1 Ookkoneechchi uduma Daawwiti Filisixeemito lolee injifatee anga ifixxe'ni ibirse. «Meettegi Ama» hiyyemaaaka qachcha Filisixxeemitotena'ni adhdhe.

2 Iittanni Daawwiti Mo'aabito lole injifate; isinna insa'nee butta karee wodaroti mike; wodaroti mikemmakeeranaa'ni lame shiya'ni sakkaka kinni lubbondinni waala'nemman. Tennexxee Mo'aabito Daawwiti'a hirende irbo isi'a uuta'nemman.

3 Ookkoneechchi uduma Daawwiti Efiraaxisike galaani bira hedheeka boga ifi'ni hiissedho'a maree wodda Tsobaka mayonjo, Re'aabika belto Hadaadi'ezerii'i lole. 4 Daawwitinna mitte kuma fadhadiinxa gaaruwwa, torbaane kuma fadhadik lolaaka manna buttii'ni lolaaka lame tomme kuma manna booji'e. Laakkossi insa'nek dhibba geyeeki gaare harkisaammak fadhadi calli gataa wodda wele duuchchinga mogole wowwoxxe.

5 Demaasiqoxxi Sooriyito Tsobaka moyanjo Hadaadi'ezeri gargaartoa dagee wodda Daawwiti lame tommenna lame kuma insa'neka manna shiye. 6 Ookkoneechchi uduma Demaasiqoxxe galcha kadeeke Sooriyitotike boga'ni loliinxa kaambe uurise. Soriyitotinna Daawwiti'a hirendee hirbo uute. Duuchchi Woddik Goottinna Daawiti maree booncho duuchcha'ni injifataashsha asse. 7 Daawwitinna Hadaadi'ezerika ja'laabuwwi abixxiteemmaxxa worqetixxa wontuwwa booji'eexxi Iyyerusaalemi'a adhdhe dage. 8 Ittani moyanji Daawwiti Hadaadi'ezeri galchamake Beexahinna Beerotayi hine ye'naake qachchuwwinaa'ni heddo sageetuwwa aadhe.

9 Hamaatik moyanji To'u Daawwiti Hadaadi'ezerika sannachcha duuchcha injifateexxa laqeexxa yanna, 10 To'u Hadaadi'ezerinni welti duuchchi wodda lolemaammaxxenna Daawwiti Adi'aazar lole injifateemaxxee nage'akanna gammashshotixxa erga Daawwiti'a shiqisho'a belto ifika Yoraamii'i erge; isinna birreti siblijo, worqetikanna sageetotika miya isi'a aadhe mare. 11 Moyanji Daawwitinna edike gosa gosake moyanjuwwa duuchchanaa'ni irbo adhammaxxa bireti sibljonna worqe edi wodda assemmashanni Duuchchi Woddike Gootti'a foye. 12 Edoomi, Mo'aabi, Amoonito, Filisixeemitonna Amaaleeqito moyanjuwwi uwwemmaxxa irbo. Iitanni Tsobaka moyanjo Re'aabike belto Hadaadi'ezerina'ni adhdheemmaxxa booji'o Magenoke'e foye.

13 Daawwiti maxinetixxe dhooqa hiyyemaake booncho'ni tommenna saddeeta kuma Edoomito shiye higeechchi uduma summi isik saademe.✝

14 Isinna Eedoomike boga duuchcha'ni loliinxa kaanbuwwa uurrise; Eedoomito duuchcha Daawwiti'a hirende; Duuchchi Woddik Goottinna Daawwitii maree boncho duuchcha'ni injifataashsha asse.

15 Daawwitinna Isira'eelike boga duuchcha'n moyeexxi arda duuchcha'n toggittenna dhugaatixxa murte mura'ni galche. 16 Tsuriyak belti Iyyo'aabi loliinke mannike sooresa kadaa wodda Ahiluudik belti Iyyoosafiixinna jirtetike borreesanjomman. 17 Iittanni Ahixuubik belti Saadooqinna Abiyataarik belti Abemelek qeesete kandaa wodda Seeraya borreesanjokemmani. 18 Yoodahek beliti Bennayaasi Kelitotikenna Felitotike sooresa kandaa woddaa Daawwitixxi labbaxxi oose kinni mootummatike mini'a mari'etike mannamman.*