1 Konneechchi uduma Amoonik moyanji reye; belti isiki Hanooninna isixxe bakka'ni moye. 2 Daawwitinna, «Anni isiki eloxxa ani'a asseemmashshanni aninna Na'oosike belto Amooni'a eloxxa assannon» hiyye hede. Tennexxe anni isikixxe reyo'aa alayyo hedhenni hexxinee hiyyaaka manna Daawiti erge.

Daawwitiki manni Hamoonitotike bogibaa gennee wodda, 3 Amoonitotik ja'laabuwwi gootta insa'neeka Hanooni'i «Daawwiti alayyo hedhen hexxette hiyyaaka manna ergiyyo isixxi anna atika ulfeeseechcho ate'ni labbe'ee? Isinna ergeeki manni qachcha, dooyyeenna balleessashshatebaa?» hine.

4 Tennexxe Hanooni Daawwitika manna abixxeexxi, mitti mittingika areeda gama haadee gama gatise; seemma insa'nexxanna hidha hidhake'ni harunse harunse woxxeexxi shorre. 5 Daawwitinna tennee odo laqee wodda manni yo'oshsha shookemmaxxee moyanjikinna «Areedi ha'nook nophphaa qico'n Iyyaariko giddo turre ookkonechchi uduma higginaan» hiyyee erga erge.

6 Amoonito Daawwiti insa'nee'a naaphake kadeexxa egendeexxi, Betirehoobinaa'ninna Suubanaa'ni lame tomme kuma buttii'ni lolaaka Sooriyitotika lolii manna iittanni Ma'ikaka mowanjo mitte kuma manninni, higgeenni Xoobinaa'ni tommenna lame kuma loliinka manna maallaqik adhdhine. 7 Daawwitinna tenne laqee wodda, Iyyo'aabi'i loliinke manni duuchchinni welti duulchise. 8 Amoonito fuldeexxi ifike qachchi giddi'a e'yatixxe hulaba qececce; Suubaxxinna Re'aabixxi Sooriyito iittanni Xoobikinna Ma'ikak manni qofitti diidake'ni qacecce.

9 Iyyo'aabinna edii'ninna udumii'ni loliink manni buqeexxa uudeexxa yanna; Isira'eeli giddii'ni lolakee jannuntet ege'nemeeke manni giddii'ni heenoka fileexxi Sooritotike bagedi edi darre'n bakka abixxaashsha asse. 10 Gateemmak manni kinni isike dayyo Abisayixxe akeette hunda uggeexxi Abisake bagedi edo Amoonitoti edi darre bakka abixxinaashhsa asse. 11 Iyyo'aabinna hiyyee qici, «Soorito anxe hunna iimi ga'ma kada'noole ati dagge anee gargaartatton; Amoonito atixxe hunna iimi ga'ma kadda'noole ani dage atee gargaarannon. 12 Yooni meeccoo jabaati! Arda no'okenna Mageno no'oke qachchuwwi'a jannumati lollo; Duuchchi Woddik Goottinna iso'n eloxxe labbe leelliteexxa assowwaal.»

13 Ookkoneechchi uduma Iyyo'aabinna isinni welti hehdemak loliinki manni Soorito lolatee edi'a me'e; Sooritonna insa'ne edii'ni baqatte. 14 Sooritonna bajjeexxa Amoonito uuddexxi; insa'nenna Abisa edii'ni baqante qachchi giddi'a e'yine. Tennexxe Iyyo'aabi Amoonito lola waaleexxi Iyyerusaalemi'a hige.

15 Soorito Isira'eelitotike bagedo'n injifatendeexxa uudeexxi, higgeenni bukki hine. 16 Adiri'aza'are erga ergeexxi wode'i wido hexxeexxa Soorito iyyedangaashsha assi; insa'nenna Hadaadi'ezerika sannachchuwwike ajajallo Soobaakixxe akeetenni Elaami'a me'ine. 17 Daawwitinna tenne laqe wodda Isira'eeli duuchcha bukki asse; ookko'ninna Yordaanoosi foofee Elaami'a me'e; Sooritonna lolakee qececeexxi Daawwitinni lola ibbe; 18 Kaddo malee'e insa'nenna Isira'eeli edii'ni baanje; Daawwitinna torbaane dhibba loliinxa gaaruwwanna shoole tomme kuma buttii'n lolaaka manna* insa'neka shiye. Iittanni insa'neka loliinka akeekisanjo Soobaakii'i madeessineemaxxee ookkonni reye. 19 Hadaadi'ezerixxe baale hunda hedheemmaki moyanjuwwi duuchchi Isira'eeli injifatteexxa uudeexxi Isira'eelinni welti araaremmeexxi isa'ne'a hiremme.

Tennexxe Soorito ookkoneechchi uduma Amoonito gargaara sodaate.