1 Higgeenni Duuchchi Woddik Gootti Isira'eeli'ni yo'oshsha mufatemmaxxee Daawwiti darree'ni rakko ins'ne'ni geltaashsha asse: tennexxee Duuchchi Woddik Gootti Daawwiti'i, «Martettexxi Isira'eelikanna Yihudaka arda laakko'i» hiyye. 2 Tennexxe moyanji Iyyo'aabinna isinni welti hedhemmaka loliinke mannika ajajalluwwa, «Daanii'ni Bersaabehi qico'ni hedheeke Isira'eelixxe gosa duuchchabaa marte. Laakkosi insa'nek me'eke kadeexxa ege'na dande'annoshsha loliinka manna borreessi» hiyye.

3 Iyyo'aabi kinn moyanjo, «Duuchchi Woddik Gootti atki Mageni sannachcha konne dhibba anga bira sa'isseexxi, ate anka gootta moyanjiinxi illenna tenne uddaake asso'o; yaane kinni ati ank gootti moyanji tennee assatee mayeete hasseteke?» hiyye hiisse. 4 Kaddoolenna moyanjinki hiyyichchi Iyyo'aabinna loliinke mannika ajajjallo injifateemmaxxee Isira'eelika loliinka manna laakko'atee isi birii'n ke'ne me'ine.

5 Insa'nenna Yordaanoosi foonfeechchi uduma dhooqa giddo hedheeke qachchibaa'ni bita'i darre'ni hedheeke Aro'eerike qachchi bira kaanbe oltine, ookko'ninna Gaadi darree'n sa'neexxi Iyyazeeri'a me'ine. 6 Ittanni Gele'adibaanna Tebaasoni Adaseyiba'a, iittanni Daaniba'a, ookko'ni dowwe wirrineexxi Sidoonabaa me'ine. 7 Ookkoneechchi uduma Xiroosixxe kollobaa, Hiititotikenna Kenaanitotike qachchuwwi duuchchibaa, muuxamake'n Yihudake bita'a'n hexxeexxe Bersaabehiba'a me'ine. 8 Insa'nenna bogi giddo duuchchinba mammaremmeexxi sallane agenjonna lame tomme barra uduma Iyyerusaalemi'a illeema hinge dange. 9 Iyyo'aaninna loliinke manni duuchchingike laakkossa moyanjokee ege'nishe: Isira'eeli giddo saddeetta dhibbi kumi, Yihuda giddo onde dhibbi kumi wolaantichcha abixxe lalo'a dande'aak manni afeme.

10 Daawwitinna loliinka manna laakko'eechchi uduma ballesseexxa qalbete'n iso'n laqendemaxxee, «Ani tenne assiyyoti lumoxxa cubbo hujeennen. Assennexxi hara gowwi manjixxe hujen, koo Duuchchi Woddike Goottaa, ane erganjo atikixxa balleessa gattowwaal hitotta'a atee kadhataannen» hiyye.

11 Gorsa Daawwiti diiphi'n ke'ebaang Duuchchi Woddike Goottik hiyyichchi Daawitike waleella uudammake Gaadi'n dageexxi, 12 «Martettexxi Daawwiti'n, ‹Duuchchi Woddik Gootti hiyya'neen hitatto qici sase yaanenaa'n fi'litotta'a ati'a shiqisheennen. Tenne sasenaa'n fi'litettexxa ate'n assonaa mitte fi'li hiyya'neen hiyyi› » 13 Tennexxee Gaadi Daawwitibaa mareexi, «Boga atike'ni sase wogga'a solo'i kadaaxxa woyyamoo? Yookaan Naaphi atiki atee shorraa'na sase agenjo baajattoxxa? Yookaan kinni sase barraxxi bala boga atike'ni kaddaaxxa? Ta'a anee ergeeke'n maa hiyye hissichcho uwwannoxxa heddettexxi muri» hiyye.

14 Daawwitinna Gaadi'i, «Ani yo'oshsha wixxirri hiyyeenen. Isixxi mararte lumoxxe kaddeemmaxxee manjiinxe anga'ni ibennexxi mannii'ni Duuchchi Woddike Goottixxe anga'ni inbennexxa woyyan» hiyye. 15 Tennexxee Duuchchi Woddik Gootti eettene gorsanaa'n murendeexxe barraa qico'n Isira'eeli'n bala ibise, tenne balanni Daanii'ni Bersaabehi qico'n torbaatami kumi manni reye. 16 Duuchchi Woddike Goottik iimik erganji Iyyerusaalemi balleesate'e anga qophphi assee wodda, gelteexxi miidhensha Duuchchi Woddika Gootta yaadissemmaxxee ardake'n bala ibisaammaka ookkone iimika erganjo, «Gelte'een waal!» hiyye. Eettene yanna'ni Duuchchi Woddike Goottik iimik erganji Iyyaabusichcho Oorenna aldume bira uurremaan. 17 Daawwitinna ardake'ni bala ibisammaka iimika erganjo uudee wodda Duuchchi Woddika Gootta'n, «Yoona cubbo hujennekinna dedheennek anedden. Yaane kinni kunni gedhebiinsha allallaannek manni maa asse? Tinni bala ane'ninna mini hado anke'ni kaddowwaal» hiyye.

18 Eettene barra'ninni Gaadi Daawwitiba mareexxi, «Iyyaabusichcho Oorenna aldu'meba ale martettexxi Duuchchi Woddike Gootti'a tolchimalcho giissi» hiyye. 19 Tennexxee Daawwiti Duuchchi Woddik Gootti Gaadi darre'n ajajemmashshanni ale mare. 20 Oorinanna adadde uudaa wodda moyanjikinna manni isiki isibaa'a dagaa'naa afe fuleexxi butta dabba'le moyanjo ulfeesatee anga ke'isse. 21 Oorinanna, «Ank gootti moyanji anee erganjo atikiba mayee daggette?» hiyye.

Daawwitinna hiisseexxi, «Bala ardakenaa'ni kexxaashsha Duuchchi Woddik Gootti'a tolchimalcho giisonnaa aldumme atixxa hironna'aten» hiyye.

22 Oorinanna Daawwiti'i hiyyee qici, «Anki gootti moyanji eetetteechcho aadhitetexxi tolcha shiqishi. Ciincatike tolchi'a jiboota hexxeen, giiratixxe haqqe'a midha uxxinammaxxi hiilonna qotiyyotik qanbari hedheen. 23 Koo moyanjo konneechcho duuchcha ati'a uwwenne» iitanni Oorinanna isoo, «Duuchchi Woddik Gootti atik Mageni atenaa'ni adhdhaqqata» hiyye.

24 Yaane kinni moyanji Oorena'a, «Iita kaddabaan, konneechchika hira ani ati'a uwwa hasissaan. Aninna Duuchchi Woddike Gootta anke Mangini'a ciincatika tolcha hiri belo shiqishabe'non» hiyye.

Tennexxe Daawwiti aldumetanna jibbotuwwa onde tomme birretike sibiljinni hire. 25 Ookko'o Daawwiti Duuchchi Woddike Gootti'a tolchimalcho giisseen. Isinna ciincatika tolchanna mittoomiinka tolcha shiqishe. Ookkoneechchi uduma Duuchchi Woddik Gootti bogake'e soodantemmaxxa soodachcho laqe, Isira'eeli'n ibbeemmaxxi bala uurrite.