbaa'a arda adhdhite me'i. 12 Ookkoneechchi uduma Daawwiti ee'yeeke booncho duuchch'ni e'yinennexxi isoo lolannon; kaade iimi'ni buttinake'ni ibbammaashsha no'onna iso'ni hana inbannon; isinna kadi isiki loliinki manni midde mittikinna lubboti gatabaan; 13 Isinna konne qachchuwwi giddi'ni mitteke'ni e'yoole, Isira'eeliki ardi duuchchi ookkone qachchibaa wodaro aadhe mare'naa no'onna mitti kinji midde ookkone qachchiba afemabaasha dhooqa giddi'a hunnannon.»

14 Abeseloominna Isira'eeliki ardi duuchchi, «Akixoofeelike gorsi irra Arkichcho Huusheyika gorrisa woyyaan» hiyye; Duuchchi Woddik Gootti Abesoloomi'ni ba'ne geessiso'a hiyyee eloka Akixofeelika gorsa adhemabaashsha assen.

15 Huusheyinna qeese, Saadooqinna Abiyataari'i hiyyee qici: «Akixofeel Abeseloominna Isira'eelixxi geedhuwwa maa assiyo hasissaaxxa insa'ne gorseemman; aninna kinni tennee, tennee asse hiyye insa'nee gorseennen. 16 Ta'a yoona moyanjikinna isinni welti hedheeki ardi duuchchi ‹Ko'o geltebaangi rakine foofe, foofa gophottole kinni moyanjikinna isinni welti hedhemmaki ardi duuchchi ha'noo biraan› hitine Daawwiti'ni kulle» hiyye.

17 Eettenne yanna Yoonataaninna Ahima'aatsi qachchi giddi'a e'yinaa wodda e'yinaa'naa insa'nee affabaasha sodaantemmaxxee; Enirogeeli hiyyemaake booncho'ni heqina'nemman; mitte ergatendammaxxi dubarichcho kadeexxa yaane ookko'a marta'ni insa'ne'a kuldaa wodda, insa'neenna kinni eettenne lanqemmaxxa moyanjo Daawwiti'ni kula'nemman. 18 Yaane kinni mitti dargaggeessi belti insa'nee uudemmaxxee mareexxi Abeseloomi'a kulle; tennexxee lamingi rankee ke'neexxi Baahuriimi'ni hedheeke mitte manjike minibaa me'ine; manjichchikinna baxxe giddo wede'inxi bale hexxeemaxxee insa'nenna eettene bale'n e'yine. 19 Ookkone manjichchixxi are baletike afo'o'ni hana midha fannammaka gasha farri assiteexxi ayyinna ege'nabaashsha midha hana falte. 20 Abeseloomiki manni ookkone minibaa eettene manjichchobaa mareexxi, «Ahima'aatsinna Yoonataani haba he'ne?» hine qorre.

Manjichotinna «Wode'e foonfe me'ineen» hite insa'ne'a hiissite. Insa'nenna hanseexxi afa dande'a gonpheemmaxxee Iyyerusaalemi'a hinge me'ine. 21 Mannikinna me'ineechchi uduma iikki lamigi manni baletenaa'ni fuleexxi me'e; moyanjo Daawwiti'anna, kaddeexxa yaane duuchcha kulleen; Akixofeel insa'ne'aa gorsemmaka gorsa ca'a assine ege'nishsheechchi uduma «Rakketexxi wode'e foofi» isoo hine. 22 Tennexxe Daawwitinna isixxa duuka me'ammaki ardi duuchchi ke'eexxi Yordanosika wode'e foonfe; bogi soodee wodda Yordaanoosi'i foofebaak mittikinna gateek hedhemmabaan.

23 Akixofeelinna gorsa isika adhdha ginbeexxa uudeexxi harre ifixxa fe'edheexxi isi hedhammaake qachchibaa me'e; mini ifikiba'a me'e; duuchchinixxa yaane boonchi boonchiki abidiseechchi uduma ifinni ifi suruudheexxi reye; anni isikike hirreesa'nina mogemeeni.

24 Abeseloominna Isira'eeliki ardi duuchchinni welti Yordaanoosii'i foonifee wodda Daawwiti kinni Mahinayimi hiyyemaaka qachcha geyeemman. 25 Abeseloomi Iyyo'aabixxa bakka Amaasa hiyyemaaka manjo loliinke mannke akeekisanjo asseexxi hariire; Amaasa Isira'eelichcho Yeterike beltomman; Yotorinna Iyyo'abixxe Ama Tsuriyaxxi dayyo Na'osixxa belto Abigeeli'i aadheemman. 26 Isira'eelitonna Abeseloomi Gele'adike boga'ni ofolleemman.

27 Daawwiti Mahinayimi geyee wodda; Amoonitotike qachchanaa'ni Raaba'ni dageek, Na'oosik belti Shoobi Lodebaarike qachchanaa'ni dageeki Ami'eelik belti Makirinna Roogiliimii'n dageek Gele'adichchi Baarzilaayini'i alfe. 28 Inisa'nenna fa'inne diinphammaxxa seemmuwwa, heddo qoruwwa, faarinka miyyuwwa odolchuwwatanna iyyedange; iittanni dinnetanna so'a, bulletanna anneeka tishsha, baaqelakanna misira, 29 Malebo, itichcha, gedhebokanna laliinxe adoka cicita, indo'aa Daawwiti'aanna ardakee iyyedange; tenne assinnechchi, «Ardi qiilla gamooje'ni solo'weeni; gophe'een, dheebo'ween» hineeteni.