1 Ookkoneechchi uduma Daawwiti hiyyee qici, «Yihudake qachchuwwi giddi'ni mittiinba alale maroo?» hiyye Duuchchi Woddika Gootta laqe.

Duuchchi Woddik Goottinna «Eeti me'i» hiyye.

Daawwitinna, «Hoone qachchibaata me'anno?» hiyye hiisse laqe.

Duuchchi Woddik Goottinna, «Kebiroonike qachchiba'a me'i» hiyye isi'a hiisse.

2 Tennexxe Daawwiti lamiinxe are ifixxinni Iyyizira'eelichcho Ahino'aaminna Qermeeloosichcho reyemmake Naabaalixxa are Abigeelinni welti alalle'a qabate.✝ 3 Iittanni Daawwiti isinni welti hedhemmaka manna insa'nege mini hadinninni welti aadhe dage; insa'nenna Kebiroonik qachchuwwik qarqara'ni hedheeke qachchuwwa'ni ofolle. 4 Yihudak maninna Kebiroonike qachhcuwwiba dage; ookkonna Daawwiti'i hariirreexxi Yihudiinke ardike moyanjo assine.

Sa'ooli'i moogeki Gele'adi hedhammak Iyyabiisike manna kadeexxa Daawwiti laqee wodda,✝ 5 Daawwitinna Iyyabiisi Gele'adike manniba ergeexxi insa'ne'a hiyyee qici: «Konne qicinni gootta ha'noke Sa'oolika rensha moogiyyoti eloxxa assitineemmaxxee Duuchchi Woddik Gootti ha'noo eebbisoo. 6 Ta'anna Duuchchi Woddik Gootti mararte isixxenninna addatensha ifixxee ha'noo uuddowwaal; ha'noonna tennee assitineemmaxxee, aninna iitanni eloxxa yaane ha'no'a assannon. 7 Yoona gootti ha'nook Sa'ooli reyedheen; jabaatte, worbe, Yihudaki ardinna anee hariirexxi insa'nee moyannoshsha assine'een.»

8 Eettene yanna'ni Sa'oolik loliinke sannachchik ajajalli Nerik belti Abeneeri, Sa'oolika belto Iyyaabusittee'e Yordanoosi foosseexi Mahinayimi'a iyyedage. 9 Isoonna Gele'adi'ni, Aseeri'ni, Iyyizira'eeli'n, Efireemi'ni, Biiniyaami'ninna ittanni Isira'eelito duuchcha'ni moyanjoke asse.

10 Sa'oolik belti Iyyaabusitte Isira'eeli'ni moyanjo kadaa wodda shoole tomme woggamman; isinna lame wogga Isira'eeli galche.

Yihudaki minni hadi kinni Daawwiti'i hordofe. 11 Daawwiti Kebirooni ofo'leexxi Yihudake arda'ni torbaane wogganna jaane agenjo moye.

12 Nerik belti Abeneerinna, Sa'oolike beltixxe Iyyaabusitteke erganjuwwinni welti he'ne Mahinayimii'n kenneexxi Geba'oonike qachchiba'a me'ine. 13 Insa'neenna Tsuriyak belti Iyyo'abinna Daawwitiki manni fulleexxi Geba'oonik baleessi qarqara insa'nenni afemme; mitte qorbi baleessi wido, wele qorbi kinni baleessi kayya ofolle.

14 Ookko'ninna Abeneeri Iyyo'aabii'i hiyyee qici, «Ha'no giddii'ninna no'o giddii'ni ka'umi ke'eexxi loliinke miyinni weli aanowwal» hiyye.

Iyyo'aabinna hiyyee qici, «Kadduunni weli adhdhe inbaqata» hiyye hiisse.

15 Tennexxe Biniyaamixxe gamonnaa'ni Iyyaabusittek mannanaa'ni tommenna lami manni filemeexxi Daawwitike tommenna lame manninni welti lola inbe. 16 Ookkoo'ni mitti mittingi manji ifi ifika naaphiinka umo abideexxi wolaantichchik cinaachcha weli hordina'ni weli abixinemmashshanni inbe ookko renne. Tennexxe Geba'ooni hedheek iikki boonchi, «Wolaantichchiinke boga» hiyyeme.

17 Eettene barrak loli yo'oshsha jabakemman; Daawwitiki manni, Abeneerinna Isira'eelika manna injifate. 18 Tsuriya hiyyendaaxxe manjichchoxxi sasiinxi labbaxxi oose: Iyyo'aabi, Abisanna Asaheeli ookko he'nemman; Asa'heeli buddannetishsha gongammakemman 19 Isi elqe kayya hiyyebaangi Abeneeri abido'a isiba'a gonge. 20 Abeneerinna udumi'a wirri hiyye uudeexxi «Asaheeli ateende?» hiyye laqe.

Isinna «Eeti, anenden» hiyye hiisse.

21 Ookkoneechchi uduma Abeneerinna, «Anee shorichcho walde'e loliinike mannanaa'ni mittekenaa'n loliinka miya adhdhi» Asaheeli kinni isoo shorra waalemmabaan.

22 Langaxxanna Abeneeri, «Anee ta'anna shorra waaldetele ati'a woyyaanni atee shiye dayyo atika Iyyo'aabi'i heene illeenni uudano?» hiyye. 23 Yaane kinni Asaheeli shorrichcho waalebaan; tennexxee Abeneeri bagedo darbeexxi Asaheelika godoba ote duddurokenaa'ni fulche; Asaheelinna ookko ibe ikki woddi reye; ora sa'aaki manni duuchchi rensha isika uurre uudaamman.

24 Iyyo'aabinna Abisa kinni Abeneeri shorrate'ni ke'ne; shorrinsha'ni Gaba'oonixxe qiilla gammoojjeba'a me'aake Giyaahike ori bira hedheeke Amaake tullichchiba genneeshanni arishsho e'yite. 25 Ookko'ninna Biiniyaamik manni Abeneeribaa dage bukki hineexxi tullichchinxe xungo'ni lolakee qopheeffante.

26 Abeneerinna Iyyo'aabii ye'eexxi, «Wolaantichchi duuchchiui wodda lolemma'n he'na'no? Loliink muuxam qararake kadeexxa egendeboxxo? Atike ardi dayyuwwa ifika shorra waalaashsha ajaja insa'ne'a uutaboxxolchi mayeete?» hiyye.

27 Iyyo'aabinna hiisseexxi, «Hedhaake Magenixxa tenne haaso'a gophpheettele manni soodaa qico'ni dayyuwwa ifika shorra waalaammabaan» hiyye hiisse.

28 Tennexxe Iyyo'aabi malagata ufuufe; ookkoneechchi uduma manni duuchchi Isira'eelika arda shorra waale; lolikinna tennenninni uurre.

29 Abeneerinna isiki manni hashsha Arebanaa'n sa'ne me'ine; okkonechchi uduma Yordaanoosi fonfe Beetiroonni sa'ne Mahinayimi'a dange.

30 Ookkoneechchi uduma Iyyo'aabi Abeneerii'i shorra waaleexxi hige; isinna manna duuchcha mitteba bukki assee wodda Daawwitike mannanaa'ni Asaheeli lebebaang tommenna sallane manni giddii'ni gophemeexxa ege'nende. 31 Daawwitiki manninna kinni Abeneerinni welti hedhemmaka sase dhibbanna jaane tomme Biiniyaamito shinne. 32 Asaheelinna ibemmabaa'ni ke'issineexxi Beetelihemi giddo hado isika moongammake hirreessiba moonge. Ookkoo'ni Iyyo'aabinna isik manni hashsha duuchcha me'inaa'ni galleexxi soode wodda Kebirooni'i genne.