1 Moyanjuwwi lolakee fulamaxxe midha facaansammaxxe yanna'ni Daawwiti Iyyo'aabi'i moyanjuwwinke manninninna Isira'eelike loliinke manni duuchchinn welti duullaashsha asse; insa'nenna Amoonito injifanteexxi Raaba hiyyemaaka qachcha bunqe; eettene yaanna Daawwiti kinni Iyyerusaalemi gateemman.✝

2 Mitte galgala Daawwiti diiphii'ni ke'eexxi mooyatike minixxe xeleepho'ni da'me elqe kayya mammarema'nemman; xeleephonde'ni hedhe manjichcho mitte biso anshexxa'naa afe; manjichchotinna danchumma gunde gungudeexxemman. 3 Daawwitinna ayyixxe kaddeexxa qoro'a manjo ise'n erge; manjichchikinna «Isi tinni manjichcho Eli'aami i'leexxe, Hiitichcho Ooriyoxxi are Bersaabehitebaa?» hiyye. 4 Ookkoneechchi uduma Daawwiti erganjuwwa irgiseexxi isee aa'ne dangaashsha asse; Bersaabehinna isi hedhemmake miniba'a e'yite; isinna isenni welti diiphe. Eettene yanna manjichchotena'n dubartettixxi aada dagge saxxe'naa seeriinxe aadashsha ca'a hitemman. Isenna ookko'ni ifike miniba'a illeema higge. 5 Manjichchotinna siila'wite; Daawwiti'ninna «Siila'weennen» hiteexxi erga ergite.

6 Tennexxe Daawwiti Iyyo'abi'n, «Hiitichcho Ooriyoo'o anibaa ergi» hiyyeexxi erga erge. Iyyo'abinna Ooriyooni'i Daawwitibaa erge. 7 Ooriyonna dagee wodda Daawwiti «Iyyo'aabinna sannachchi duuchchi nage'inginni hedhe? Loliinxi odo hittate?» hiyye qore. 8 Ookkoneechchi uduma Daawwiti Ooriyo'o, «Kexxe mini'a martettexxi lekka anshedhi» hiyye. Ooriyonna mootumatike minenaa'ni fule me'e, moyanjikinna itaachcho duuka erge. 9 Yaane kinni Ooriyo moyanjuwwiinke erganjuwwinni welti mootetike minike dalla'ixxe hulaba diiphe malee'e mini ifikiba'a adadde'a dirre me'eemmabaan. 10 Daawwitinna, «Ooriyo mini ifikiba'a me'ebaan» hinaaxa odo laqeexxi Oriyoo, «Orii'ni ta'a reefitebaa daggeetek? Ifike miniba'a mayee mara gophphete?» hiyye laqe.

11 Ooriyonna Daawwiti'i, «Taaboti, Isira'eelinna Yihudak ardi duunkaani giddo hedheexxi; gootti anki Iyyo'abinna anke goottik manni diidake'ni he'ne'naa; ani itonaanna ha'wonna'a iitanni anxe arenni welti diiphonna'a hitta ani mine ankiba me'anno? Aninna iitta hexxeexxa yaane hara assabo'non!»

12 Ookkoneechchi uduma Daawwitinna Ooriyo'o hiyyee qici: «Yooni telcho kabanni galde'naa soodo ookko'a higge me'itattoshsha asaannon» hiyye. Tennexxe Ooriyo eettene barranna langaxxa barra Iyyerusaaleminni ture. 13 Langa baro Daawwitinna Ooriyoo isinni welti hirbaata ito'a ye'eexxi itise ha'wise; machcheesse; bogi hashshee wodda Ooriyoo ifike goottike eriganjuwinni welti ifixxa fa'wammaxxa seemma fa'we galo'a me'e malee mini ifikiba'a me'ebaan.

14 Gorsa bariisanni Daawwiti Iyyo'aabi'a borro borresseexxi Ooriyo'ni erge. 15 Borreessendeexxe borreessanna hitaamma qici, «Ooriyoo'o loli eebbeke booncho'ni edo sa'issi; ookkoneechchi uduma oteme reyaashsha isoo waaldine'e baqatte» hitaaxemman. 16 Tennexxe Iyyo'aabi qachcha buqe abide hedheexxa yanna, naaphi haranga e'yabaasha kuteeke gama'ni Ooriyoo'o edo sa'isse. 17 Qachchiinki manni fuleexxi Iyyo'aabinni welti lola gence hiyye; Daawwitike lolinke manni giddi'ni heenok manni reye; itaanni Hiitichchi Ooriyonna reye.

18 Iyyo'aabinna lolake'ni kaddeexxa duuchcha Daawwiti'n erge sa'isse. 19 Erga marammakanna hiyyee qici: «Tenne lolinxa odo moyanjoke'n kuldetelchi uduma, 20 moyanjikinna mufateexxi atee ‹Insa'nee lolidino'a qachchiinba mayee shiqqine martine? Kinjiinke dalla'a'ni hana he'ne mogido ha'no'ni darbinaaxxa egendineebaa? 21 Yirubesheetika* belto Abemelekii'i shiyyeeki ayyete? Tebesi hiyyemaake booncho'ni kinjinke dala'i iimi'ni daaminka kinjo daribite shilteexxi mitte meyyaaxxe manjichchobaa? Yoona ha'nota kinjiinke dalla'i biri'a shiqineechchi mayyeete?› hiyye atee qoroole, atinna iso'n hite hissitatto qici, ‹Erganji atiki Hiitichchi Ooriyonna reyedhen› hite kuli» hiyye.✝

22 Tennexxe erganjikinna ke'exxi mare; ookko geyyeseshshanni Iyyo'aabi hiyyemmaxxa duuchcha Daawwiti'ni kule. 23 Erganjikinna Daawwiti'ni hiyyee qici, «Naaphi hunna no'oxxi iimi darre kade; no'onna lolo'a fuleexxi diidin qico'ni dage; no'onna qachchinke dalla'ixxe hula qico'ni wirrissine shorrinenneni. 24 Ookkoneechchi uduma kinjiinke dalla'i hana he'nexxi mogido no'o'ni atike eriganjuwwa'ni darbineen; moyanjinke eriganjuwwanaa'ni henooka shinneen; erigaanji atiki Hiitichchi Ooriyonna shiyemeen.»

25 Daawwitinna erganjokee, «Yooni hitee Iyyo'aabi'ni kuldatto qici, ‹Haanonna kadoole wolaantichchi mitte yanna konnee, wele yannanna okkonee shiyammaaxxee tennexxe yaadooxxee; hunna jabeesedheexxi qachcha balleessaashsha iso'n adda kull› » hiyyi.

26 Ooriyoxxi are aro'i ifik reyeexxa laqqeexxi isi'a ooxxe. 27 Bersabehi busedhumma bidhiteechchi uduma, Daawiti manjo ergeexxi ifike miniba'a iyyedangaashsha asse; ifixxe arenna assedhee'naa labbaka belto isi'a ilde; yaane kinni Daawwiti asseexxi yaane Duuchchi Woddika Gootta gammachchiisemmabaan.