1 Daawwiti udunse haaso'eek hiyyichchi:

«Ya'iqoobike Mageno'ni hariiremeeki,

Lumok Mageni lummiseek manji,

Isira'eeliki eeyyemalli faarisanji,

Isseyike beltik Daawwitiki wabeekummatik hiyyichchi konneechchinni butti'a hedheeken.

2 «Duuchchi Woddike Goottik hafuuri ane'ni haaso'e;

hiyyichchi isiki anke afo'o'ni hedhemman.

3 Isira'eelik Mageni haaso'e,

Isira'eelixxi rassanna anee hitee qici:

‹Manna qullummati galchaak,

Mageno sodaatiyyoti galchaak,

4 Isi duumanchi hedhebaaba, gorsa arishsho

fuldamma wodda,

hedheeke ifishshaten,

buttatte'n arso lachchiisammake,

xeeni ganeechchi uduma wa'a hiyye hedhaammake ifishshaten.›

5 «Anki mini Magenokee qajeelakebaa?

Duuchchiinxa yaane qophphesseexxi heqqe'e,

aninni welti duuchchi woddixxa kako aagekebaa?

Anjirema anxa muuxamakee geessissaak,

harsenechcho duuchcha ani uwwaak isotebaa?

6 Yaane kinni fuggaaleyye manni duuchchi,

angati bukki assendammabaaxxe uteshsha hunemmaan.

7 Ute tuqaaki duuchchi

sibljiinka miya yookaan bagediinka somelcho abixxa;

utetinna hexxemmaxxe bakka'ni giirati gubante mundaan.»

8 Daawwitike gooti mannik summi konneechinni butti'a hedheen.

Tahikimoonike* manji Yoosebi Besetibeti* hiyyemaak manjichi ookkone sase gootuwwike akeekisanjo kadaa wodda, isinna bagedo aadheexxi mitte adhe'ni saddeeta dhibba loliinka manna sheyeeken.

9 Iso'ni aaneeki Ahoohichcho Doodik belti Ali'aazaaritemman; isinna lolakee mitteba bukki hiteemmaxxa Filisixeemito lollee wodda Daawwitinni welti hedheemmake sase goota manni giddii'ni mitti Eleezertemman. Ookkoneechchi uduma Isira'eelik manni baaje. 10 Isi kinni uurrammaxxa bakka wocci aassemmabaan; anga isixxi gophphe wolaantichchik welti goggaa qico'ni Filisixeemito lole. Eettene barra'ni Duuchchi Woddik Gootti injifachcho lumoxxa isi'a uwwe. Baajemmak sannachchuwwi Eeli'ezariba higeek shiyemeeka manna boojino'a callamman.

11 Ookkone sase loliinke hunnaamesa manninaa'ni sakkaki Haraarik bogike gurra fuleeke Ageke belto Saamatemman. Mitte barra Filisixxeemitonna Leehite hinaaba missiri calli wo'meeke fichcha'ni mitteba bukki hine he'nee'naa; Isira'eelik loliink manni Filisixeemi edii'ni baaje. 12 Saama kinni ookkone fichchi giddii'ni elqenna kayya higebaan. Isinna lole injifateexxi Filisixeemito shiye; eettene barra'ninna Duuchchi Woddik Gootti injifachcho lumoxxa isi'a uwwe. 13 Mayetixxe yanna'ni Filisixeemik loliink manni Raafayimixxe dhooqa'ni gume hedhe'naa, sase tomme akeekisanjuwwa'naa'ni sasi Daawwiti hedhemmabaa Adulaamixxe wolo'obaa'a dange. 14 Eettene yanna'ni Daawwiti kollo giddo hedheman; Filisixeemik loliink manninna Beetelihemi'i hedhemman. 15 Daawwitinna wode'e halchati, «Beetelihemi'a e'yinammaxxe hula bira hedheek baleessiinke wode'enaa'n ikkille iyyedagaaka manjo alfennele!» hiyye. 16 Tennexxe sasiniig gooti Filisixeemitotik loliinke mannixxe oddonaa'ni tansaase sa'eexxi, Beetelihemi'a e'yinammaxxe hula bira hedheeke baleessiinke wode'enaa'n iikkileexxi Daawwiti'a aa'ne dange. Yaane kinni isi ookkone wode'e ha'wammaxxe bakka Duuchchi Woddike Gootti edo dune.

17 «Isinna, koo Duuchchi Woddike Gootta iitta hexxeexxa yaane assa anenaa'n bayyis! Tinni rewotee mudhe me'emmake mannixxa munde ha'wineshshatebaa?» hiyye. Daawwitinna konne wode'e ha'wa hasebaan.

Tinni sasi gooti manni jannunteti assemmaxxe yaanuwwamman.

18 Tsuriyak belti Iyyo'aabik dayyi Abisa sase gootuwwike akeekisanjomman. Isinna bagedo aadheexxi sase dhibba manna shiyeken; tennexxee isi ookkone sase gootuwwishshanni gurra fuleeke manjomman. 19 Abisanna sase goota manni irra yo'oshsha ulfateekemmabaata? Isinna insa'nenaa'n mitteke kada gophoolenna sooresa insa'nekemman.

20 Qebsi'eelike bogike manjo kadeek Yoodahek belti Bennayaasi gura fuleeke wele goota manjomman. Isinna lame yo'oshsha ege'nemeeka Mo'aabito shiye; kaade ibbeexxa barranna bale giddo e'yeexxi neenqakanna shiye. 21 Higgeenni lebeexxi mitte qeerraka Gibtsichcho shiyedhen. Gibtsichchikinna anga ifixxe'n bagedo abixoolenna, Bennayaasi kinni isinni lolmo'a siqqo abixxe isibaa'a mare. Isinna Gibtsichchokenaa'n bagedo bute aadheexxi isinge bagedinninni isoo sheye. 22 Yoodahek belto Bennayaasixxi jannunte tenne labbaaxxemman; isinna sasiing gooti mannishsha gurra fuleeke kadoolenna 23 sase tomme gootuwwi irra ulfaate manjomman; yaane kinni ookkone sase gootuwwinaa'n isi mittekemaba'a. Daawwitinna Bennayaasii'i ifika loliinka miya ba'edhaake assee hariire. 24 Sase tomme manni giddii'ni wele mannilk summi konneechinni butti'a hedheeken, Iyyo'aabik dayyi Asaheeli, Beetelihemi ilemeek Doodik belti Elihanan, 25 Haaroodichchi Saama, Aroodichchi Eliiqa, 26 Feliixxichchi Selesi, Teequhe illemeek Isikaki belti Iraasi, 27 Anatootichchi Abi'eezeri, Kuusitichchi Mibunaayi, 28 Ahoohichcho Tsalmoon, Nexoofichchi Mahiraayi, 29 Nexoofichchi Be'aanak belti Heleebi, Biiniyaamixxe hortenaa'n Gibi'ake bogik manjo kadeek Ribaayik belti Itaayi, 30 Piri'atoonichchi Bennayaasi, Ga'ashixxe dhooqak manji Hidayi, 31 Araabichchi Abi'aliboon, Barihuumichchi Azimoot, 32 She'aalboonichchi Eliyaahiba, Aasaanixxi oose, Yoonataan hiyyemeek, 33 Haraadichcho Saamak belti* Aroodichcho Sharaarik* belti Ahi'aami, 34 Ma'ikichcho Ahaasebayik belti Elefaalati, Giilonaachchi Akixofeelik belt Eli'aam, 35 Qermeeloosichchi Hetsiro, Arabaachchi Fe'arayi, 36 Tsobake bogik manji Naataanik belti Igaal, Gaadik bogik manji Baani, 37 Amoonichchi Tsaaleqi, Tsuriyak belti Iyyo'aabika loliinka miya dukaammak Be'eerotichchi Nahirayi, 38 Yiitirichchi Iraasi, Yiitirichchi Geerebi, 39 iittanni Hiitichchi Ooriyo, insa'ne duuchchingi sase tommenna torbaankemman.