1 Abeneeri Kebirooni reyeexxa Sa'oolik belti Iyyaabusitte laqee wodda lumoshsha alayye culphise; Isira'eeliki ardi duuchchinna alayye. 2 Eetene yanna Sa'oolik belti Iyyabusitte isika loliinka manna akeekkaaxxa lame akeekanoole afeemman; insa'nenna Biiniyaamixxe gosanaa'ni Be'eerotixxe sanne kandeeke Remoonixxi oose Be'aananna Rekaabitemman; Bi'erooti Biiniyaamixxe gosati mini giddii'n mittekemman. 3 Be'eerotik ardi Gitayimi'a baqantemmashshanni telchi qico'ninna keesummumma ofo'leeshshaanni ookko hedha'neen.

4 Sa'ooliki belti Yoonataani lamiinxa lekka nafeeka mitte Mefibosheeti hiyyemaaka belto afeemman. Isinna Sa'oolinna Yoonaatani rennee wodda onde woggake beltomman; isinna naafake kadeechchi isoo lu'mitammaxxi manjichcho insa'nexxe reyoxxi odo Iyyizira'eelii'n daggee wodda isoo adhdhite wiinammiki baqattaa'na angii'ni ibe; iba eettenenaa'ni kexxeexa naafe.✝

5 Eettene yanna Be'eerotichcho Remoonixxi labbaaxxi oose Rekaabinna Be'aana Iyyaabusitteke mine'n barra saafo'a genne; isi ookkone wodda barrixxa hafuura adhdha adhdhatee taqete'ni irkateeba hedhdhe'na'a. 6 Hula heqqitammaxxi manjichcho*dinne sortammaba mugoke'n hexxemman. Ookkoneechchi uduma Rekaabinna Be'aanna laana sa'neexxi me'ne e'yine.

7 Insa'nenna mini giddi'a E'yineek Iyyabusitte kuta giddo diiphphenaten; onte shinnechchi uduma; gooba isikanna wonxe adhdhineexxi; hashsha duuchcha Arebaka ora me'ine. 8 Iyyabusitteka umo Kebirooni hedheeke moyanjo Daawwiti'a iyyedangeexxi moyanjo hinee qici, «Atee shiyo'a hasaammake naaphi atikike Sa'oolike beltiki Iyyaabusittek umi kunnisseten; moyanjo Sa'ooli'ninna mini hado isike'ni telcho Duuchchi Woddik Gootti halo ati'a fule'een» hine.

9 Daawwitinna be'eerotichchi Remoonixxe labbaxxe oose'a Rekaabiinna dayyo isikee Be'aanaa hiyye hiisse qici, «Fuggoxxe duuchchinaa'ni ane gargaareeke hedha'neeke Duuchchi Woddike Goottike summinni hiyye kakatee qici: 10 Gammashshotixxa odo ani'a iyyedageechcho iso'ni labee'naa, ‹Sa'ooli reyeen› hiyye ane'ni kuleeka manjo abideneexxi Tsiqilaagike booncho'ni shiyenneen; yoona ookkonne gammashotixxa odo iyyedageeke manji'a badhaseenneki badhaadhi konnendemmaan.✝ 11 Yooni mini ifiki giddo, taqete'ni ca'li hiyye diipheeka nage'iinka manjo shiyeeki fuggoki manni hitta kadee jaba qicinni xixema gopha? Aninna munde ha'nooxxa dunee halo fule ha'no buttatenaa'n shiye balleessannon!» hiyye. 12 Tennexxe Daawwiti ifika loliinka manna, insa'ne shiwwe hiyyeexxi ajaje; loliink manninna insa'nenna shinnexxi angatanna lekka wowwonxeexxi Kebirooni hedheeke balleessi bira rensha insa'neka fanisse. Yaane kinni Iyyaabusitteka umo aa'neexxi Kebirooni hedheeke hirreessa'ni Abeneeri moongemma bira isoo moonge.